ສຳມະນາລະດັບຊາດ "ຊີວິດ ແລະພາລະກິດປະຕິວັດຂອງປະທານ ໄກສອນ ພົມວິຫານ ໄລຍະປີ 1955-1975"

ສະພາທິດສະດີສູນກາງພັກ, ຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ, ສະຖາບັນການເມືອງ ແລະການປົກຄອງແຫ່ງຊາດ, ຄະນະໂຄສະນາອົບຮົມສູນກາງພັກ ຈັດສໍາມະນາວິທະຍາສາດລະດັບຊາດ ພາຍໃຕ້ຫົວຂໍ້ "ຊີວິດ ແລະພາລະກິດປະຕິວັດຂອງປະທານ ໄກສອນ ພົມວິຫານ ໄລຍະປີ 1955-1975" ໃນວັນທີ 8 ກຸມພາ 2023 ທີ່ຄະນະໂຄສະນາອົບຮົມສູນກາງພັກເພື່ອສືບຕໍ່ຜັນຂະຫຍາຍມະຕິຂອງກົມການເມືອງສູນກາງພັກວ່າດ້ວຍການຄົ້ນຄວ້າແນວຄິດໄກ ສອນ ພົມວິຫານ ສະບັບເລກທີ 058/ກມສພ ລົງວັນທີ 13 ທັນວາ 2018 ແລະເປັນການສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 74 ປີ, ຂໍ່ານັບຮັບຕ້ອນວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 67 ປີ ແລະເປັນການຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ ຄັ້ງທີ XI ຂອງພັກປະຊາຊົນປະຕິວັດລາວໃຫ້ປາກົດຜົນເປັນຈິງ.

ສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ທັງເປັນຫົວໜ້າຄະນະຮັບຜິດ ຊອບການຄົ້ນຄວ້າແນວຄິດໄກສອນ ພົມວິຫານ ໄດ້ກ່າວວ່າ: ສຳມະນາວິທະຍາສາດລະດັບຊາດ ພາຍໃຕ້ຫົວຂໍ້ “ຊີວິດ ແລະພາລະກິດປະຕິວັດຂອງປະທານໄກສອນ ພົມວິຫານ ໄລຍະປີ 1955-1975” ໃນຄັ້ງນີ້, ມີຄວາມໝາຍສຳຄັນ ທັງໃນດ້ານທິດສະດີ ແລະພຶດຕິກຳ ແລະເປັນປະໂຫຍດໃຫຍ່ຫຼວງຕິດແທດຕົວຈິງໃນການຮ່ຳຮຽນເອົາແບບແຜນການດຳລົງຊີວິດໂດຍຜ່ານບັນດາຜົນງານການນຳພາ-ຊີ້ນຳ ພາລະກິດປະຕິວັດຂອງເພິ່ນໃຫ້ແກ່ການສຶກສາອົບຮົມພະນັກງານ, ສະມາຊິກພັກ, ກຳລັງປະກອບອາວຸດຕະຫຼອດຮອດປະຊາຊົນລາວບັນດາເຜົ່າ.

ໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ຮຽກຮ້ອງມາຍັງບັນດານັກວິທະຍາສາດ ຈົ່ງຍົກສູງຄວາມຮັບຜິດຊອບການເມືອງ, ຄົ້ນຄວ້າ, ນຳສະເໜີບົດດ້ວຍເນື້ອໃນທີ່ເລິກເຊິ່ງ, ຄົບຖ້ວນ ຮັບປະກັນໄດ້ລັກສະນະວິທະຍາສາດ, ຖືກຕ້ອງຕາມເຫດການຕົວຈິງ, ພ້ອມກັນນີ້ ກໍໃຫ້ເຂົ້າໃຈວ່າ ການຄົ້ນຄວ້າຊີວິດ ແລະ ພາລະກິດປະຕິວັດ ຂອງປະທານ ໄກສອນ ພົມວິຫານ ຍາມໃດກໍກ່ຽວພັນແບບກາຍອິນຊີ ທີ່ບໍ່ສາມາດຕັດແຍກອອກຈາກການຄົ້ນຄວ້າພາລະກິດນຳພາການປະຕິວັດ ຂອງພັກເຮົາ ໃນແຕ່ລະໄລຍະ. ພ້ອມທັງເນັ້ນໃຫ້ຜູ້ເຂົ້າຮ່ວມ ເອົາໃຈໃສ່ໃນການຄິດຫງໍາ, ປະກອບຄໍາເຫັນເພີ່ມເຕີມໃຫ້ແກ່ບົດວິທະທະຍາສາດ ຢ່າງກົງໄປກົງມາຕາມຄໍາຖາມເຈາະຈີ້ມ ເພື່ອເຮັດແນວໃດໃຫ້ເນື້ອໃນບົດຄົ້ນຄວ້າສຳມະນາວິທະຍາສາດໃນຄັ້ງນີ້, ສາມາດຮັບປະກັນໄດ້ທັງລັກສະນາວິທະຍາສາດ ແລະ ຖືກຕ້ອງຕາມຄວາມເປັນຈິງ ແລະ ນຳເອົາເນື້ອໃນຈິດໃຈສໍາມະນາໃນຄັ້ງນີ້ໄປຄົ້ນຄວ້າ ແລະ ໝູນໃຊ້ເຂົ້າໃນການສຶກສາອົບຮົມໃຫ້ພະນັກງານ, ສະມາຊິກພັກ, ກຳລັງປະກອບອາວຸດທີ່ຢູ່ໃນຄວາມຮັບຜິດຊອບ ຂອງຕົນຢ່າງມີປະສິດທິຜົນ.

ໂອກາດດຽວກັນນີ້, ສະຫາຍ ພູວົງ ອຸ່ນຄຳແສນ ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຮອງປະທທນສະພາທິດສະດີສູນກາງ, ຜູ້ປະຈຳການຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ໄດ້ຍົກໃຫ້ເຫັນ ຊີວິດ ແລະ ພາລະກິດ ຂອງປະທານ ໄກສອນ ພົມວິຫານ ໄລຍະນີ້ແມ່ນຕິດພັນກັບເງື່ອນໄຂທີ່ປະເທດລາວໄດ້ຕົກເປັນຫົວເມືອງຂຶ້ນຂອງພວກລ່າເມືອງຂຶ້ນແບບໃໝ່ທີ່ມີກຳລັງທາງດ້ານເສດຖະກິດ,ການທະຫານ,ອາວຸດຍຸດໂທປະກອນ ທີ່ທັນສະໄໝເໜືອກວ່າຫລາຍເທົ່າ. ແຕ່ປະທານ ໄກສອນ ພົມວິຫານ ໄດ້ພະຍາຍາມເຄື່ອນໄຫວນຳພາການປະຕິວັດ ດ້ວຍຫລາຍຮູບການ, ຫຼາຍວິທີການຕໍ່ສູ້ ສຸມໃສ່ປຸກລະດົມຂົນຂວາຍ,ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າຈົນສາມາດຍາດໄດ້ໄຊຊະນະຢ່າງສົມບູນ ແລະສະຖາປະນາເປັນ ສາທາະລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ ປີ 1975, ຊຶ່ງເປັນການສ້າງຕັ້ງລັດຂອງປະຊາຊົນໂດຍປະຊາຊົນ ແລະເພື່ອປະຊາຊົນ ຢ່າງແທ້ຈິງ.

ການສຳມະນາຄັ້ງນີ້, ຜູ້ເຂົ້າຮ່ວມໄດ້ຮັບຟັງການນຳສະເໜີ 5 ຫົວຂໍ້ຍ່ອຍ ເປັນຕົ້ນພາລະກິດສ້າງຕັ້ງພັກປະຊາຊົນ ປະຕິວັດລາວ ແລະປົກປັກຮັກສາເຂດທີ່ໝັ້ນສອງແຂວງເຕົ້າໂຮມ ຫົວພັນ ແລະ ຜົ້ງສາລີ ປີ 1955-1958; ຊີ້ນຳຫັນທິດຕໍ່ສູ້ ໂດຍເອົາການຕໍ່ສູ້ ດ້ວຍອາວຸດເປັນກົກ ສົມທົບກັບການຕໍ່ສູ້ທາງດ້ານການເມືອງ ແລະ ກົດໝາຍ ໃນໄລຍະ 1959-1962; ການນຳພາຕໍ່ສູ້ຕີເອົາຍຸດທະສາດສົງຄາມພິເສດ ເພີ່ມທະວີ ປີ 1963-1968; ປະທານໄກສອນ ພົມວິຫານ ຊີ້ນຳການສ້າງຄວາມຖືກຕ້ອງ ປອງດອງຊາດ ປີ 1969-1972; ພາລະກິດນໍາພາປວງຊົນລາວທັງຊາດລຸກຮື້ຂຶ້ນຍຶດອຳນາດໃນທົ່ວປະເທດ ແລະສະຖາປະນາ ສປປ ລາວ ປີ 1973-1975.
ຂປລ. ພາບ, ຂ່າວ: ມະນີທອນ, ອ່າຍຄຳ

แชร์