ປີນີ້ເຊກອງ ຈະສູ້ຊົນເກັບລາຍຮັບໃຫ້ໄດ້ 230 ຕື້ກວ່າກີບ

ຕາມການລາຍງານຈາກທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງເຊກອງ ໃຫ້ຮູ້ວ່າ: ໃນປີ 2023 ນີ້ ແຂວງເຊກອງຈະສູ້ຊົນຈັດເກັບລາຍຮັບເຂົ້າງົບປະມານໃຫ້ໄດ້ທັງໝົດ 234,53 ຕື້ກີບ ໃນນີ້, ລາຍຮັບພູດສູນກາງປະຕິບັດຢູ່ທ້ອງຖິ່ນ 10 ຕື້ກີບ ແລະ ລາຍຮັບຂອງແຂວງ 224,52 ຕື້ກີບ ໂດຍມີລາຍຮັບຈາກພາສີ-ສ່ວຍສາອາກອນ 194,64 ຕື້ກີບ, ລາຍຮັບຈາກຊັບສິນແຫ່ງລັດ 29,88 ຕື້ກີບ ແລະເອົາໃຈໃສ່ຄຸ້ມຄອງລາຍຈ່າຍໃຫ້ຢູ່ໃນລະດັບ 305,03 ຕື້ກີບ ທຽບໃສ່ປີ 2022 ຫຼຸດລົງ 20%.

ພ້ອມນີ້, ຈະສຸມໃສ່ຫັນເອົາຫົວໜ່ວຍທຸລະກິດທີ່ມີລາຍຮັບເກີນ 400 ລ້ານ ເຂົ້າໃນລະບົບອາກອນມູນຄ່າເພີ່ມ; ຄຸ້ມຄອງຖານລາຍຮັບທີ່ມີຢູ່ແລ້ວມອບເຂົ້າງົບປະມານໃຫ້ຖືກຕ້ອງ ແລະຄົບຖ້ວນ, ເກັບກໍາຂໍ້ມູນ ແລະ ຂຸດຄົ້ນແຫລ່ງລາຍຮັບທີ່ຍັງບົ່ມຊ້ອນ; ເອົາບັນດາຫົວໜ່ວຍທຸລະກິດທີ່ໄດ້ຂຶ້ນທັງບຽນທັງໝົດເຂົ້າໃນລະບົບແທັກລິດໃຫ້ສໍາເລັດ 100%; ຂະຫຍາຍຖານອາກອນມູນຄ່າເພີ່ມໃຫ້ໄດ້ທັງປະລິມານ ແລະຄຸນນະພາບ; ຈັດເກັບລາຍຮັບຄ່າທໍານຽມນໍາໃຊ້ພາຫະນະ ແລະຄ່າທໍານຽມພາສີທີ່ດິນໃຫ້ຄົບຖ້ວນ; ແກ້ໄຂໜີ້ຄ້າງມອບອາກອນໃນລະບົບ TaxRIS; ກວດກາບັນດາວິສາຫະກິດທີ່ມີການແຈ້ງບໍ່ປົກກະຕິ ເຊັ່ນ: ແຈ້ງສູນ, ບໍ່ມາແຈ້ງ ຫລືແຈ້ງຫລຸດ ເພື່ອນໍາໃຊ້ມາດຕະການຢ່າງເໝາະສົມຕໍ່ວິສາຫະກິດດັ່ງກ່າວ; ຕິດຕາມ, ສັງລວມຖານຂໍ້ມູນ ແລະການຈັດເກັບພັນທະຕ່າງໆໃຫ້ໄດ້ຢ່າງຄົບຖ້ວນຈາກບັນດາໂຄງການແຮ່ທາດ ແລະໄຟຟ້າ; ຄຸ້ມຄອງສາງສິນຄ້າ, ຕິດຕາມກວດກາການເຄື່ອນຍ້າຍນໍ້າມັນເຊື້ອໄຟ ແລະ ສິນຄ້າເຄື່ອງຂອງຕ່າງໆ; ໂຄສະນາເຜີຍແຜ່ ແລະ ການຊຸກຍູ້ໃຫ້ຜູ້ເສຍອາກອນໃຫ້ແຈ້ງມອບດ້ວຍຕົນເອງ ໃຫ້ເພີ່ມຂຶ້ນຂອງຫົວໜ່ວຍທັງໝົດທີ່ຢູ່ໃນລະບົບ TaxRIS; ອໍານວຍຄວາມສະດວກໃນການສົ່ງອອກການຂຸດຄົ້ນບໍ່ຖ່ານຫີນ ທີ່ໄດ້ຂຸດຄົ້ນແລ້ວ ໃຫ້ໄດ້ສົ່ງອອກ ແລະ ມອບລາຍຮັບເຂົ້າງົບປະມານ; ຈັດເກັບຈາກຖານລາຍຮັບໃໝ່ຈາກການນໍາເຂົ້ານໍ້າມັນເຊື້ອໄຟຜ່ານດ່ານສາກົນດາກຕະອອກ; ຊຸກຍູ້ຫົວໜ່ວຍທຸລະກິດທີ່ໄດ້ຮັບອະນຸຍາດດໍາເນີນທຸລະກິດເພື່ອໃຫ້ສາມາດດໍາເນີນກິດຈະການ ແລະມອບພັນທະຕາມສັນຍາທີ່ໄດ້ຕົກລົງກັນ.

ທ່ານ ຄໍາຮູ້ ອ່ອນມະນີ ຍັງໃຫ້ຮູ້ອີກວ່າ: ໃນປີ 2022 ຜ່ານມາແຂວງເຊກອງ ຈັດເກັບລາຍຮັບເຂົ້າງົບປະມານ (ພູດຂອງແຂວງ) ໄດ້ 149,48 ຕື້ກີບ ທຽບໃສ່ແຜນດັດແກ້ປະຕິບັດໄດ້ 130,34% ໃນນີ້, ມີລາຍຮັບພາສີ-ສ່ວຍສາອາກອນ 123,25 ຕື້ກີບ ທຽບໃສ່ແຜນປະຕິບັດໄດ້ 123,17% ທຽບ ໃສ່ປີ 2021 ເພີ່ມຂຶ້ນ 47%; ລາຍຮັບຊັບສິນແຫ່ງລັດ 26,23 ຕື້ກີບ ທຽບໃສ່ແຜນປະຕິບັດໄດ້ 130,34% ທຽບໃສ່ປີ 2021 ເພີ່ມຂຶ້ນ 76% ແລະປະຕິບັດລາຍຈ່າຍ 382,44 ຕື້ກີບ ເທົ່າກັບ 99,13% ຂອງແຜນການປີ.
ຂ່າວ-ພາບ: ສັນຍາ

แชร์