ສົນທະນາ ຍານພາຫະນະໃນລາວ

ສະມາຄົມອຸດສາຫະກຳ ຍານພາຫະນະລາວ ຈັດເວທີສົນທະນາ ຍານພາຫະນະລາວ ຄັ້ງທີ1 "Lao Automotive Forum Moving forward to the future of mobility” ໃນວັນທີ 6 ກຸມພາ 2023 ທີ່ນະຄອນຫລວງວຽງຈັນ ເພື່ອເປັນການສົນທະນາລະຫວ່າງພາກລັດ ແລະຜູ້ປະກອບການ ພ້ອມທັງຮັບຟັງນະໂຍບາຍຕ່າງໆຈາກພາກລັດ ແລະຜູ້ປະກອບການຕໍ່ກັບອຸດສາຫະກຳຍານພາຫານະໃນ ສປປ ລາວ ໂດຍເຂົ້າຮ່ວມຂອງທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະການຄ້າ, ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະອຸດສາຫະກຳແຫ່ງຊາດ, ທ່ານປະສາດໄຊ ພິລາພັນເດຊ ປະທານສະມາຄົມອຸດສະຫະກຳຍານພາຫະນະລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ປະສາດໄຊ ພິລາພັນເດຊ ກ່າວວ່າ: ເວທີສົນທະນາໃນຄັ້ງນີ້ ຫວັງວ່າຈະໄດ້ຮັບການຮ່ວມມື ຈາກທຸກພາກສ່ວນໃນການແລກປ່ຽນສົນທະນາຢ່າງສ້າງສັນ, ກົງໄປກົງມາ, ມີເນື້ອໃນຕອບສະໜອງຕາມວັດຖຸປະສົງຂອງເວທີສົນທະນາໃນຄັ້ງນີ້ ເພື່ອພ້ອມກັນກຽມພ້ອມຮັບມືກັບສິ່ງທ້າທາຍຕ່າງໆນາໆ ທີ່ອາດຈະເກີດຂຶ້ນ ແລະຈະໄດ້ພ້ອມກັນແກ້ໄຂ ແລະ ຍືນຍົງຕະຫລອດໄປ. ເວທີສຳມະນາຄັ້ງນີ້ແມ່ນເທື່ອທຳອິດທີ່ທາງສະມາຄົມໄດ້ຈັດຂຶ້ນສະນັ້ນອາດຈະບໍ່ຕອບສະໜອງໄດ້ທັງໝົດຕາມຄວາມຮຽກຮ້ອງຕ້ອງການຂອງ ຜູ້ເຂົ້າຮ່ວມ ແລະ ພ້ອມຈະນຳເອົາບົດຮຽນໃນຄັ້ງນີ້ ໄປປັບປຸງໃນເວທີສົນທະນາໃນຄັ້ງຕໍ່ໄປ.

ສະມາຄົມອຸດສາຫະກຳ ຍານພາຫະນະລາວ ໄດ້ສ້າງຕັ້ງຂຶ້ນໃນປີ 2003, ເປັນອົງການຈັດຕັ້ງໜຶ່ງ ທີ່ໄດ້ຮັບຮອງຈາກສະພາການຄ້າ ແລະອຸດສາຫະກຳແຫ່ງຊາດລາວ, ມີໜ້າທີ່ເຕົ້າໂຮມບັນດາຫົວໜ່ວຍທຸລະກິດທີ່ຜະລິດ, ນຳເຂົ້າຍານພາຫະນະ ແລະ ອາໄຫລ່ໃນ ສປປ ລາວ, ປະຕິບັດຕາມທິດທາງນະໂຍບາຍຂອງພັກ ແລະ ລັດຖະບານວ່າດ້ວຍການເຕົ້າໂຮມ ແລະສ້າງຕັ້ງສະມາຄົມໂດຍໄດ້ຮວມເອົາບັນດາຫົວໜ່ວຍວິສາຫະກິດທັງລັດ ແລະເອກະຊົນທີ່ດຳເນີນທຸລະກິດກ່ຽວກັບການຜະລິດ, ນຳເຂົ້າ-ສົ່ງອອກ, ບໍລິການດ້ານພາຫະນະ ແລະ ອາໄຫລ່ໃນຂອບເຂດທົ່ວປະເທດເຂົ້າເປັນການຈັດຕັ້ງໜຶ່ງເພື່ອຮ່ວມມື ແລະ ອຳນວຍຄວາມສະດວກໃນການນໍາພາຄຸ້ມຄອງຂອງລັດຕໍ່ການຜະລິດ, ການນໍາເຂົ້າ-ສົ່ງອອກ, ການປະຕິບັດພັນທະພາສີ-ອາກອນ, ການຄຸ້ມຄອງການຈັດຈໍາໜ່າຍ ແລະການພົວພັນກັບຄູ່ຮ່ວມມືສາກົນ.

แชร์