ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມຂໍ່ານັບ ຮອງຜູ້ອໍານວຍການໃຫ່ຍກອງທຶນການເງິນສາກົນ (IMF)

ໃນຕອນເຊົ້າວັນທີ 8 ກຸມພາ 2023 ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Kenji Okamura, ຮອງຜູ້ອໍານວຍການໃຫ່ຍກອງທຶນການເງິນສາກົນ (IMF) ພ້ອມດ້ວຍຄະນະ.

ໃນໂອກາດນີ້,ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍ ທ່ານ Kenji Okamura, ຮອງຜູ້ອໍານວຍການກອງທຶນການເງິນສາກົນ (IMF) ພ້ອມດ້ວຍຄະນະທີ່ເດີນທາງມາເຮັດວຽກຮ່ວມກັບພາກສ່ວນກ່ຽວຂ້ອງຂອງ ສປປ ລາວ ໃນການປະເມີນເສດຖະກິດມະຫາພາກ ສປປ ລາວ ປະຈຳປີ 2022 ຕາມພັນທະປະເທດສະມາຊິກ ພາຍໃຕ້ມາດຕາ (Article IV Consultation), ຊຶ່ງຜົນການປະເມີນ Article IV ຂອງ IMF ດັ່ງກ່າວແມ່ນມີຄວາມສໍາຄັນ ສໍາລັບ ສປປ ລາວ ໃນໄລຍະທີ່ເສດຖະກິດກໍາລັງປະເຊີນກັບສິ່ງທ້າທາຍຫຼາຍຢ່າງທັງປັດໃຈພາຍໃນ ແລະພາຍນອກ ແລະຜົນການປະເມີນດັ່ງກ່າວແມ່ນເປັນຂໍ້ມູນທີ່ສຳຄັນໃຫ້ແກ່ການຈັດອັນດັບຄວາມໜ້າເຊື່ອຖືຂອງ ສປປ ລາວ ໃນການດຶງດູດການຊ່ວເຫຼືອຈາກສາກົນ ແລະການລົງທຶນຂອງຕ່າງປະເທດຊຶ່ງບັນດານັກລົງທຶນ, ຄູ່ຮ່ວມພັດທະນາ ແລະບໍລິສັດຂອງຕ່າງປະເທດແມ່ນກຳລັງລໍຖ້າຜົນການປະເມີນສະພາບເສດຖະກິມະຫາພາກຂອງ ສປປ ລາວ ໃນປີນີ້. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີຍັງໄດ້ສະເໜີອົງການກອງທຶນການເງິນສາກົນສືບຕໍ່ໃຫ້ການສະໜັບສະໜູນຊ່ວຍເຫລືອທາງດ້ານວິຊາການໃຫ້ແກ່ພາກສ່ວນກ່ຽວຂ້ອງຂອງ ສປປ ລາວ ເພື່ອປັບປຸງການຈັດຕັ້ງປະຕິບັດວຽກງານໃຫ້ສາມາດຮັບມືກັບບັນດາຄວາມສ່ຽງທີ່ ສປປ ລາວ ກຳລັງປະເຊີນຢູ່ຢ່າງມີປະສິດທິພາບແລະທັນສະພາບການ.

ໃນໂອກາດດຽວກັນນີ້, ທ່ານ Kenji Okamura, ຮອງຜູ້ອໍານວຍການໃຫ່ຍກອງທຶນສາກົນ (IMF) ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະໄດ້ລາຍງານຜົນການປະເມີນເສດຖະກິດ ສປປ ລາວ, ໃນນັ້ນໄດ້ເໜັ້ນໜັກ 5 ປະເດັນຫລັກຄື: ການພັດທະນາເສດຖະກິດ ສປປ ລາວ, ການເງິນພາກລັດ,ນະໂຍບາຍເງິນຕາ ແລະການທະນາຄານ, ອັດຕາເງິນເຟີ້ ແລະອັດຕາແລກປ່ຽນ ແລະການຄາດຄະເນໃນຕໍ່ໜ້າ. ຊຶ່ງຜົນຂອງການປະເມີນເຫັນວ່າຍັງມີສິ່ງທ້າທາຍ ແລະຄວາມອ່ອນໄຫວຂອງເສດຖະກິດຫຼາຍດ້ານທີ່ສົ່ງຜົນກະທົບຕໍ່ກັບການຂະຫຍາຍຕົວ ແລະສະຖຽນລະພາບຂອງເສດຖະກິດຂອງ ສປປ ລາວ. ແນວໃດກໍຕາມ, IMF ຄາດວ່າໃນຕໍ່ໜ້າເສດຖະກິດຂອງ ສປປ ລາວ ຈະຟື້ນໂຕກັບມາສູ່ສະພາບປົກກະຕິ ແລະເຕີບໂຕຢ່າງຕໍ່ເນື່ອງໃນອະນາຄົດ.

ການປະເມີນເສດຖະກິດມະຫາພາກຕາມພັນທະມາດຕາ IV ຂອງ IMF ແມ່ນພັນທະຂອງ ສປປ ລາວ ໃນນາມປະເທດສະມາຊິກເພື່ອໃຫ້ການຮ່ວມມື ແລະອຳນວຍຄວາມສະດວກໃຫ້ແກ່ຄະນະວິຊາການ IMF ມາຕິດຕາມ ແລະ ປະເມີນສະພາບຄວາມຄືບໜ້າການພັດທະນາເສດຖະກິດໃນທຸກໆປີ. ສຳລັບການປະເມີນໃນປີນີ້ແມ່ນພິເສດເພາະຮອງຜູ້ອຳນວຍການໃຫຍ່ຂອງ IMF ເດີນທາງມາຮ່ວມເຂົ້າຢ້ຽມພົບປະກັບການນຳຂັ້ນສູງຂອງ ສປປ ລາວເພື່ອລາຍງານຜົນການປະເມີນເສດຖະກິດ ສປປ ລາວ ຮ່ວມກັບຄະນະວິຊາການຂອງຕົນ ຊຶ່ງເປັນປີທຳອິດທີ່ການນຳຂັ້ນສູງຂອງ IMF ເຂົ້າຮ່ວມຂະບວນການປະເມີນດັ່ງກ່າວທີ່ ສປປ ລາວ ແລະ ເປັນບາດກ້າວທີ່ສຳຄັນຂອງການພົວພັນຮ່ວມມືຂອງທັງສອງຝ່າຍ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ

แชร์