ກອງປະຊຸມສະພາບໍລິຫານທະນາຄານແຫ່ງ ສປປ ລາວ ຄັ້ງທີ I ປະຈຳປີ 2023

ເພື່ອເປັນການຜັນຂະຫຍາຍແຜນພັດທະນາເສດຖະກິດ-ສັງຄົມ ແລະວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ບັນລຸບັນດາຄາດໝາຍກຳນົດໄວ້ ໃນຕອນບ່າຍ ວັນທີ 10 ກຸມພາ 2023 ກອງປະຊຸມສະພາບໍລິຫານ ທະນາຄານແຫ່ງ ສປປ ລາວ (ທຫລ) ຄັ້ງທີ I ປະຈຳປີ 2023 ໄດ້ໄຂຂຶ້ນ ໂດຍອີງຕາມລະບອບປະຊຸມສະພາບໍລິຫານ ທຫລ, ພາຍໃຕ້ການເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທຫລ, ປະທານສະພາບໍລິຫານ ທຫລ, ພ້ອມດ້ວຍການເຂົ້າຮ່ວມຂອງສະມາຊິກສະພາບໍລິຫານ ທຫລ.

ກອງປະຊຸມໃນຄັ້ງນີ້ໄດ້ໄຂຂຶ້ນເພື່ອເປັນການສະຫຼຸບ-ຕີລາຄາຜົນການເຄື່ອນໄຫວວຽກງານທະນາຄານແຫ່ງ ສປປ ລາວ ປະຈໍາປີ 2022 ແລະ ກໍານົດທິດທາງແຜນການແລະ ວຽກງານຈຸດສຸມປະຈຳປີ 2023 ເຊິ່ງບັນດາວຽກຈຸດສຸມສຳຄັນຂອງທະນາຄານແຫ່ງ ສປປ ລາວທີ່ນຳເຂົ້າພິຈາລະນາໃນກອງປະຊຸມມີຄື: 1) ລາຍງານເຄື່ອນໄຫວວຽກງານພົ້ນເດັ່ນໂດຍສັງເຂບຂອງ ທຫລ ປະຈຳປີ 2022 ແລະ ທິດທາງແຜນການປະຈໍາປີ 2023; 2) ລາຍງານການຈັດຕັ້ງປະຕິບັດແຜນເງິນຕາຂອງ ທຫລ ປະຈໍາປີ 2022 ແລະ ທິດທາງແຜນການປະຈຳປີ 2023; 3) ລາຍງານການຈັດຕັ້ງປະຕິບັດແຜນງົບປະມານຂອງ ທຫລ ປະຈໍາປີ 2022 ແລະແຜນງົບປະມານ ປະຈໍາປີ 2023 ແລະ 4) ລາຍງານແຜນຮັບພະນັກງານໃໝ່ໃນປີ 2023 ແລະວຽກສໍາຄັນອີກຈໍານວນໜຶ່ງ.

ກອງປະຊຸມໄດ້ດຳເນີນມາເປັນເວລາເຄິ່ງວັນດ້ວຍບັນຍາກາດຟົດຟື້ນ ແລະເຄັ່ງຮ້ອນ ຊຶ່ງໄດ້ຮັບຮອງເອົາບັນຫາສຳຄັນຈຳນວນໜຶ່ງຕາມວາລະກອງປະຊຸມ. ຜູ້ເຂົ້າຮ່ວມໄດ້ເອົາໃຈໃສ່ໃນການຄົ້ນຄວ້າປະກອບຄຳຄິດ-ຄຳເຫັນແຕ່ລະດ້ານຢ່າງລະອຽດ-ກົງໄປກົງມາ ແລະໃຫ້ທັດສະນະໄປໃນທາງສ້າງສັນເຮັດໃຫ້ກອງປະຊຸມໃນມື້ນີ້ບັນລຸໝາກຜົນຕາມຄາດໝາຍທີ່ກຳນົດໄວ້.

แชร์