ພາສີປະຈຳແຂວງ ອັດຕະປືມອບລາຍຮັບໃຫ້ກົມພາສີ 73 ຕື້ກວ່າກີບ

ຕາມການລາຍງານຂອງທ່ານ ເຄນໄຊ ທອງພຸດ ຮອງຫົວໜ້າພາສີປະຈໍາແຂວງອັດຕະປື ໃຫ້ຮູ້ໃນກອງປະຊຸມສະຫຼຸບຕີລາຄາວຽກງານວິຊາສະເພາະ ປະຈຳປີ 2022 ແລະ ທິດທາງແຜນການປີ 2023, ວາງຄາດໝາຍສູ້ຊົນໃນການເກັບລາຍຮັບໝົດປີ 2023 ເມື່ອບໍ່ດົນນີ້ວ່າ: ໃນປີ 2022 ພາສີປະຈໍາແຂວງ ແລະ ດ່ານພາສີທີ່ຂຶ້ນກັບ ໄດ້ຮັບມອບໝາຍຕົວເລກລາຍຮັບຈາກກົມພາສີ ທັງໝົດ 43 ຕື້ກວ່າກີບ, ຜ່ານການຈັດຕັ້ງປະຕິບັດໝົດປີປະຕິບັດໄດ້ 73 ຕື້ກວ່າກີບ, ທຽບໃສ່ແຜນການປີເທົ່າກັບ 170,54%, ທຽບໃສ່ໄລຍະດຽວກັນປີ 2021 ຈໍານວນ 44 ຕື້ກວ່າກິບ,ເພີ່ມຂຶ້ນ 66,15% ກີບ. ໃນນີ້, ພາສີປະຈຳແຂວງ ປະຕິບັດໄດ້ 4 ຕື້ກວ່າກີບ, ດ່ານພາສີສາກົນພູເກືອ ປະຕິບັດໄດ້ 69 ກວ່າຕື້ກີບ.

ສຳລັບທິດທາງແຜນການ, ຄາດໝາຍສູ້ຊົນໃນການເກັບລາຍຮັບໝົດປີ 2023 ພາສີປະຈຳແຂວງ ແລະ ດ່ານພາສີທີ່ຂຶ້ນກັບ ໄດ້ຮັບຕົວເລກແຜນການເກັບລາຍຮັບ 89 ຕື້ກີບ. ໃນນັ້ນ, ພາສີປະຈໍາແຂວງຈະສູ້ຊົນເກັບລາຍຮັບໃຫ້ໄດ້ 5 ຕື້ກີບ, ດ່ານພາສີສາກົນພູເກືອ ຈະສູ້ຊົນເກັບລາຍຮັບໃຫ້ໄດ້ 84 ຕື້ກີບ. ພ້ອມດຽວກັນນີ້, ຄະນະພັກ, ຄະນະນໍາພາສີ ປະຈຳແຂວງ, ຈະໄດ້ເອົາໃຈໃສ່ການຊີ້ນຳ-ນຳພາດ້ານການເມືອງແນວຄິດ ໃຫ້ພະນັກງານລັດຖະກອນເຈົ້າໜ້າທີ່ພາສີ, ເຜີຍແຜ່, ເຊື່ອມຊິມ, ຄໍາສັ່ງ ແລະ ລະບຽບການຕ່າງໆທີ່ພັກ-ລັດວາງອອກ ໃນແຕ່ລະໄລຍະ; ເອົາໃຈໃສ່ປະ ຕິບັດຍັດຕິກອງປະຊຸມຂອງກົມພາສີສະບັບເລກທີ 00007/ກພສ,ລົງວັນທີ 3 ມັງກອນ 2023 ໃຫ້ໄດ້ຮັບໝາກຜົນ, ປະສານກັບຂະ ແໜງການກ່ຽວຂ້ອງ ເພື່ອຕັ້ງຈຸດກວດກາສຳລັບພາຫະນະທີ່ຍັງບໍທັນໄດ້ເສຍພາສີ-ອາກອນ; ສືບຕໍ່ຜັນຂະຫຍາຍວາລະແຫ່ງຊາດ,ວາລະຂອງແຂວງວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງຂະແໜງພາສີໄລຍະປີ(2021-2023); ຊຸກຍູ້ໃຫ້ບໍລິສັດທີ່ມາເຄື່ອນໄຫວນຳເຂົ້າສົ່ງ-ອອກ ໃຫ້ມີເງື່ອນໄຂກ້າວສູ່ບໍລິສັດມາດຖານ AEO ແລະ ຈັດຕັ້ງປະຕິບັດມາດຕະການຈຳນວນໜຶ່ງ ເປັນຕົ້ນ ເຂັ້ມງວດໃນການກວດກາສິນຄ້າ, ເຄື່ອງຂອງສົ່ງອອກ-ນຳເຂົ້າໃຫ້ຖືກຕ້ອງຕາມລະບຽບກົດໝາຍ ເພື່ອສະກັດກັ້ນການລັກລອບໜີພາສີ; ອອກແຮງສູ້ຊົນຈັດຕັ້ງປະຕິບັດ ການຈັດເກັບລາຍຮັບເຂົ້າງົບປະມານຕາມຕົວເລກແຜນການທີ່ໄດ້ຮັບມອບໝາຍ; ເພີ່ມທະວີການຄຸ້ມຄອງກວດກາການນຳເຂົ້າ, ວັດຖຸອຸປະກອນ, ນໍ້າມັນເຊື້ອໄຟ, ພາຫະນະນຳເຂົ້າໂດຍຮູບການຍົກເວັ້ນຂອງໂຄງການລົງທຶນ ເພື່ອນຳໃຊ້ໃຫ້ຖືກເປົ້າໝາຍ; ເພີ່ມທະວີວຽກງານຕ້ານ ແລະ ກັດກັ້ນການລັກລອບໜີພາສີພາຍໃນພາສີປະຈໍາແຂວງ ແລະ ດ່ານພາສີຊາຍແດນຢ່າງແຂງແຮງ ແລະ ມີມາດຕະການເຂັ້ມງວດຕາມລະບຽບກົດໝາຍໃນກໍລະນີມີການລະເມີດ; ແກ້ໄຂປະກົດການຫຍໍ້ທໍ້ຕ່າງໆພາຍໃນພາສີປະຈຳແຂວງ, ດ່ານພາສີຊາຍແດນພ້ອມກັນນັ້ນຕ້ອງຂຸດຄົ້ນແຫຼ່ງລາຍຮັບທີ່ບົ່ມຊ້ອນ.

ໃນກອງປະຊຸມດັ່ງກ່າວ, ຜູ້ເຂົ້າຮ່ວມໄດ້ປະກອບຄຳເຫັນເພື່ອເຮັດໃຫ້ການຈັດເກັບລາຍຮັບພາສີພາຍໃນແຂວງອັດຕະປື ໃນປີ 2023 ບັນລຸໄດ້ຕາມລະດັບຄາດໝາຍ ແລະໄດ້ຜ່ານຂໍ້ຕົກລົງມອບໃບຍ້ອງຍໍຂັ້ນຫົວໜ້າກົມພາສີໃຫ້ແກ່ພະນັກງານພາສີປະຈຳແຂວງອັດຕະປື ຈໍານວນ 29 ທ່ານ, ຍິງ 4 ທ່ານ ເພື່ອເປັນການຊົມເຊີຍຜົນສຳເລັດການຈັດຕັ້ງປະຕິບັດວຽກງານວິຊາສະເພາະປະຈຳປີ 2022.
ຂ່າວ-ພາບ: ກະຊວງການເງິນ

แชร์