ຄຳມ່ວນ ເປີດງານເທສະການເຫຼົ້າໄຫຫວານຕຳນານເຜົ່າແສກ

ງານເທສະການເຫຼົ້າໄຫຫວານຕຳນານເຜົ່າແສກປະຈຳປີ 2023 ໄດ້ຈັດຂຶ້ນເມື່ອບໍ່ດົນມານີ້ທີ່ທ່າຝຣັ່ງ ວັງສີຄາມ ບ້ານທອກ-ນາຍໍ ເມືອງທ່າແຂກ ແຂວງຄໍາມ່ວນ, ເຂົ້າຮ່ວມເປັນປະທານເປີດງານໂດຍ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີພະແນກການ, ການນຳເມືອງ, ຜູ້ປະກອບການ, ແຂກຖືກເຊີນກ່ຽວຂ້ອງເຂົ້າຮ່ວມ.

ທ່ານ ຄຳບີ້ ລັດຕະນະວົງ ປະທານບໍລິສັດເຄເຄ ພັດທະນາການທ່ອງທ່ຽວຈຳກັດຜູ້ດຽວໃນນາມຜູ້ພັດທະນາແຫຼ່ງທ່ອງທ່ຽວທ່າຝຣັ່ງ ວັງສີຄາມ ກ່າວວ່າ: ງານເທສະການເຫຼົ້າໄຫຫວານຕຳນານເຜົ່າແສກໄດ້ຈັດຂຶ້ນທຸກໆປີ ເພື່ອຊຸກຍູ້ສົ່ງເສີມຜະລິດຕະພັນທ້ອງຖິ່ນຕິດພັນກັບການທ່ອງທ່ຽວ ກໍຄືເຫຼົ້າໄຫຂອງຊຸມຊົນບ້ານທອກ-ນາຍໍທີ່ມີລົດຊາດແຊບມາວາງຂາຍ ເພື່ອເປັນຂອງຕ້ອນຂອງຝາກທີ່ລືຊື່ແກ່ນັກທ່ອງທ່ຽວທີ່ມາຢ້ຽມຢາມ ແລະ ທ່ອງທ່ຽວຢູ່ທ່າຝຣັ່ງ. ທ່ານຍັງໄດ້ສະເໜີມາຍັງພາກລັດກໍຄື ຂະແໜງການກ່ຽວຂ້ອງຈົ່ງຊ່ວຍກັນຊຸກຍູ້ສົ່ງເສີມຜະລິດຕະພັນດັ່ງກ່າວ ເພື່ອໃຫ້ກາຍເປັນສິນຄ້າທີ່ມີເອກະລັກ, ມີຄວາມຍືນຍົງໃນຕໍ່ໜ້າ. ທັງນີ້ເພື່ອເປັນການສົ່ງເສີມສ້າງລາຍຮັບໃຫ້ແກ່ຊຸມຊົນ, ທັງເປັນການສ້າງກິດຈະກຳການທ່ອງທ່ຽວໃຫ້ມີຄວາມຄຶກຄື້ນອີກດ້ວຍ.

ໂອກາດນີ້, ທ່ານ ແກ້ວອຸດອນ ບຸດສິງຂອນ ໄດ້ສະແດງຄວາມຊົມເຊີຍມາຍັງຜູ້ປະກອບການ ແລະປະຊາຊົນທີ່ໄດ້ຮັກສາມູນເຊື້ອວັດທະນະທຳຮີດຄອງປະເພນີ ເອກະລັກອັນດີງາມຂອງຊົນເຜົ່າແສກ.ການຈັດງານຄັ້ງນີ້ເພື່ອເປັນການອະນຸລັກຮັກສາວັດທະນະທຳຊົນເຜົ່າແສກ ທີ່ມີມູນເຊື້ອໃນການເຮັດເຫຼົ້າໄຫແຊບ, ເຜົ່າແສກເປັນ 1 ໃນ 9 ຊົນເຜົ່າທີ່ດຳລົງຊີວິດຢູ່ແຂວງຄຳມ່ວນ, ມີກົກເຄົ້າດຽວກັບໜວດຊົນເຜົ່າພາສາມອນ-ຂະແມ, ມີການນຸ່ງຖືທີ່ມີເອກະລັກທັງຍິງ ແລະຊາຍ, ການປະກອບອາຊີບສ່ວນຫຼາຍປູກຝັງ-ລ້ຽງສັດ ແລະຄ້າຂາຍ, ມີຄວາມຈະເລີນທາງດ້ານຈິນຕະນາການຕາມການເວລາທີ່ມີການປ່ຽນແປງຕາມຍຸກສະໄໝແຫ່ງການພັດທະນາ, ສຳລັບຢູ່ແຂວງຄຳມ່ວນມີຊົນເຜົ່າແສກຫຼາຍກວ່າ 2 ພັນຄົນ.ພ້ອມນີ້ທ່ານຮອງເຈົ້າແຂວງ ຍັງໄດ້ເຊີນຊວນນັກທ່ອງທ່ຽວທັງພາຍໃນ ແລະຕ່າງປະເທດມາທ່ຽວຊົມສະຖານທີ່ທ່ອງທ່ຽວຢູ່ແຂວງຄໍາມ່ວນ. ນອກຈາກແຫຼ່ງທ່ອງທ່ຽວທ່າຝຣັ່ງແລ້ວພວກເຮົາຍັງມີແຫຼ່ງທ່ອງທ່ຽວສຳຄັນ, ສວຍງາມຫຼາຍໆແຫ່ງເປັນຕົ້ນຖໍ້າພະໜອງປາຜາ,ຖໍ້ານາງແອ່ນ, ຖໍ້າກອງລໍ, ຂຸນກອງແລງ, ພູຜ່າມານ, ຖໍ້ານໍ້າລອດເຊບັ້ງໄຟ ແລະສະຖານທີ່ອື່ນໆອີກຈຳນວນໜຶ່ງ.

ໃນໂອກາດຮ່ວມງານຄັ້ງນີ້,ອົງການປົກຄອງແຂວງຄຳມ່ວນ ແລະບໍລິສັດເຄເຄ ພັດທະນາການທ່ອງທ່ຽວຈຳກັດ ຍັງໄດ້ມອບເງິນຈຳນວນໜຶ່ງໃຫ້ແກ່ອຳນາດການປົກຄອງບ້ານດັ່ງກ່າວອີກດ້ວຍ.
ຂ່າວ-ພາບ: ມະນີວັນ

แชร์