ພະແນກ ອຄ ແຂວງສະຫວັນນະເຂດລົງກວດກາລາຄາສິນຄ້າຢູ່ຕະຫຼາດສາມັກຄີໄຊ

ແຫຼ່ງຂ່າວແຂວງສະຫວັນນະເຂດ ໃຫ້ວ່າ: ວັນທີ 9 ກຸມພາ 2023 ທີ່ຜ່ານມາ, ທ່ານ ໄຊຍະເດດ ຜຸຍຍະວົງ ຮອງຫົວ ໜ້າພະແນກອຸດສາຫະກຳ-ການຄ້າ (ອຄ) ແຂວງສະຫວັນນະເຂດ, ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ພ້ອມຄະນະ ໄດ້ລົງຕິດຕາມລາຄາສິນຄ້າໃນບັນຊີຄວບຄຸມ, ສິນຄ້າທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນຢູ່ຕະຫລາດສາມັກຄີໄຊ, ນະຄອນໄກສອນພົມວິຫານ ແຂວງສະຫວັນນະເຂດ.

ການລົງຕິດຕາມຄັ້ງນີ້,ເນັ້ນໃສ່ປະເພດສິນຄ້າບໍລິໂພກປະເພດ: ຊີ້ນງົວ, ໝູ, ປາ, ໄກ່, ໄຂ່ ແລະພືດຜັກອື່ນໆ ຊຶ່ງເຫັນວ່າສິນຄ້າມີການເໜັງຕີງຕາມກົນໄກຂອງຕະຫລາດເມື່ອທຽບໃສ່ກັບການຄິດໄລ່ໂຄງສ້າງຕົ້ນທຶນຍັງຢູ່ໃນລາຄາໃກ້ຄຽງກັນ. ນອກນັ້ນ, ຍັງສັງເກດເຫັນວ່າມີສິນຄ້າຕາມລະດູການເຂົ້າມາຈຳໜ່າຍເປັນຈຳນວນຫລາຍ ແລະ ສິນຄ້າປະເພດພືດຜັກທີ່ປະຊາຊົນປູກເອງເຂົ້າມາວາງຈຳໜ່າຍໄດ້ສ້າງຄວາມເຂັ້ມແຂງໃຫ້ແກ່ເສດຖະກິດບ້ານເຮົາ.

ໃນໂອກາດນີ້, ທ່ານ ໄຊຍະເດດ ຜຸຍຍະວົງ ໄດ້ຮຽກຮ້ອງມາຍັງແມ່ຄ້າທີ່ເຮັດໜ້າທີ່ໃນການບໍລິການຂາຍສິນຄ້າບໍລິໂພກຈົ່ງຄ້າຂາຍດ້ວຍຄວາມບໍລິສຸດ, ຊື່ສັດ, ບໍ່ເອົາລັດ-ເອົາປຽບຜູ້ບໍລິໂພກ, ຖືກຫລັກອະນາໄມ, ຂາຍສິນຄ້າທີ່ມີຄຸນນະພາບ.

• 13/02/2023