ປະທານສະພາແຫ່ງຊາດຕ້ອນຮັບຄະນະມິດຕະພາບ ລັດຖະສະພາຣັດເຊຍ-ລາວ

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບທ່ານ ປາເວວ ຕາຣາການົ (PaveITarakanov) ປະທານຄະນະມິດຕະພາບ ລັດຖະສະພາຣັດເຊຍ-ລາວ,ສະມາຊິກກຳມາທິການງົບປະມານແລະການເງິນຕະຫຼາດຂອງສະພາສູງ ແຫ່ງ ສະຫະພັນຣັດເຊຍ ພ້ອມຄະນະ ເຂົ້າຢ້ຽມຂໍ່ານັບ ໃນວັນທີ 7 ກຸມພາ 2023 ທີ່ສະພາແຫ່ງຊາດໃນໂອກາດທີ່ທ່ານພ້ອມຄະນະເດີນທາງມາຢ້ຽມຢາມ ແລະເຮັດວຽກຢູ່ ສປປ ລາວ ໃນລະຫວ່າງວັນທີ 6-10 ກຸມພານີ້ໂດຍຕອບສະໜອງຕາມການເຊື້ອເຊີນຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດແຫ່ງສປປລາວປະທານຄະນະມິດຕະພາບລັດຖະສະພາລາວ-ຣັດເຊຍຊຶ່ງຈຸດປະສົງຂອງການມາຢ້ຽມຢາມ ແລະ ເຮັດວຽກຂອງຄະນະຜູ້ແທນດັ່ງກ່າວເພື່ອປະກອບສ່ວນໃນການຮັດແໜ້ນແລະເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອອັນດີງາມແລະການເປັນຄູ່ຮ່ວມຍຸດທະສາດລະຫວ່າງສປປລາວ ແລະ ສະຫະພັນຣັດເຊຍກໍຄືການພົວພັນຮ່ວມມືລະຫວ່າງສະພາແຫ່ງຊາດລາວ ແລະ ສະພາສູງຣັດເຊຍ, ທັງເປັນການຊຸກຍູ້ການຮ່ວມມືລະຫວ່າງສອງລັດຖະບານລາວ-ຣັດເຊຍເປັນຕົ້ນການຈັດຕັ້ງປະຕິບັດບັນດາສັນຍາ, ສົນທິສັນຍາຂໍ້ຕົກລົງ, ບັນດາໂຄງການລົງທຶນແລະຮ່ວມມືຕ່າງໆ, ການຄ້າສອງຝ່າຍ, ການທ່ອງທ່ຽວ, ການສຶກສາ ແລະວຽກງານອື່ນໆ.

ໂອກາດດັ່ງກ່າວທ່ານປະທານສະພາແຫ່ງຊາດໄດ້ສະແດງຄວາມຍິນດີຕ້ອນຮັບຊົມເຊີຍ ແລະຕີລາຄາສູງຕໍ່ທ່ານ ປາເວວ ຕາຣາການົບ ພ້ອມຄະນະທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ໂດຍສະເພາະມາເຮັດວຽກຮ່ວມກັບຄະນະມິດຕະພາບລັດຖະສະພາ ລາວ-ຣັດເຊຍ ຊຶ່ງເປັນການປະກອບສ່ວນເສີມສ້າງ ສາຍພົວພັນຮ່ວມມືທີ່ດີ ແລະຊ່ວຍເຫຼືອຊຶ່ງກັນ ແລະກັນລະຫວ່າງລາວ-ຣັດເຊຍ ເວົ້າລວມເວົ້າສະພາະກໍຄືສອງຄະນະມິດຕະພາບລັດຖະສະພາລາວ-ຣັດເຊຍ ແລະ ຣັດເຊຍ-ລາວ ທີ່ມີມາແຕ່ດົນນານແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ, ທ່ານປະທານສະພາແຫ່ງຊາດຍັງໄດ້ອອຍພອນໃຫ້ທ່ານ ປາເວວ ຕາຣາການົບ ພ້ອມຄະນະຈົ່ງປະສົບຜົນສຳເລັດໃນການມາເຄື່ອນໄຫວຢ້ຽມຢາມ ແລະເຮັດວຽກຢູ່ ສປປ ລາວໃນຄັ້ງນີ້.

ທ່ານ ປາເວວ ຕາຣາການົບ ໄດ້ສະແດງຄວາມຂອບໃຈຕໍ່ທ່ານປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນພ້ອມນີ້ຍັງໄດ້ລາຍງານຈຸດປະສົງໃນການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະຜົນການພົບປະສອງຝ່າຍ ລະຫວ່າງຄະນະມິດຕະພາບລັດຖະສະພາລາວ-ຣັດ ແລະຣັດເຊຍ-ລາວ ໃຫ້ທ່ານປະທານສະພາແຫ່ງຊາດໄດ້ຮັບຊາບ.

ໃນວັນດຽວກັນທີ່ສະພາແຫ່ງຊາດກໍໄດ້ມີການພົບປະສອງຝ່າຍລະຫວ່າງຄະນະມິດຕະພາບລັດຖະສະພາລາວ-ຣັດເຊຍ ແລະ ຣັດເຊຍ-ລາວ,ຝ່າຍລາວນຳໂດຍທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດແຫ່ງສປປລາວປະທານຄະນະມິດຕະພາບລັດຖະສະພາລາວ-ຣັດເຊຍ, ຝ່າຍ ຣັດເຊຍ ນຳໂດຍທ່ານ ປາເວວ ຕາຣາການົບ ປະທານຄະນະມິດຕະພາບ ລັດຖະສະພາຣັດເຊຍ-ລາວ ຂອງສະພາສູງ ແຫ່ງ ສະຫະພັນ ຣັດເຊຍ

ໃນການພົບປະກັນຄັ້ງນີ້ ສອງຝ່າຍໄດ້ຕີລາຄາຄືນການພົວພັນຮ່ວມມືໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າລະຫວ່າງ ສອງຄະນະມິດຕະພາບລັດຖະສະພາລາວ--ຣັດເຊຍໃນນາມທີ່ເປັນກົນໄກໜຶ່ງ ຂອງສອງອົງການນິຕິບັນຍັດ ຂອງສອງຝ່າຍແນໃສ່ຊຸກຍູ້ ແລະສົ່ງເສີມການພົວພັນ ແລະ ຮ່ວມມືລະຫວ່າງສອງອົງການນິຕິບັນຍັດ.ໃນນັ້ນສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ສ ຣັດເຊຍ ແລະ ສອງອົງການນິຕິບັນຍັດກໍຄືຄະນະມິດຕະພາບລັດຖະສະພາລາວ-ຣັດເຊຍ, ໄດ້ຮັບການສົ່ງເສີມການຮ່ວມມືທາງດ້ານການເມືອງເປັນສ່ວນໃຫຍ່, ແຕ່ການຮ່ວມມືດ້ານເສດຖະກິດຍັງບໍ່ທັນຫຼາຍເນື່ອງຈາກຈຸດພິເສດທາງດ້ານພູມີປະເທດທີ່ຢູ່ຫ່າງໄກກັນ, ແຕ່ແນວໃດກໍຕາມ ສອງຝ່າຍ ຈະໄດ້ພ້ອມກັນຊຸກຍູ້ໃຫ້ມີການແລກປ່ຽນການຢ້ຽມຢາມຂອງຄະນະຜູ້ແທນລະດັບຕ່າງໆນໍາກັນໂດຍສະເພາະລະຫວ່າງ ສະພາແຫ່ງຊາດລາວ ແລະສະພາສູງ ແຫ່ງ ສະຫະພັນ ຣັດເຊຍ, ສືບຕໍ່ສົ່ງສານອວຍພອນກັນໃນໂອກາດວັນສຳຄັນຕ່າງໆ ແລະ ສະໜັບສະໜູນ ແລະ ຊ່ວຍເຫຼືອຊຶ່ງກັນ ແລະກັນໃນເວທີລັດຖະສະພາພາກພື້ນ ແລະສາກົນ. ພິເສດ, ສອງຝ່າຍຈະຊຸກຍູ້ສອງລັດຖະບານ ເສີມຂະຫຍາຍການຮ່ວມມືທາງດ້ານເສດຖະກິດ, ການຄ້າ, ການທ່ອງທ່ຽວໃຫ້ເປັນຮູບປະທຳຫຼາຍຂຶ້ນ, ຜ່ານມານີ້ພວກເຮົາກໍໄດ້ມີການເປີດຖ້ຽວບິນໂດຍກົງລະຫວ່າງ ລາວ-ຣັດເຊຍ-ລາວຮ່ວມກັນຢ່າງເປັນທາງການ ແລະ ມີເສັ້ນທາງລົດໄຟ ລາວ-ຈີນ ຊຶ່ງເປັນເງື່ອນໄຂທີ່ດີໃນການປະກອບສ່ວນເຂົ້າໃນການພັດທະນາໄປມາຫາສູ່ກັນ, ມີການຄ້າຂາຍຮ່ວມກັນ, ການລົງທຶນ, ການທ່ອງທ່ຽວ ແລະອື່ນໆໃນອະນາຄົດອັນຈະນໍາເອົາຜົນປະໂຫຍດມາໃຫ້ປະຊາຊົນສອງຊາດ.
(ຂ່າວ-ພາບ:ສຳນານ)

แชร์