ລາວ- ສ ກູບາ ປຶກສາການຮ່ວມມືຂົງເຂດການຄົ້ນຄວ້າເສດຖະກິດ-ສັງຄົມ

ໃນວັນທີ 7 ກຸມພາ 2023 ຢູ່ຫ້ອງຮັບແຂກສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດທ່ານ ສອນທະນູ ທໍາມະວົງ ປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ ໄດ້ຮັບການເຂົ້າຢ້ຽມຂໍ່ານັບຂອງທ່ານ ນາງ ເອັນນາ ເອສເທີ ໄວແອ້ນ ວານເດດ (Enna Esther Viant Valdés) ເນື່ອງໃນໂອກາດທີ່ມາຮັບໜ້າທີ່ເປັນເອກອັກຄະລັດຖະທູດ ສ ກູບາ ປະຈໍາ ສປປ ລາວ.

ໃນການພົບປະຄັ້ງນີ້, ທ່ານປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ ໄດ້ແຈ້ງສະພາບການຈັດຕັ້ງ ແລະເຄື່ອນໄຫວຂອງສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດໃນໄລຍະທີ່ຜ່ານມາຈົນມາເຖິງປັດຈຸບັນຕໍ່ທ່ານ ທູດ ສກູບາ ປະຈໍາ ສປປ ລາວ. ພ້ອມທັງຕີລາຄາສູງຕໍ່ກັບສາຍພົວພັນ, ຮ່ວມມື ລະຫວ່າງ ສປປ ລາວ ແລະ ສ ກູບາ ຊຶ່ງເວລາໃດກໍເນັ້ນການຮ່ວມມືດ້ານເສດຖະກິດໄປຄຽງຄູ່ກັບການພົວພັນອັນດີງາມທາງດ້ານການເມືອງ. ໃນນັ້ນ, ສາຍພົວພັນຮ່ວມມືທີ່ພົ່ນເດັ່ນເປັນຮູບປະທໍາແມ່ນຂະແໜງສາທາລະນະສຸກ, ການສຶກສາ ແລະກິລາ.

ນອກນີ້, ທັງສອງຝ່າຍຍັງໄດ້ມີການປຶກສາຫາລືເພື່ອຊອກຫາໂອກາດການຮ່ວມມືໃນຂົງເຂດຕ່າງໆ ໂດຍສະເພາະແມ່ນໃນຂົງເຂດການຄົ້ນຄວ້າວິທະຍາສາດຂົງເຂດເສດຖະກິດ-ສັງຄົມ. ສະເພາະການພົວພັນຂອງສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດກັບ ສ ກູບາ ແມ່ນມີການພົວພັນໂດຍຜ່ານເວທີສໍາມະນາສາກົນກ່ຽວກັບສັງຄົມນິຍົມ ຊຶ່ງລິເລີ່ມແຕ່ປີ 2013 ເປັນຕົ້ນມາ. ໂດຍມີຄະນະຜູ້ແທນ ແລະນັກຄົ້ນຄວ້າຈາກ 5 ປະເທດເຂົ້າຮ່ວມຄື: ສປປ ລາວ, ສປ ຈີນ, ສສ ຫວຽດນາມ, ສ ກູບາ ແລະ ສປປ ເກົາຫຼີ. ມາເຖິງປັດຈຸບັນ, ເວທີສໍາມະນາສາກົນກ່ຽວກັບສັງຄົມນິຍົມນີ້ໄດ້ຈັດຕັ້ງຂຶ້ນ ຈໍານວນ 9 ຄັ້ງ ໂດຍການຜັດປ່ຽນເປັນເຈົ້າພາບຂອງ ສປປ ລາວ, ສປ ຈີນ ແລະສສ ຫວຽດນາມ.

ສປປ ລາວ ແລະສກູບາ ເປັນປະເທດເພື່ອນມິດຍຸດທະສາດ, ມີການພົວພັນ ແລະຮ່ວມມືອັນເປັນມູນເຊື້ອທີ່ດີງາມມາແຕ່ດົນນານຊຶ່ງໄດ້ເກີດຂຶ້ນບົນພື້ນຖານອຸດົມການສັງຄົມນິຍົມ. ສອງປະເທດໄດ້ສ້າງຕັ້ງສາຍພົວພັນການທູດແຕ່ວັນທີ 4 ພະຈິກ 1974. ການພົວພັນທີ່ເປັນພື້ນຖານແມ່ນການສະໜັບສະໜູນຊຶ່ງກັນ ແລະກັນໃນເວທີສາກົນເປັນຕົ້ນແມ່ນໃນຂອບຂອງອົງການສະຫະປະຊາຊາດ, ໃນກອງປະຊຸມສະມັດຊາໃຫຍ່ຂອງອົງການສະຫະປະຊາຊາດ.
ຂ່າວ: ສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ

แชร์