ຮອງນາຍົກເນັ້ນໃຫ້ ຮສສ ເພີ່ມທະວີຄວາມເປັນເຈົ້າການເສີມຂະຫຍາຍຫົວຄິດປະດິດສ້າງອັນໃໝ່

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ໂອ້ລົມຕໍ່ກອງປະຊຸມແຮງງານ ແລະ ສະຫວັດດີການສັງຄົມ ທົ່ວປະເທດ ປະຈໍາປີ 2022 ໃນວັນທີ 10 ກຸມພາ 2023 ໂດຍເນັ້ນບາງຈຸດໃຫ້ຄະນະນໍາ ແລະ ພະນັກງານຫຼັກແຫຼ່ງ ຂອງຂະແໜງ ກະຊວງແຮງງານ ແລະ ສະຫວັດດີການສັງຄົມ ເອົາໃຈໃສ່ຕື່ມ ເພື່ອປັບປຸງແກ້ໄຂໃນຕໍ່ໜ້າ ເປັນຕົ້ນ ນະໂຍບາຍຂົງເຂດແຮງງານ ແລະ ສະຫວັດດີການສັງຄົມ ຕ້ອງເພີ່ມທະວີຄວາມເປັນເຈົ້າການຢ່າງແທ້ຈິງ ເພື່ອເສີມຂະຫຍາຍຫົວຄິດປະດິດສ້າງອັນໃໝ່ ແນໃສ່ປັບປຸງ ແລະ ພັດທະນາວຽກແຮງງານ ແລະ ສະຫວັດດີການສັງຄົມ ໃຫ້ບຸກທະລຸຢ່າງແທ້ຈິງ.

ພ້ອມນີ້, ທ່ານຍັງໄດ້ເນັ້ນໃຫ້ສືບຕໍ່ເພີ່ມທະວີ ການສຶກສາອົບຮົມການເມືອງ-ແນວຄິດ ໃຫ້ພະນັກງານຂົງເຂດແຮງງານ ແລະ ສະຫວັດດີການສັງຄົມ ນັບແຕ່ສູນກາງ ແລະ ທ້ອງຖິ່ນ ໃຫ້ມີຄວາມຈົ່ງຮັກພັກດີ, ມີຄວາມຮັບຜິດຊອບຕໍ່ໜ້າທີ່ ທີ່ໄດ້ຮັບການມອບໝາຍ, ຖືເອົາຜົນປະໂຫຍດຂອງປະເທດຊາດເປັນກົກ, ເດັດດ່ຽວແກ້ໄຂບັນຫາການເສື່ອມຖອຍດ້ານມານະຈິດປະຕິວັດ, ສ້າງການຫັນປ່ຽນດ້ວຍຕົນເອງ ພ້ອມກັນປັບປຸງວຽກຂົງເຂດແຮງງານ ແລະ ສະຫວັດດີການສັງຄົມໃຫ້ມີຄວາມເຂັ້ມແຂງກວ່າເກົ່າ, ປັບປຸງ ແລະ ເຮັດໃຫ້ກົງຈັກ ກະທັດຮັດ, ສົມເຫດສົມຜົນ ແລະ ມີປະສິດທິຜົນຕົວຈິງ, ຂະ ແໜງໜຶ່ງຮັບຜິດຊອບຫລາຍວຽກ, ວຽກໃດຄ້າຍກັນ ໃຫ້ໂຮມເຂົ້າກັນ ເຮັດໃຫ້ຂະໜາດຂອງກົງຈັກ ບໍ່ໃຫຍ່ໂຕ, ການຈັດຕັ້ງມີຄວາມໜັກແໜ້ນ, ເຂັ້ມແຂງ, ລັດຖະກອນຕ້ອງເຮັດວຽກໃຫ້ໄດ້ຫລາຍ, ໃຫ້ດີ, ວ່ອງໄວ ແລະ ທັນການ ຖືກຕ້ອງຕາມກົດໝາຍ, ສົ່ງເສີມໃຫ້ພະນັກງານຜູ້ມີຫົວຄິດປະດິດສ້າງ, ມີແນວຄິດກ້າວໜ້າ, ມີຄວາມຮັບຜິດຊອບຕໍ່ໜ້າທີ່ວຽກງານ ພ້ອມກັນແຂ່ງຂັນສ້າງຜົນງານໃຫ້ເປັນຂະບວນການຢ່າງຟົດຟື້ນ; ສືບຕໍ່ປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ທີ່ຕິດພັນກັບຂົງເຂດແຮງງານ ແລະ ສະຫວັດດີການສັງຄົມ ເຊິ່ງການນຳແຕ່ລະຂັ້ນ ຕ້ອງເຂົ້າໃຈ ແລະ ມີທັດສະນະທີ່ຖືກຕ້ອງ, ເດັດດ່ຽວ ກ້າເບິ່ງບັນຫາຢ່າງກົງໄປກົງມາ ແລະ ແກ້ໄຂບັນຫາຢ່າງພາວະວິໄສ ໂດຍໃຊ້ມາດຕະການທີ່ເຂັ້ມງວດ ແລະ ເດັດຂາດ.

ສຳລັບຂະແໜງແຮງງານ ແລະ ສະຫວັດດີການສັງຄົມ ຈະຕ້ອງສຸມໃສ່ພັດທະນາກໍາລັງແຮງງານໃຫ້ມີສີມື, ມີຄວາມຫລາກຫລາຍວິຊາຊີບ, ມີຄວາມ ຊໍານານງານ, ມີລະບຽບວິໄນ ເພື່ອສະໜອງຄວາມຕ້ອງການຕົວຈິງຂອງຕະຫລາດແຮງງານ ແລະ ບັນດາໂຄງການລົງທຶນຕ່າງປະເທດ, ມີວຽກເຮັດງານທໍາທີ່ໝັ້ນທ່ຽງ ແລະ ມີລາຍໄດ້ສູງຂຶ້ນ, ເລັ່ງລັດຮ່ວມມືກັບພາກທຸລະກິດ ພັດທະນາລະບົບຖານຂໍ້ມູນຂ່າວສານຕະຫລາດແຮງງານ ຕາມຄຳສັ່ງເລກທີ 18/ນຍ ໃຫ້ມີຄວາມເຂັ້ມແຂງ ແລະ ເປັນລະບົບ, ສາມາດສະໜອງຂໍ້ມູນໃນການດັດສົມກໍາລັງແຮງງານ, ໃນການຈັດຫາວຽກເຮັດງານທໍາໃຫ້ສົມສ່ວນກັບຄວາມຕ້ອງການຂອງຕະຫລາດແຮງງານ ທັງສາມາດເຊື່ອມໂຍງຂໍ້ມູນແຮງງານໃຫ້ຂະແໜງການເງິນເກັບອາກອນລາຍໄດ້ໃຫ້ຄົບຖ້ວນ, ຕັ້ງໜ້າຈັດຕັ້ງຜັນຂະຫຍາຍຍຸດທະສາດສົ່ງເສີມການມີວຽກເຮັດງານທໍາໃນຊົນນະບົດ, ຍົກສູງຜະລິດຕະພາບແຮງງານ ແລະ ມີລາຍຮັບໃຫ້ສູງຂຶ້ນ ໂດຍຕິດພັນກັບການສ້າງກຸ່ມການຜະລິດ, ສະຫະກອນ, ການຜະລິດກະສິກໍາ, ຫັດຖະກໍາ, ຜະລິດຕະພັນໃຊ້ສອຍ, ສະບຽງອາຫານ, ທຸລະກິດຂະໜາດນ້ອຍ, ການບໍລິການ ແລະ ການທ່ອງທ່ຽວທໍາມະຊາດເພື່ອໃຫ້ແຮງງານໃນຊົນນະບົດໄດ້ຮັບການພັດທະນາຢ່າງຕໍ່ເນື່ອງ ທັງເປັນການແກ້ໄຂແຮງງານເຮັດວຽກຕາມລະດູການ, ແຮງງານເຮັດວຽກ ເພື່ອຊົມໃຊ້ໃນຄົວເຮືອນ, ແຮງງານເຄື່ອນຍ້າຍຈາກຊົນນະບົດເຂົ້າສູ່ຕົວເມືອງ ແລະ ແຮງງານທີ່ຈະຫລັ່ງໄຫລໄປຕ່າງປະເທດ; ສືບຕໍ່ສ້າງຄວາມເຂັ້ມແຂງໃຫ້ແກ່ອົງການສາມຝ່າຍໃນການສົ່ງເສີມສາຍພົວພັນແຮງງານ ເພື່ອປົກປ້ອງສິດຜົນປະໂຫຍດ ຂອງຜູ້ໃຊ້ແຮງງານ ແລະ ຜູ້ອອກແຮງງານ ໃຫ້ຖືກຕ້ອງຕາມກົດໝາຍ ແລະ ລະບຽບການ, ປັບປຸງລະບົບການແກ້ໄຂຂໍ້ຂັດແຍ່ງແຮງງານ ແລະການປົກປ້ອງສິດຜົນປະໂຫຍດຂອງກຸ່ມແຮງງານທີ່ມີຄວາມສ່ຽງ ໃຫ້ມີຄວາມສະເໝີພາບໃນການເຮັດວຽກ ແລະ ບໍ່ຈຳແນກ ໃນສະຖານທີ່ເຮັດວຽກ, ຄຸ້ມຄອງແຮງງານລາວທີ່ເຮັດວຽກຢູ່ຕ່າງປະເທດ ແລະ ແຮງງານຕ່າງປະເທດທີ່ເຮັດວຽກຢູ່ ລາວ ຕາມຄວາມຕ້ອງການຂອງສາຂາອາຊີບ ທີ່ຈຳເປັນ ໂດຍໃຫ້ປະຕິບັດພັນທະຕ່າງໆໃຫ້ລັດ ຢ່າງຖືກຕ້ອງ, ຫລຸດຜ່ອນການຍາດວຽກເຮັດງານທໍາຂອງແຮງງານລາວ; ພັດທະນາ ແລະ ສ້າງຄວາມເຂັ້ມແຂງໃຫ້ແກ່ລະບົບປົກປ້ອງສັງຄົມໃຫ້ມີປະສິດທິຜົນດີຂຶ້ນ ດ້ວຍການພັດທະນາລະບົບປະກັນສັງຄົມໃຫ້ມີຄວາມເຂັ້ມແຂງ ແລະ ມີປະສິດທິພາບ ສາມາດໃຫ້ຜູ້ອອກແຮງງານ ທັງໃນ ແລະນອກລະບົບເຂົ້າເຖິງການປະກັນຕົນຢ່າງກວ້າງຂວາງ ແລະ ມີປະສິດທິຜົນກວ່າເກົ່າ ພ້ອມທັງປັບປຸງກົນໄກການຄຸ້ມຄອງ ແລະການບໍລິຫານກອງທຶນປະກັນສັງຄົມແຫ່ງຊາດໃຫ້ມີຄວາມຍືນຍົງ, ຕອບສະໜອງການບໍລິການທີ່ມີຄຸນນະພາບ ແລະ ວ່ອງໄວ, ໃນປີ 2023 ນີ້ ໃຫ້ສຸມໃສ່ສ້າງ ແລະ ປັບປຸງກົດໝາຍ, ນິຕິກໍາໃຕ້ກົດໝາຍ ເພື່ອເປັນເຄື່ອງ ມືນໍາໃຊ້ເຂົ້າໃນການບໍລິຫານວຽກແຮງງານ ແລະ ສະຫວັດດີການສັງຄົມ ໃຫ້ມີຄວາມສັກສິດ; ເອົາໃຈ ໃສ່ຈັດຕັ້ງຜັນຂະຫຍາຍນະໂຍບາຍ ແລະ ສ້າງແຜນຍຸດທະສາດ ໃນການວາງແຜນພັດທະນາວຽກແຮງງານ ແລະ ສະຫວັດດີການສັງຄົມ ລະຫວ່າງສູນກາງ ແລະທ້ອງຖິ່ນ ໃຫ້ມີຄວາມກົມກຽວກັນ ແລະມີການແບ່ງຂັ້ນຄຸ້ມຄອງໃຫ້ຄ່ອງຕົວກວ່າເກົ່າ ແລະບັນຫາສຳຄັນອື່ນໆ.

ໂອກາດນີ້, ທ່ານຮອງນາຍົກລັດຖະມົນຕີຍັງໄດ້ຮຽກຮ້ອງມາຍັງຄະນະນຳ ແລະພະນັກງານຫລັກແຫລ່ງຂອງຂະແໜງແຮງງານ ແລະ ສະຫວັດດີການສັງຄົມຕ້ອງໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ເພີ່ມທະວີຄວາມເຂັ້ມແຂງ ແລະໜັກແໜ້ນ, ຍົກສູງຈິດໃຈຮັກຊາດ, ຍອມເສຍສະຫລະເພື່ອສ່ວນລວມ, ຊື່ສັດບໍລິສຸດ, ພ້ອມກັນ ຈັດຕັ້ງປະຕິບັດບັນດາມາດຕະການຕ່າງໆ ທີ່ກຳນົດໄວ້ຢ່າງຈິງຈັງ ແລະໃຫ້ຖືເປັນສະໜາມຮົບເພື່ອມີວິທີການຕອບໂຕ້ບັນຫາທີ່ປະເທດເຮົາກໍາລັງປະເຊີນຢູ່ໃນປັດຈຸບັນ, ຕ້ອງສ້າງບາດລ້ຽວເພື່ອສຸມກໍາລັງແຮງ, ມັນສະໝອງ, ຮ່ວມຈິດຮ່ວມໃຈສາມັກຄີເປັນນໍ້າໜຶ່ງໃຈດຽວກັນເຂົ້າໃນການປັບປຸງວຽກແຮງງານ ແລະ ສະຫວັດດີການສັງຄົມໃຫ້ເຕີບໃຫຍ່ເຂັ້ມແຂງໃຫ້ມີຜົນສໍາເລັດໃໝ່ຢ່າງເປັນຮູບປະທໍາ.
ຂປລ. ພາບ, ຂ່າວ: ມະນີທອນ, ຂັນໄຊ

แชร์