ປະທານສະພາແຫ່ງຊາດ ເຮັດວຽກຮ່ວມກັບຄະນະພັກ-ອົງການປົກຄອງເມືອງເຟືອງ

ໃນວັນທີ 8 ກຸມພາ 2023 ນີ້,ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມຄະນະເຄື່ອນໄຫວຢ້ຽມຢາມ ແລະເຮັດວຽກຮ່ວມກັບຄະນະພັກ,ອົງການປົກຄອງ, ພະນັກງານຫລັກແຫລ່ງເມືອງເຟືອງ ແຂວງວຽງຈັນ ໂດຍມີທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ພ້ອມດ້ວຍການນໍາຂັ້ງນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານປະທານສະພາແຫ່ງຊາດ ໄດ້ມີຄໍາເຫັນເນັ້ນຕໍ່ຄະນະພັກ, ຄະນະນໍາຂອງເມືອງເຟືອງ ຄື: ຄະນະພັກ, ອົງການປົກຄອງເມືອງຈະຕ້ອງໄດ້ສືບຕໍ່ຍຶດໝັ້ນ ແລະເດັດດ່ຽວນໍາພາພາລະກິດປົກປັກຮັກສາທ້ອງຖິ່ນຂອງຕົນດ້ວຍການຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະເລິກເຊິ່ງ; ສ້າງ ແລະປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດ ໝາຍ; ເພີ່ມທະວີການນໍາພາ-ຊີ້ນໍາຂະແໜງການທີ່ກ່ຽວຂ້ອງ ຄົ້ນ ຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງເມືອງເພື່ອສຸມທຶນຮອນເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ: ການປູກເຂົ້າ, ພືດຜັກ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປູກຫຍ້າເພື່ອລ້ຽງສັດ, ການລ້ຽງສັດໃຫຍ່ເປັນສິນຄ້າ, ການລ້ຽງປາ ແລະອື່ນໆ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ, ສະຫະກອນແບບໃໝ່ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫລ່ງທຶນ ແລະການເຂົ້າເຖິງຕະຫລາດທີ່ມີປະສິດທິພາບເຊິ່ງຈະກາຍເປັນຖານລາຍຮັບງົບປະມານຂອງເມືອງໃນຕໍ່ໜ້າ; ເອົາໃຈໃສ່ນໍາພາຊີ້ນໍາ ໃນການປົກປັກຮັກສາແຫລ່ງທ່ອງທ່ຽວໃຫ້ຍືນຍົງ ແລະພັດທະນາຄຸນຄ່າຂອງແຫລ່ງທ່ອງທ່ຽວໃຫ້ຄົງຢູ່ຍາວນານຮອດເຊັ່ນລູກເຊັ່ນຫລານ.

ພ້ອມນັ້ນກໍເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວໂດຍສະເພາະການຜະລິດຫັດຖະກໍາ, ການປຸງແຕ່ງຜົນຜະລິດກະສິກໍາ ທີ່ມີການຫຸ້ມຫໍ່, ເປັນເອກະລັກຂອງເມືອງ ເພື່ອເປັນຂອງຕ້ອນຂອງຝາກແຂກຄົນທີ່ມາທ່ອງທ່ຽວເມືອງເຟືອງ; ເອົາໃຈໃສ່ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນໃຫ້ຮັບປະກັນດ້ານມາດຕະຖານ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາ, ສາມາດສ້າງວຽກເຮັດງານທໍາໃຫ້ແກ່ລູກຫລານ ທີ່ຮຽນຈົບວິຊາສະເພາະຂະແໜງ ຕ່າງໆ ໃຫ້ມີວຽກເຮັດງານທໍາ; ເພີ່ມທະວີຄວາມເອົາໃຈໃສ່ ໃນການສ້າງເງື່ອນໄຂໃຫ້ພໍ່ແມ່ປະຊາຊົນສາມາດເຂົ້າເຖິງການປິ່ນປົວຢ່າງກວ້າງຂວາງ, ສະດວກ ແລະ ມີປະສິດທິພາບ; ເອົາໃຈໃສ່ປັບປຸງໂຮງໝໍເມືອງ, ໂຮງໝໍນ້ອຍ ດ້ວຍການປະກອບອຸປະກອນ, ເຄື່ອງມືດ້ານການແພດ ທີ່ສາມາດຍົກສູງປະສິດສິພາບໃນການປິ່ນປົວໃຫ້ສູງຂຶ້ນ; ເພີ່ມຄວາມສາມາດໃນການເຝົ້າລະວັງຕິດຕາມ, ບົ່ງມະຕິ, ຊອກຄົ້ນຫາ ແລະ ໂຕ້ຕອບກໍລະນີພະຍາດລະບາດໃຫ້ໄດ້ໄວ; ມາຮອດປັດຈຸບັນ ສະພາບການລະບາດຂອງພະຍາດໂຄວິດ-19 ໄດ້ກັບຄືນສູ່ປົກກະຕິແລ້ວຈຶ່ງມີຄວາມຈໍາເປັນໃນການຊຸກຍູ້ການຮຽນຂອງລູກຫລານ, ປັບປຸງຄຸນນະພາບການສຶກສາໃຫ້ສູງຂຶ້ນ, ເອົາໃຈໃສ່ການສ້າງ ແລະ ສ້ອມ ແປງໂຮງຮຽນ ເພື່ອອໍານວຍຄວາມສະດວກໃຫ້ແກ່ລູກຫລານໄດ້ເຂົ້າຮຽນ, ປະກອບປື້ມແບບຮຽນ, ອຸປະກອນການຮຽນ ພ້ອມທັງສ້າງເງື່ອນໄຂການເຂົ້າເຖິງການສຶກສາ ແລະ ຂະຫຍາຍຕາໜ່າງການສຶກສາ ໃຫ້ມີຄຸນນະພາບນັບມື້ສູງຂຶ້ນ ແລະ ທົ່ວເຖິງຢູ່ເຂດຫ່າງໄກສອກຫລີກ; ເອົາໃຈໃສ່ການຄົ້ນ ຄວ້າປັບປຸງກົງຈັກການຈັດຕັ້ງຂອງຕົນ ໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ, ຮັບປະກັນການປະຕິບັດໜ້າທີ່ວຽກງານ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍ ຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດ ດີຂຶ້ນເລື່ອຍໆ, ສ້າງເງື່ອນໄຂໃຫ້ປະຊາຊົນບັນດາເຜົ່າ ສາມາດເຂົ້າຮ່ວມ, ປະກອບຄໍາເຫັນ, ຕິດຕາມກວດກາການບໍລິຫານລັດ ຕາມແນວທາງຂອງພັກ.

ທ່ານປະທານສະພາແຫ່ງຊາດ ຍັງເນັ້ນອີກວ່າ: ການກໍ່ສ້າງຮາກຖານການເມືອງ ເປັນວຽກງານທີ່ມີຄວາມສໍາຄັນຫລາຍ. ສະນັ້ນ, ຄະນະພັກ, ອົງການປົກຄອງເມືອງເຟືອງ ຈະຕ້ອງໄດ້ເພີ່ມທະວີຄວາມເອົາໃຈໃສ່ວຽກງານການກໍ່ສ້າງຮາກຖານການເມືອງ, ລົງໃກ້ຊິດຕິດແທດກັບພໍ່ແມ່ປະຊາ ຊົນ ຢ່າງແທດເຖິງ; ຄະນະພັກ, ອົງການປົກຄອງເມືອງ ຕ້ອງກໍາແໜ້ນຮາກຖານການເມືອງຂອງຕົນ, ຮັບຮູ້ໄດ້ເຖິງບັນຫາທີ່ຈະເປັນຊ່ອງວ່າງທີ່ຄົນບໍ່ດີສວຍໃຊ້ເຂົ້າໃນການແຊກແຊງ, ມ້າງເພທໍາລາຍຮາກຖານການເມືອງ ເປັນຕົ້ນ ພະຍາດອາດຍາສິດຂອງພະນັກງານ, ປາກົດການຫຍໍ້ທໍ້ໃນກົງຈັກລັດ, ການສໍ້ລາດບັງຫລວງ ແລະ ອື່ນໆ, ບັນຫາດັ່ງກ່າວ ຕ້ອງມີທິດທາງໃນການແກ້ໄຂຢ່າງເປັນຮູບປະທໍາ; ການພັດທະນາຊົນນະບົດ ແລະແກ້ໄຂຄວາມທຸກຍາກເນື້ອແທ້ແມ່ນການປົວແປງຊີວິດການເປັນຢູ່ ແລະ ຍົກລະດັບຄຸນນະພາບຊີວິດຂອງປະຊາຊົນ ເລີ່ມແຕ່ຮາກຖານຂຶ້ນມາໃຫ້ນັບມື້ດີຂຶ້ນ; ການລົງທຶນຂອງລັດເຂົ້າໃນການກໍ່ສ້າງພື້ນຖານໂຄງລ່າງເຖິງວ່າທຶນຮອນ, ງົບປະມານມີຈໍາກັດ ແຕ່ພັກ-ລັດ ກໍໄດ້ຈັດສັນໃຫ້ວຽກງານດັ່ງກາວ ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຕິດຕາມ, ກວດກາ ແລະຄຸ້ມຄອງການນໍາໃຊ້ທຶນຮອນດັ່ງກ່າວໃຫ້ຕິດພັນກັບການພັດ ທະນາແທ້ ແລະ ນໍາຜົນປະໂຫຍດຕົວຈິງມາໃຫ້ປະຊາຊົນ; ເອົາໃຈໃສ່ນໍາພາຂະແໜງການທີ່ກ່ຽວຂ້ອງ ຄົ້ນຄວ້າຈັດສັນທີ່ດິນ ເພື່ອນໍາໃຊ້ເຂົ້າໃນການຜະລິດກະສິກໍາ ເປັນສິນຄ້າປະເພດຕ່າງໆ ຢ່າງມີປະສິດທິຜົນ ເພື່ອສຸມທຶນຮອນ, ເຕັກນິກ ແລະ ນໍາພາປະຊາຊົນ ເຮັດການຜະລິດ ເພື່ອສ້າງອາຊີບ, ສ້າງລາຍຮັບ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ; ຄະນະພັກ, ອົງການປົກຄອງເມືອງຈະຕ້ອງໄດ້ເອົາໃຈໃສ່ຕໍ່ວຽກງານສາມສ້າງແມ່ນການຫັນພະນັກງານ, ຫັນງົບປະມານໄປເພີ່ມໃຫ້ທ້ອງຖິ່ນເປັນຕົ້ນແມ່ນຂັ້ນເມືອງ ແລະໄປນໍາພາເຮັດຕົວຈິງຢູ່ຮາກຖານບ້ານ.

ໂອກາດດັ່ງກ່າວ, ທ່ານປະທານສະພາແຫ່ງຊາດຍັງໄດ້ເຜີຍແຜ່ຜົນສໍາເລັດການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ໄດ້ດໍາເນີນໃນລະຫວ່າງວັນທີ 5-30 ທັນວາ 2022 ຜ່ານມາ. ຈາກນັ້ນ, ຄະນະດັ່ງກ່າວໄດ້ນຳເອົາຄອມພິວເຕີຈຳນວນ 5 ຊຸດ ມູນຄ່າ 25 ລ້ານກີບ ມອບໃຫ້ເມືອງເຟືອງ ແຂວງວຽງຈັນອີກດ້ວຍ.

แชร์