ຮອງປະທານສູນກາງແນວລາວສ້າງຊາດມອບອຸປະກອນໄອທີ ໃຫ້ແກ່ເມືອງຮ້ຽມ ແລະເມືອງຊ່ອນແຂວງຫົວພັນ

ພາຍຫຼັງທີ່ໄດ້ເຮັດວຽກຢູ່ແຂວງຊຽງຂວາງ ເພື່ອເປັນການສືບຕໍ່ປຸກລະດົມ ແລະຊຸກຍູ້ວຽກງານການປ້ອງກັນ ແລະຄວບຄຸມພະຍາດໂຄວິດ -19 ແລະການໂຄສະນາປັບປຸງຊິວິດການເປັນຢູ່ຂອງແມ່ຍິງ ແລະເດັກ, ທ່ານ ເຍ່ຍເກີຢ່າ ໜໍ່ຈໍ່ຈົງຕົວ, ຮອງປະທານສູນກາງແນວລາວສ້າງຊາດ ພ້ອມຄະນະໄດ້ລົງເຮັດວຽກທີ່ ເມືອງຮ້ຽມ ແຂວງ ຫົວພັນ ໃນວັນທີ 7 ກຸມພາ ປີ 2023.

ໃນໂອກາດມາເຮັດວຽກຢູ່ແຂວງຫົວພັນຄັ້ງນີ້, ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດໄດ້ນໍາເອົາອຸປະກອນໄອທີ 2 ຊຸດ ລວມມີ: ແລັບທອັບ, LCD project ພ້ອມດ້ວຍຈໍ ແລະ ຕູ້ລໍາໂພງເຄື່ອນທີ່ມູນຄ່າກວ່າ 44 ລ້ານກີບ ມາມອບໃຫ້ແນວລາວສ້າງຊາດ ເມືອງຮ້ຽມ ແລະເມືອງຊ່ອນ ແຂວງຫົວພັນ ເພື່ອນໍາໃຊ້ໃນໂຄງການສື່ສານຕ້ານຄວາມສ່ຽງ ແລະການມີສ່ວນຮ່ວມຂອງຊຸມຊົນ (RCCE) ເຊຶ່ງແມ່ນແມ່ນກິດຈະກໍາທີ່ດໍາເນີນການເພື່ອສົ່ງເສີມການສັກຢາວັກຊີນທັງສໍາລັບ Covid-19 ແລະການສັກຢາປ້ອງກັນປົກກະຕິ.

ເຂົ້າຮ່ວມໃນພິທີມອບ-ຮັບ ອຸປະກອນຄັ້ງນີ້ຍັງມີທ່ານ ວີເຕັງ ຈື່ໄມເຕັງ ຮອງປະທານແນວລາວສ້າງຊາດ ແຂວງຫົວພັນ, ທ່ານ ຄຳແພງ ແສງຄໍາສັນ ຮອງປະທານແນວລາວສ້າງຊາດເມືອງຮ້ຽມ, ທ່ານ ແສງຈັນ ຢ້າງນ້າວຊົວ ຮອງປະທານ ແນວລາວສ້າງຊາດ ເມືອງຊ່ອນ, ທ່ານ ຕະບອງເພັດ ພຸດທະວົງ, ຜູ້ຊ່ຽວຊານວຽກງານໂຄສະນາ ແລະ ສື່ສານມວນຊົນ ອົງການຢູນີເຊັບ ແລະ ຕາງຫນ້າພະແນກສາທາລະນະສຸກ ແຂວງຫົວພັນ ແລະ ພະນັກງານກ່ຽວຂ້ອງຈາກແຂວງ ແລະ ຈາກເມືອງກ່ຽວຂ້ອງ.
ໃນພິທີມອບ-ຮັບ, ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຍັງໄດ້ສະແດງຄວາມຂອບໃຈອົງການຢູນີເຊັບ, ລັດຖະບານອົດສະຕາລີ, USAID, ກອງທຶນສຸກເສີນຂອງອົງການ UNICEF ແລະອິຕາລີ. ທ່ານຍັງໄດ້ຊີ້ນໍາໃຫ້ພາກສ່ວນຕ່າງໆ ຈົ່ງນໍາໃຊ້ອຸປະກອນໃຫ້ຖືກເປົ້າຫມາຍ ແລະມີປະສິຕິຜົນສູງສຸດ.

ໃນພິທີມອບຮັບທ່ານ ຕະບອງເພັດ ພຸດທະວົງ, ຜູ້ຊ່ຽວຊານວຽກງານໂຄສະນາ ແລະ ສື່ສານມວນຊົນອົງການຢູນີເຊັບ ໄດ້ກ່າວຊົມເຊີຍຜົນສຳເລັດຂອງການໂຄສະນາ ວຽກງານການປ້ອງກັນ ແລະຄວບຄຸມພະຍາດໂຄວິດ-19 ແລະການໂຄສະນາປັບປຸງຊິວິດການເປັນຢູ່ຂອງແມ່ຍິງ ແລະ ເດັກ ໂດຍສະເພາະການສື່ສານຄວາມສ່ຽງ ແລະ ການມີສ່ວນຮ່ວມຂອງຊຸມຊົນ. ອົງການຢູນີເຊັບແມ່ນມີຄວາມຫມຸ້ງຫມັ້ນທີ່ຈະໃຫ້ການສະຫນັບສະຫນູນສູນກາງແນວລາວສ້າງຊາດໃນປັບປຸງຊີວິດການເປັນຢູ່ທີ່ດີຂອງແມ່ ແລະເດັກ ໃນ ສປປ ລາວ.

ໄລຍະຜ່ານມາຫ້ອງການແນວລາວສ້າງຊາດ ແຂວງຫົວພັນ ແລະເມືອງຊຽງຄໍ້າ ແຂວງຫົວພັນ ກໍ່ໄດ້ຮັບການສະຫນັບສະຫນູນດ້ານອຸປະກອນ ຕ່າງໆ ເຊັ່ນ: ຄອມພິວເຕີ, ແລັບທອບ, LCD projector, ລໍາໂພງເຄື່ອນທີ່ ແລະອື່ນໆ.

แชร์