ຂະແໜງອຸດສາຫະກຳ ແລະການຄ້າ ສະຫຼຸບວຽກງານປະຈຳປີ

  ໃນລະຫວ່າງວັນທີ 2-3 ເມລາ 2019 ທີ່ນະຄອນຫຼວງວຽງຈັນ ຂະແໜງອຸດສາຫະກຳ ແລະການຄ້າ (ອຄ) ໄດ້ຈັດກອງປະຊຸມປະຈໍາປີ 2018 ແລະແຜນ ການປີ 2019 ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າ,ບັນດາຮອງລັດຖະມົນຕີກະຊວງ (ອຄ), ຫົວໜ້າ-ຮອງຫົວໜ້າກົມ, ຫົວໜ້າພະແນກຈາກບັນດາກົມ, ສະຖາບັນ, ຫ້ອງການກະຊວງ, ບັນດາທ່ານທີ່ປຶກສາທູດຝ່າຍເສດຖະກິດ-ການຄ້າປະຈໍາການຢູ່ຕ່າງປະເທດ, ສະພາການຄ້າ ແລະອຸດສາຫະກຳແຫ່ງຊາດ, ບັນດາລັດວິສາຫະກິດກໍຄືວິສາຫະກິດປະສົມອ້ອມຂ້າງກະຊວງ, ຫົວໜ້າພະແນກ/ຮອງ ຫົວໜ້າພະແນກ ອຄ ແຂວງ, ນະຄອນຫຼວງ ແລະຫົວໜ້າຂະແໜງກ່ຽວຂ້ອງຈາກທ້ອງຖິ່ນເຂົ້າຮ່ວມ.

  ທ່ານ ນາງ ເຂັມມະນີ ພົນເສນາ ກ່າວວ່າ: ການຈັດກອງປະຊຸມຄັ້ງນີ້ເພື່ອສະຫຼຸບຕີລາຄາການຈັດຕັ້ງປະຕິບັດແຜນພັດທະນາອຸດສາຫະກໍາປຸງແຕ່ງ ແລະ ການຄ້າປີ 2018 ແລະ ວາງແຜນການຂອງຂະແໜງອຸດສາຫະກໍາ ແລະ ການຄ້າປີ 2019 ພ້ອມດ້ວຍຜ່ານຂໍ້ຕົກລົງວ່າດ້ວຍການມອບຄວາມຮັບຜິດຊອບໃນການຈັດຕັ້ງປະຕິບັດແຜນພັດທະນາວຽກງານອຸດສາຫະກໍາ ປຸງແຕ່ງ ແລະການຄ້າ ປະຈໍາປີ 2019 ໂດຍປິ່ນອ້ອມ 3 ແຜນງານ ຄື: 1. ແຜນງານເຊື່ອມໂຍງເສດຖະກິດກັບພາກພື້ນ ແລະສາກົນທີ່ເນັ້ນການເປີດຕະຫຼາດໃຫ້ກັນ ແລະກັນໃນປະຊາຄົມເສດຖະກິດອາຊຽນ,ອາຊຽນບວກຄູ່ເຈລະຈາ ແລະຂອບຄວາມຮ່ວມມືເສດຖະກິດການຄ້າອື່ນໆ, 2. ແຜນງານການສ້າງສະພາບແວດລ້ອມທີ່ເອື້ອອຳນວຍແກ່ການສ້າງຕັ້ງ ແລະ ດຳເນີນທຸລະກິດຕາມພາລະບົດບາດຂອງຂະແໜງອຸດສາຫະກຳ ແລະການຄ້າ 3 ແຜນງານການສະໜັບສະໜູນໃຫ້ວິສາຫະກິດພາຍໃນໂດຍສະເພາະຂະໜາດນ້ອຍ ແລະກາງມີຄວາມສາມາດຮັບມືກັບສະພາບການແຂ່ງຂັນທີ່ເພີ່ມຂຶ້ນ ແລະເຂົ້າຮ່ວມໃນຕ່ອງໂສ້ການສະໜອງສິນຄ້າຂອງພາກພື້ນ ແລະລະບົບການຄ້າສາກົນ.

 ໃນໄລຍະຜ່ານມາການປະຕິບັດຕົວເລກຄາດໝາຍສູ້ຊົນຕົ້ນຕໍປີ 2018 ຂອງຂະແໜງ ອຄ ມີດັ່ງນີ້: 1. ດ້ານອຸດສາຫະກໍາປຸງແຕ່ງ ແລະຫັດຖະກໍາ: ມູນຄ່າການຜະລິດອຸດສາຫະກໍາປຸງແຕ່ງໃນປີ 2018 ປະຕິບັດໄດ້ປະມານ 10.770 ຕື້ກີບ, ລື່ນແຜນການປີ 12% (ຕົວເລກແຜນແມ່ນ 9.614 ຕື້ກີບ) ແລະທຽບໃສ່ໄລຍະດຽວກັນຂອງປີຜ່ານມາ ອັດຕາຂະຫຍາຍຕົວເພີ່ມຂຶ້ນ 16,97%. 2. ດ້ານການຄ້າພາຍໃນ: ການຈໍລະຈອນສິນຄ້າພາຍໃນ ໃນປີ 2018 ແມ່ ນ 57.612 ຕື້ກີບ, ລື່ນແຜນການ 0,39% (ຕົວເລກແຜນແມ່ນ 57.386 ຕື້ກີບ); ທຽບໃສ່ໄລຍະດຽວກັນຂອງປີຜ່ານມາມີອັດຕາຂະຫຍາຍຕົວເພີ່ມ ຂຶ້ນ 12,65%. 3. ດ້ານການຄ້າກັບຕ່າງປະເທດ: ມູນຄ່າການນໍາເຂົ້າ ແລະ ສົ່ງອອກປະຕິບັດໄດ້ປະມານ 11.258 ລ້ານໂດລາສະຫະລັດ. ເມື່ອທຽບໃສ່ ແຜນການປີ 2018 ລື່ນແຜນການ 13% ແລະທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 16%.ໃນນີ້, ການສົ່ງອອກ: ປະຕິບັດໄດ້ 5.410 ລ້ານໂດລາ, ລື່ນແຜນການ 7,8% (ແຜນການສົ່ງອອກ 5.015 ລ້ານໂດລາ) ແລະເພີ່ມຂຶ້ນ 10,9% ເມື່ອທຽບໃສ່ໄລຍະດຽວກັນຂອງປີຜ່ານມາ. ສໍາລັບການນໍາເຂົ້າ: ປະຕິບັດໄດ້ ປະມານ 5.848 ລ້ານໂດລາ, ລື່ນ ແຜນການ 17% (ແຜນການນໍາ ເຂົ້າ 4.978 ລ້ານໂດລາ) ແລະ ເພີ່ມຂຶ້ນ 21% ເມື່ອທຽບໃສ່ໄລຍະດຽວກັນຂອງປີຜ່ານມາ.

ໂດຍ: ວົງມະນີ

แชร์