ປີ 2022 ມູນຄ່າການຄ້າລາວ ແລະ ສ ເກົາຫຼີ ປະຕິບັດໄດ້ 85,7 ລ້ານໂດລາ

ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະການຄ້າ(ອຄ)ໄດ້ຕ້ອນຮັບທ່ານຈອງ ຢອງ ຊູ(JUNG Yung Soo)ເອກອັກຄະລັດຖະທູດ ແຫ່ງ ສເກົາຫຼີ ປະຈໍາ ສປປ ລາວເຂົ້າຢ້ຽມພົບປະໃນວັນທີ 9 ກຸມພາ 2023 ທີ່ກະຊວງອຄ, ຈຸດປະສົງໃນການພົບປະຄັ້ງນີ້ແມ່ນເນື່ອງໃນໂອກາດທ່ານທູດມາດໍາລົງຕໍາແໜ່ງເປັນເອກອັກຄະລັດຖະທູດ ສເກົາຫຼີ ຄົນໃໝ່ປະຈໍາລາວ ແລະ ເພື່ອແລກປ່ຽນນະໂຍບາຍດ້ານການພັດທະນາເສດຖະກິດ, ດຶງດູດການລົງທຶນ ແລະການອໍານວຍຄວາມສະດວກດ້ານທຸລະກິດ ແລະການລົງທຶນຂອງ ສປປ ລາວ.

ໃນໂອກາດດັ່ງກ່າວທ່ານລັດຖະມົນຕີກະຊວງ ອຄ ແລະທ່ານທູດສເກົາຫຼີ ໄດ້ທົບທວນການຮ່ວມມືທີ່ຜ່ານມາໂດຍສະເພາະໃນປີ 2022 ມູນຄ່າການຄ້າສອງຝ່າຍ ລາວ ແລະ ສເກົາຫຼີ ສາມາດປະຕິບັດໄດ້ 85,7 ລ້ານໂດລາ. ໃນນັ້ນ, ມູນຄ່າການນໍາເຂົ້າປະຕິບັດໄດ້ 64,5 ລ້ານໂດລາ ແລະ ມູນຄ່າການສົ່ງອອກປະຕິບັດໄດ້ 21,1 ລ້ານໂດລາ.ສິນຄ້າຫຼັກ ທີ່ ສປປ ລາວ ນໍາເຂົ້າ ຈາກ ສເກົາຫຼີ ໃນປີ 2022 ປະກອບມີ:ພາຫະນະທາງບົກ (ນອກຈາກລົດຈັກ,ລົດໄຖ); ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້), ເສັ້ນໄຍຍາວສັງເຄາະ, ເສັ້ນໄຍສັງເຄາະ, ເຄື່ອງນຸ່ງຫົ່ມ,ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຂົ້າ, ກາກ ແລະ ສິ່ງເສດເຫຼືອຈາກອຸດສາຫະກຳຜະລິດອາຫານ ແລະ ສິນຄ້າ ອຶ່ນໆ, ສິນຄ້າຫຼັກ ທີ່ ສປປ ລາວ ສົ່ງອອກໄປ ສເກົາຫຼີ ໃນປີ 2022 ປະກອບມີ: ເຄື່ອງມື ແລະ ອຸປະກອນທັດສະນະສາດ, ເກືອກາລີ, ຖ່ານດຳ, ຖ່ານຂາວ, ເກີບ, ເຄື່ອງຫຼິ້ນກິລາ, ເຄື່ອງນຸ່ງຫົ່ມ, ກາເຟ (ບໍ່ທັນໄດ້ປຸງແຕ່ງ), ຜະລິດຕະພັນທາງເຄມີ ແລະ ສິນຄ້າອື່ນໆ.

ໂອກາດນີ້ທ່ານລັດຖະມົນຕີ ໄດ້ສະເໜີເພື່ອຊຸກຍູ້ການຮ່ວມມືສອງຝ່າຍ, ປັດຈຸບັນ ສປປ ລາວ ກໍາລັງ ປະເຊີນກັບໄລຍະເວລາທີ່ມີຄວາມຫຍຸ້ງຍາກ ແລະ ທ້າທາຍຫຼາຍທາງດ້ານເສດຖະກິດ ແລະການເງິນຊຶ່ງກໍເປັນບັນຫາທີ່ຫຼາຍປະເທດກໍາລັງປະເຊີນຢູ່ເນື່ອງຈາກບັນຫາຄວາມບໍ່ມີສະຖຽນລະພາບແລະຄວາມຂັດແຍ່ງດ້ານເສດຖະກິດ-ການເມືອງ, ການປ່ຽນແປງຂອງລາຄານໍ້າມັນ, ການຜັນຜວນດ້ານການເງິນ-ເງິນຕາ ພາຍຫຼັງການລະບາດຂອງເຊື້ອພະຍາດ ໂຄວິດ-19 ຊຶ່ງບັນຫາເຫຼົ່ານີ້ ລ້ວນແຕ່ເປັນສິ່ງທ້າທາຍ ແລະ ເພີ່ມທະວີກະທົບຕໍ່ການພັດທະນາ ແລະການຂະຫຍາຍຕົວທາງດ້ານເສດຖະກິດ ແລະກະທົບຕໍ່ຊີວິດການເປັນຢູ່ຂອງປະຊາຊົນຢ່າງໜັກ, ສະນັ້ນສະເໜີ ສເກົາຫຼີ ຊ່ວຍຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດເວົ້າລວມ, ເວົ້າສະເພາະແຜນພັດທະນາອຸດສາຫະກຳປຸງແຕ່ງ ແລະການຄ້າ ໂດຍສະເພາະບັນດາແຜນງານ ແລະ ໂຄງການຈຸດສຸມທີ່ເປັນບຸລິມະສິດໃນການພັດທະນາ ແລະສົ່ງເສີມການຄ້າ,ການສົ່ງເສີມວິສາຫະກິດຂະໜາດນ້ອຍ ແລະ ກາງ ໃນການເຂົ້າຫາແຫຼ່ງທຶນ, ການວາງສະແດງສິນຄ້າໃນລະດັບພາກພື້ນ ແລະສາກົນການພັດທະນາຊັບພະຍາກອນມະນຸດ-ເຕັກນິກວິຊາການ ແລະອື່ນໆ.
(ຂ່າວ-ພາບ:ສຳນານ)

แชร์