ປີ 2022 ມີ 13.762 ຄອບຄົວ ໄດ້ຮັບແຫຼ່ງທຶນຈາກ ທນບ ທະນາຄານນະໂຍບາຍ (ທນບ)

ທະນາຄານນະໂຍບາຍ (ທນບ) ຈັດຕັ້ງກອງປະຊຸມສະຫຼຸບການເຄື່ອນໄຫວວຽກງານຮອບດ້ານປະຈຳປີ 2022 ແລະທິດທາງແຜນການປີ 2023 ໃນລະຫວ່າງວັນທີ 6-7 ກຸມພາ 2023 ທີ່ຫ້ອງປະຊຸມສະຖາບັນການທະນາຄານ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ປອ. ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ, ປະທານສະພາບໍລິຫານ ທນບ; ພ້ອມນີ້, ກໍ່ມີທ່ານ ວິສອນ ໄຊສົງຄາມ ຜູ້ອຳນວຍການ ທນບ ພ້ອມຄະນະ, ຄະນະສາຂາແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ສໍາລັບການປ່ອຍສິນເຊື່ອໃນປີ 2022 ໄດ້ປ່ອຍສິນເຊື່ອທັງ ໝົດ 347,25 ຕື້ກີບ ກວມ 89% ຂອງແຜນການປີ, ສົມທຽບໃສ່ປີຜ່ານມາເພີ່ມຂຶ້ນ 11% ແລະ ກວມ 18 ແຂວງ, 112 ເມືອງ, 1.036 ບ້ານ, 1.975 ກຸ່ມ, 13.762 ຄອບ ຄົວ ຊື່ງໄດ້ປ່ອຍໃນເມືອງເປົ້າໝາຍ ກວມ 70%, ຈຸດສຸມລັດຖະບານ-ທ້ອງຖິ່ນ ກວມ 8%, ບ້ານ 3 ສ້າງ ກວມ 22%, ໂດຍປ່ອຍສິນເຊື່ອໃນຂະແໜງປູກຝັງ ກວມ 21%, ລ້ຽງສັດ 73%, ຫັດຖະກຳ 1,93%, ເປົ້າໝາຍອຸດສາຫະກໍາ-ປຸງແຕ່ງ 1%, ເປົ້າໝາຍບໍ ລິການ 3% ແລະການເກັບໜີ້: ເກັບຕົ້ນທຶນຄືນໃນປີ 2022 ໄດ້ທັງໝົດ 413 ຕື້ກີບ ເທົ່າ ກັບ 101,40% ຂອງແຜນ ການປີ (407,31 ຕື້ກີບ) ສົມທຽບໃສ່ປີຜ່ານມາ (360,73 ຕື້ກີບ) ເກັບໄດ້ເພີ່ມຂຶ້ນ 52,27 ຕື້ກີບ ຫຼື 13%.

ກ່ຽວກັບຍອດສິນເຊື່ອຮອດທ້າຍປີ 2022 ມີ 2.718,67 ຕື້ກີບ ເທົ່າກັບ 98% ຂອງແຜນປີ (2.849,13 ຕື້ກີບ) ສົມທຽບໃສ່ຕົ້ນປີ ຫຼຸດລົງ 2,36% ; ໃນນີ້ຍອດສິນເຊື່ອເງິນກູ້ ແຍກຕາມຂົງເຂດໃນເມືອງເປົ້າໝາຍ 63%, ຈຸດສຸມລັດຖະບານ-ທ້ອງຖິ່ນ 11%, ບ້ານ 3 ສ້າງ 12%, ໂຄງການຜະລິດສິນຄ້ານອກເມືອງເປົ້າ ໝາຍ 14% ຂອງຍອດສິນເຊື່ອທັງໝົດ; ຍອດສິນເຊື່ອເງິນກູ້ແຍກຕາມໂຄງການແລະເປົ້າໝາຍ: ໂຄງການປູກ ຝັງ 32%, ໂຄງການລ້ຽງສັດ 59%, ໂຄງການຫັດຖະກໍາ 1,35%, ໂຄງການອຸດສາຫະກຳປຸງແຕ່ງ 2,20%, ໂຄງການບໍລິການ 5,51% ຂອງຍອດສິນເຊື່ອທັງໝົດ.

ໃນປີ 2022 ປ່ອຍສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະກອງທຶນບ້ານ (ອກສກ) ທັງໝົດ 111,49 ຕື້ກີບ ປະຕິບັດໄດ້ 111% ຂອງແຜນການປີ (99,86 ຕື້ກີບ), ເກັບຄືນ 59,04 ຕື້ກີບ, ຍອດສິນເຊື່ອທ້າຍປີ 2022 ຈໍານວນ 327,98 ຕື້ກີບ ເທົ່າກັບ 12% ຂອງຍອດສິນເຊື່ອທັງໝົດ, ກວມເອົາ 1 ນະຄອນ ຫຼວງ, 16 ແຂວງ, 80 ເມືອງ, 258 ບ້ານ, 2.084 ກຸ່ມ, 12.333 ຄອບຄົວ. ສໍາລັບການປ່ອຍສິນເຊື່ອຮູບແບບ 4 ຮ່ວມທັງໝົດ 2,02 ຕື້ກີບ ເທົ່າກັບ 80% ຂອງແຜນການປີກວມເອົາ 1 ແຂວງ, 3 ເມືອງ, 6 ກຸ່ມ, 132 ຄອບຄົວ.

ທິດທາງ-ແຜນການປີ 2023 ຍັງສືບຕໍ່ເອົາໃຈໃສ່ສຶກສາອົບຮົມວຽກງານການເມືອງ-ແນວຄິດໃຫ້ພະນັກງານດ້ວຍຫຼາຍຮູບແບບທີ່ເໝາະສົມ; ສືບຕໍ່ປັບປຸງກົງຈັກການຈັດຕັ້ງພາຍໃນ, ກົນໄກການປະສານງານກັບອຳນາດການປົກຄອງ ແລະ ຂະແໜງການຕ່າງໆແຕ່ລະຂັ້ນໃຫ້ມີຄວາມສອດຄ່ອງ; ສືບຕໍ່ເປັນເຈົ້າການປະສານສົມທົບກັບຄະນະປັບປຸງໂຄງສ້າງຂອງ ທນບ ໃນການປະຕິຮູບ ທນບ ເປັນທະນາຄານພັດທະນາຊົນນະບົດເປັນຕົ້ນ: ດ້ານກົງຈັກການຈັດຕັ້ງ, ບຸກຄະລາກອນ, ນິຕິກຳ ແລະ ຖານະການເງິນໃຫ້ສຳເລັດໂດຍໄວ; ຈັດຕັ້ງປະຕິບັດແຜນງານ-ໂຄງການຂອງ ທນບ ໄລຍະ 5 ປີ (2021-2025) ປະກອບມີ 8 ແຜນງານ, 38 ໂຄງການ, 134 ແຜນວຽກໃຫ້ສເລັດຕາມແຜນການ ແລະລະດັບຄາດໝາຍ; ສືບຕໍ່ສະເໜີສະພາບໍລິຫານ ທນບ ເພື່ອພິຈາລະນາຮັບຮອງແຜນການຈັດຕັ້ງປະຕິບັດ ປະຈຳປີ 2023; ສືບຕໍ່ເອົາໃຈໃສ່ຄຸ້ມຄອງ, ຕິດຕາມການບໍລິຫານສິນເຊື່ອ ໃຫ້ໄດ້ຮັບຜົນສຳເລັດ; ປັບປຸງກົນໄກໃນການສົ່ງເສີມເຕັກນິກການປູກຝັງ -ລ້ຽງສັດໃຫ້ລູກຄ້າ; ລະບຽບການ ທີ່ກ່ຽວຂ້ອງໃຫ້ສະມາຊິກ ອກສກ ແລະອົງການປົກ ຄອງທ້ອງຖິ່ນທີ່ມີສ່ວນຮ່ວມໃຫ້ເຂົ້າໃຈຢ່າງເລິກເຊີ່ງ, ສືບຕໍ່ສະໜອງສິນເຊື່ອຜ່ານ ອກສກ ທົ່ວລະບົບໃຫ້ເພີ່ມຂຶ້ນ; ປະສານສົມທົບກັບຂະແໜງການທີ່ກ່ຽວຂ້ອງ ໂດຍສະເພາະ ທລຍ ເພື່ອຈັດຕັ້ງປ່ອຍສິນເຊື່ອແບບມີສ່ວນຮ່ວມໃນເມືອງທີ່ທຸກຍາກໃຫ້ເກີດເປັນ ຮູບປະທຳ ; ສືບຕໍ່ເພີ່ມທະວີການໂຄສະນາ, ປະຊາສຳພັນ ແລະ ອໍານວຍຄວາມສະດວກໃຫ້ປະຊາຊົນຢູ່ເຂດຊົນນະບົດສາມາດເຂົ້າເຖິງການບໍລິການດ້ານອື່ນໆເຊັ່ນ: ການບໍລິການໂອນເງິນພາຍໃນ ແລະໂອນເງິນຂ້າມທະນາຄານ, ການບໍລິການດ້ານເງິນຝາກແກ່ສັງຄົມຢູ່ບັນດາເມືອງ ທີ່ບໍ່ມີທະນາຄານທຸລະກິດຕັ້ງຢູ່, ການເປັນຕົວແທນບໍລິການ ແລະການຮ່ວມມືຂອງທະນາຄານພັດທະນາລາວ, ການເປັນຕົວ ແທນບໍລິການຮັບ-ຝາກ-ໂອນເງິນໃຫ້ແກ່ຄັງເງິນແຫ່ງຊາດ, ການເບີກຈ່າຍເງິນເດືອນໃຫ້ພະນັກງານຢູ່ເມືອງ ທີ່ບໍ່ມີທະນາຄານທຸລະກິດຕັ້ງຢູ່ ແລະທຸລະກໍາອື່ນໆ ທີ່ເຫັນວ່າມີເງື່ອນໄຂ ແລະບັນຫາສໍາຄັນອື່ນໆອີກຈໍານວນໜຶ່ງ.
ຂ່າວ: ຣັດສະໝີ ດວງສັດຈະ

แชร์