ເຊກອງ ວາງສີລາລຶກໂຄງການກໍ່ສ້າງສູນບຳບັດຜູ້ຕິດຢາເສບຕິດ

ໃນວັນທີ 9 ກຸມພາ 2023 ທີ່ບ້ານທົ່ງຫວາຍ ເມືອງທ່າແຕງ ແຂວງເຊກອງ ຈັດພິທີ ວາງສີລາລຶກໂຄງການກໍ່ສ້າງສູນບຳບັດຜູ້ຕິດຢາເສບຕິດ ແຂວງເຊກອງ ໂດຍການເຂົ້າຮ່ວມຂອງທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ,ມີທ່ານ ເຫຼັກໄຫຼລ ສີວິໄລ ເຈົ້າແຂວງໆເຊກອງ, ມີບັນດາທ່ານຫົວໜ້າກົມ, ຮອງກົມກະຊວງປ້ອງກັນຄວາມສະຫງົບ,ບັນດາທ່ານຄະນະປະຈຳພັກແຂວງ, ກຳມະການພັກແຂວງ, ເຈົ້າເມືອງທ່າແຕງ, ຫົວໜ້າ-ຮອງຫົວໜ້າພະແນກ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ພັນເອກ ທະວີສັກ ເພັດພູຫຼວງ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງເຊກອງ ໄດ້ລາຍງານຫຍໍ້ການກໍ່ສ້າງສູນຟື້ນຟູປິ່ນປົວສຸຂະພາບຜູ້ຕິດຢາເສບຕິດໃຫ້ຮູ້ວ່າ: ສູນບຳບັດແຫ່ງດັ່ງກ່າວນີ້ມີເນື້ອທີ່ທັງໝົດ 21.363 ຕາແມັດ, ປະກອບມີ 7 ຕຶກອາຄານ, ຊຶ່ງສາມາດຮອງຮັບ ແລະ ບັນຈຸຜູ້ຕິດຢາເສບຕິດໄດ້ປະມານ 500 ຄົນ. ໃນໄລຍະຜ່ານທາງການນຳຂອງແຂວງໄດ້ໃຫ້ທຶນການກໍ່ສ້າງ ແລະ ສ້ອມແປງໃນ ຈຳນວນ 500 ຮ້ອຍລ້ານກີບ ຊຶ່ງໃນນີ້ ທາງ ປກສ ແຂວງໄດ້ມອບໃຫ້ບັນດາ ບໍລິສັດ ເປັນຜູ້ເໝົາກໍ່ສ້າງຄື: ບໍລິສັດ ຈັນສີປະເສີດ ຮັບເໝົາກໍ່ສ້າງອ່າງເກັບນ້ຳສະໂຕໂລນ້ຳ ສຳເລັດ 100% ໃນມູນຄ່າ 135 ລ້ານກວ່າກີບ, ບໍລິສັດ ຈະເລີນຮ່ວມພັດທະນາ ຮັບເໝົາກໍ່ສ້າງຕາຂ່າຍໄຟຟ້າ 22 KV( ກິໂລໂວນ) ທັບ 0,4 KV( ກິໂລໂວນ) ແລະ ຕິດຕັ້ງໝໍ້ແບ່ງ 3P100 KVA ( 3 ເຟດ 100 ກິໂລໂວນແອມ) ສຳເລັດ 38,7% ໃນມູນຄ່າ 137 ລ້ານກວ່າກີບ, ສ່ວນວຽກງານທີ່ຍັງບໍ່ທັນສຳເລັດແມ່ນການຕິດຕັ້ງໄຟຟ້າເຂົ້າໃນອາຄານ, ໃນມູນຄ່າ 217 ລ້ານກວ່າກີບ ເທົ່າກັບ 61,3%. ເພື່ອສືບຕໍ່ການຈັດຕັ້ງປະຕິບັດຕໍ່ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ມີປະສິດຕິພາບສູງໂດຍຄຽງຄູ່ກັບການກໍ່ສ້າງສູນບຳບັດຟື້ນຟູຮັກສາສຸຂະພາບຂອງຜູ້ຕິດຢາເສບຕິດໂດຍໄວ. ສະນັ້ນ, ການນໍາຂອງກະຊວງປ້ອງກັນຄວາມສະຫງົບ, ຈຶ່ງໄດ້ລະດົມທຶນການຊ່ວຍເຫຼືອຈາກທຸກພາກສ່ວນ ເພື່ອປະກອບສ່ວນເຂົ້າໃນໂຄງການກໍ່ສ້າງສູນບາບັດແຫ່ງນີ້ໃນຈຳນວນ 2,5 ຕື້ກີບ. ໃນຈຳນວນເງິນດັ່ງກ່າວແມ່ນຈະໄດ້ນຳໃຊ້ເຂົ້າໃນການກໍ່ສ້າງບັນດາອາຄານມີຄື: ຕຶກ A ໃນມູນຄ່າ 368 ລ້ານກວ່າກີບ, ຕຶກ B ໃນມູນຄ່າ 743 ລ້ານກວ່າກີບ, ຕຶກ G ໃນມູນຄ່າ 1 ຕື້ກວ່າກີບ, ຮົ້ວອ້ອມໜາມໝາກຈັບ ມູນຄ່າ 201 ລ້ານກວ່າກີບ.

ໂອກາດນີ້, ທ່ານ ເຫຼັກໄຫຼລ ສີວິໄລ ເຈົ້າແຂວງໆເຊກອງ ໄດ້ມອບໃບຍ້ອງຍໍໃຫ້ບັນດາບໍລິສັດທີ່ປະກອບສ່ວນທຶນຮອນໃນການກໍ່ສ້າງສູນຄັ້ງນີ້, ຈາກນັ້ນກໍໄດ້ມີການຕັດແຖບຜ້າ, ວາງສີລາລຶກໂຄງການກໍ່ສ້າງສູນບຳບັດຟື້ນຟູປີ່ນປົວສຸຂະພາບຜູ້ຕິດຢາເສບຕິດແຂວງເຊກອງຢ່າງເປັນທາງການ.

แชร์