ປີ 2023 ແຂວງບໍ່ແກ້ວວາງຄາດໝາຍຈະສູ້ຊົນເຮັດໃຫ້ເສດຖະກິດຂະຫຍາຍຕົວໃນລະດັບ 5,3%

ເພື່ອສືບຕໍ່ເຮັດໃຫ້ການຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກແຂວງ ຄັ້ງທີ VI, ແຜນພັດທະນາ 5 ປີ ຄັ້ງທີ 9 ແລະວາລະແຫ່ງຊາດໃຫ້ບັນລຸຕາມຄາດໝາຍທີວາງໄວ້ສ້າງເປັນກໍາລັງແຮງຍູ້ດັນໃຫ້ມີບາດກ້າວບຸກທະລຸທາງດ້ານແຜນພັດທະນາເສດຖະກິດ-ສັງຄົມ ເຮັດໃຫ້ເສດຖະກິດຂອງແຂວງບໍ່ແກ້ວມີການຂະຫຍາຍຕົວຢ່າງຕໍ່ເນື່ອງ,ໝັ້ນທ່ຽງ ແລະຍືນຍົງ; ຕ້ອງໄດ້ສຸມໃສ່ຈັດຕັ້ງປະຕິບັດ 5 ວຽກຈຸດສຸມ ໃນການແກ້ໄຂຄວາມຫຍຸ້ງຍາກແນໃສ່ເຮັດໃຫ້ເສດຖະກິດຂະຫຍາຍຕົວໃນລະດັບ 5,3% ການຈັດເກັບລາຍຮັບເຂົ້າງົບປະມານ ປະຈຳປີ 2023 ໃຫ້ບັນລຸໄດ້ 466,43 ຕື້ກີບ, ໃນນີ້ ລາຍຮັບຂອງແຂວງໃຫ້ໄດ້ 156,43 ຕື້ກີບ; ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງງົບປະມານແຫ່ງລັດຍົກລະດັບຄວາມສາມາດຂອງພະນັກງານໃນການຄຸ້ມຄອງຈັດເກັບລາຍຮັບຢ່າງເປັນລະບົບ, ຮັດກຸມ ແລະ ສາມາດກວດສອບໄດ້, ປັບປຸງຂັ້ນຕອນການອະນຸມັດການລົງທຶນ, ການນຳເຂົ້າ, ການສົ່ງອອກ ແລະ ການເຄື່ອນໄຫວທຸລະກິດຕ່າງໆ ໂດຍຜ່ານປະຕູດຽວໃຫ້ຖືກຕ້ອງຕາມລະບຽບກົດໝາຍ, ໂປ່ງໃສ ວ່ອງໄວ ແລະ ມີປະສິດທິຜົນ ລວມທັງການແບ່ງຂັ້ນຄຸ້ມຄອງຕາມທິດ 3 ສ້າງ ໂດຍໃຫ້ອົງການປົກຄອງ ແລະຂະແໜງການກ່ຽວຂ້ອງສ້າງແຜນລະອຽດ ແລະ ຈັດຕັ້ງປະຕິບັດໃຫ້ໄດ້ຮັບຜົນດີ; ຊີ້ນຳການຈັດຕັ້ງປະຕິບັດໂຄງການລົງທຶນຂອງລັດ, ຂອງເອກະຊົນພາຍໃນ ແລະ ຕ່າງປະເທດ ນັບທັງໂຄງການທຶນຊ່ວຍເຫຼືອລ້າ, ກູ້ຢືມຕ່າງໆໃຫ້ມີປະ ສິດທິພາບ ແລະມີຜົນສຳເລັດ; ສືບຕໍ່ຊີ້ນຳການສ້ອມແປງເສັ້ນທາງຫຼວງແຫ່ງຊາດ ທາງຫຼວງຂອງແຂວງ, ທາງຫຼວງທ້ອງຖິ່ນ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ທັງກຽມພ້ອມຮັບມືຜົນກະທົບຈາກໄພພິບັດທີ່ອາດເກີດຂຶ້ນເພື່ອຮັບປະກັນການຄົມມະນາຄົມຂົນສົ່ງຕ່າງໆ. ຊຸກຍູ້ການຈັດຕັ້ງປະຕິບັດໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນໍ້າຂອງ,ໂຄງການກໍ່ສ້າງທາງດ່ວນແຕ່ບໍ່ເຕ່ນ ແຂວງຫຼວງນໍ້າທາ ຫາ ແຂວງບໍ່ແກ້ວ. ເອົາໃຈໃສ່ໃນການສະໜອງນໍ້າປະປາໃຫ້ແກ່ສັງຄົມໃນຕົວເມືອງກໍຄືຈຸດສຸມຊຸມຊົນຕ່າງໆ ໃຫ້ພຽງພໍສືບຕໍ່ຊຸກຍູ້ການຈັດຕັ້ງປະຕິບັດແຜນງານໂຄງການຮັບປະກັນສະບຽງອາຫານດ້ວຍການສົ່ງເສີມການປູກ ການລ້ຽງ, ການປຸງແຕ່ງ, ຕະຫຼາດຈຳໜ່າຍໃຫ້ມີການຂະຫຍາຍຕົວຢ່າງເຂັ້ມແຂງໂດຍສະເພາະແມ່ນການນໍາໃຊ້ກົນຈັກ, ເຕັກນິກວິຊາການເຂົ້າໃນການຜະລິດສິນຄ້າ; ການຄຸ້ມຄອງລາຄາສິນຄ້າໃຫ້ມີຄວາມໝັ້ນທ່ຽງຕິດພັນການການຊຸກຍູ້, ສົ່ງເສີມການຜະລິດເປັນສີນຄ້າສົ່ງອອກ ແລະຄຸ້ມຄອງການນໍາເຂົ້າສິນຄ້າຈາກຕ່າງປະເທດຢ່າງມີແຜນການເປັນລະບົບ; ປັບປຸງຂັ້ນຂອດໃນການອອກໃບທະບຽນວິສາຫະກິດໃຫ້ວ່ອງໄວ ແລະ ສົ່ງເສີມຫົວໜ່ວຍທຸລະກິດຂະໜາດນ້ອຍ, ຂະໜາດກາງໃຫ້ຂະຫຍາຍຕົວຢ່າງແຂງແຮງ; ສືບຕໍ່ຂະຫຍາຍຕາໜ່າງໄປສະນີ, ໂທລະຄົມມະນາຄົມໄປສູ່ເຂດຊົນນະບົດຫ່າງໄກສອກຫຼີກ, ເຮັດໃຫ້ປະຊາຊົນບັນດາເຜົ່າ ໄດ້ນໍາໃຊ້ເຄືອຂ່າຍໂທລະສັບ, ອິນເຕີເນັດຕ່າງໆທີ່ທັນສະໄໝຢ່າງທົ່ວເຖິງ; ເພີ່ມທະວີຄວາມເຂັ້ມງວດ ແລະ ຄວາມສັກສິດໃນການຄຸ້ມຄອງນໍາໃຊ້ຊັບພະຍາ ກອນທຳມະຊາດ ຕາມທິດທີ່ຍືນຍົງ, ສຸມໃສ່ສຳຫຼວດວັດແທກ, ຈັດສັນ, ວາງແຜນນໍາໃຊ້ທີທີ່ດິນແຕ່ລະປະເພດ ແລະ ການປົກປັກຮັກສາສິ່ງແວດລ້ອມໃນໂຄງການລົງທຶນຕ່າງໆ ໃຫ້ຖືກຕ້ອງຕາມກົດໝາຍ, ສືບຕໍ່ຈັດຕັ້ງປະຕິບັດໂຄງການກໍ່ສ້າງສ້ອມແປງຕາຂ່າຍໄຟຟ້າໄປຫາຊົນນະບົດຫ່າງໄກສອກຫຼີກ.

ເພື່ອເຮັດໃຫ້ແຜນວຽກປະຈຳປີ 2023 ກໍ່ຄືແຜນດຳເນີນງານຂອງຄະນະບໍລິຫານງານພັກແຂວງໄດ້ຮັບການຈັດຕັ້ງປະຕິບັດຢ່າງມີປະສິດທິຜົນນັ້ນ, ຄະນະພັກທຸກຂັ້ນ ຕ້ອງເປັນເຈົ້າການຈັດຕັ້ງເຜີຍ¬ແຜ່ທິດທາງແຜນການກໍ່ຄືເນື້ອໃນກອງປະຊຸມໃນຄັ້ງນີ້ ແລະມະຕິ, ຄຳສັ່ງ ຂອງພັກ-ລັດໃນແຕ່ລະໄລຍະໃຫ້ສະມາຊິກພັກ,ພະນັກງານລັດຖະກອນ,ທະຫານ,ຕຳຫຼວດ,ປະຊາຊົນໄດ້ຮັບຮູ້ເຂົ້າໃຈກຳແໜ້ນຢ່າງເລິກເຊິ່ງທົ່ວເຖິງ.ໂດຍສະເພາະແມ່ນຄະນະພັກແຕ່ລະຂັ້ນຕ້ອງເອົາໃຈໃສ່ຫັນທິດທາງແຜນການຄາດໝາຍລວມເປັນແຜນດຳເນີນງານ,ເປັນແຜນການນຳພາເຄື່ອນໄຫວວຽກງານດ້ວຍຄວາມຮັບຜິດຊອບສູງມີຄວາມເອກກະພາບແບ່ງງານແບ່ງຄວາມຮັບຜິດຊອບໃຫ້ແຕ່ລະບຸກຄົນ ແລະມີການຕິດຕາມກວດກາໃນຈັດຕັ້ງປະຕິບັດແຕ່ລະໄລຍະຢ່າງເຂັ້ມງວດ.

ບົດຂ່າວ: ເງິນຫຼົງ ຈິດພູວົງ.

แชร์