ມອບ-ຮັບຫນ້າທີ່ລັດຖະມົນຕີກະຊວງການເງິນ

ມອບ-ຮັບຫນ້າທີ່ລັດຖະມົນຕີກະຊວງການເງິນ

ພິທີມອບ-ຮັບໜ້າທີ່ລະຫວ່າງທ່ານ ບຸນໂຈມ ອຸບົນປະເສີດ ເລຂາຄະນະບໍລິຫານງານພັກ ລັດຖະມົນຕີກະຊວງການເງິນຜູ້ເກົ່າ ແລະທ່ານ ສັນຕິພາບ ພົມວິຫານ ເລຂາຄະນະບໍລິຫານງານພັກ ລັດຖະມົນຕີກະຊວງການເງິນຜູ້ໃໝ່ ຈັດຂຶ້ນວັນທີ 3 ກຸມພາ 2023 ທີ່ກະຊວງການເງິນມີທ່ານ ສອນໄຊ ສີພັນດອນ ນາຍົກລັດຖະມົນຕີ, ບັນດາລັດຖະມົນຕີ, ຮອງລັດຖະມົນຕີ, ອະດີດການນຳກະຊວງການເງິນ ແລະ ບັນດາຫົວໜ້າກົມຮອງກົມອ້ອມຂ້າງກະຊວງການເງິນເຂົ້າຮ່ວມ.

ທ່ານ ນາງ ບຸດສະດີ ທະນະເມືອງ ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານຄໍາສັ່ງຂອງກົມການເມືອງສູນ ກາງພັກສະບັບລົງວັນທີ 26 ມັງກອນ 2023 ວ່າດ້ວຍການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່ ຜ່ານມາຕາມຂໍ້ຕົກລົງຂອງຄະນະເລຂາທິການສູນກາງພັກສະບັບລົງວັນທີ 26 ມັງ ກອນ 2023 ວ່າດ້ວຍການແຕ່ງຕັ້ງຄະນະປະຈຳພັກກະຊວງ ຜ່ານດຳລັດວ່າດ້ວຍການແຕ່ງຕັ້ງເລຂາຄະນະບໍລິຫານງານພັກລັດຖະມົນຕີກະຊວງການເງິນ ແລະເອກະສານກ່ຽວ ຂ້ອງ ໃນການຍົກຍ້າຍ ທ່ານ ບຸນໂຈມ ອຸບົນປະເສີດ ໄປຮັບໜ້າທີ່ໃໝ່ຢູ່ແຂວງສະຫວັນນະເຂດ ແລະແຕ່ງຕັ້ງ ທ່ານ ສັນຕິພາບ ພົມວິຫານ ເລຂາພັກແຂວງເຈົ້າແຂວງສະຫວັນນະເຂດມາຮັບໜ້າທີ່ໃໝ່ເປັນເລຂາຄະນະບໍລິຫານງານພັກ ລັດຖະມົນຕີກະຊວງການເງິນຜູ້ໃໝ່.

ໃນ​ພິ​ທີທ່ານນາຍົກລັດຖະມົນຕີ ໄດ້ໂອ້ລົມວ່າ: ການຊັບຊ້ອນໜ້າທີ່ຕໍາແໜ່ງລະຫວ່າງຂັ້ນສູນກາງ ແລະທ້ອງຖິ່ນມັນເປັນເລື່ອງປົກກະຕິຕຳແໜ່ງເທົ່າທຽມກັນ ແລະການຍົກຍ້າຍບໍ່ໃຫ້ໝາຍວ່າເປັນການບົກຜ່ອງຕໍ່ໜ້າທີ່ວຽກງານຂອງຜູ້ໃດຜູ້ໜຶ່ງແຕ່ຢ່າງໃດມັນເປັນການສ້າງເງື່ອນໄຂໃຫ້ພະນັກງານນໍາພາຄຸ້ມຄອງຍຸດທະສາດຂອງພັກ-ລັດ ໃຫ້ມີປະສົບການໃນການເຮັດວຽກຕົວຈິງຈາກການປະຕິບັດພຶດຕິກຳຕົວຈິງການລົງໄປທ້ອງຖິ່ນເປັນຜູ້ນໍາສູງສຸດຢູ່ຂັ້ນທ້ອງຖິ່ນກໍເພື່ອໄປເອົາປະສົບການພ້ອມນັ້ນທ່ານຍັງເນັ້ນໃຫ້ລັດຖະມົນຕີຜູ້ໃໝ່ສືບຕໍ່ນຳພາໝູ່ຄະນະຈັດຕັ້ງປະຕິບັດວຽກງານການເງິນໃຫ້ມີຜົນສຳເລັດ ແລະປັບປຸງແກ້ໄຂບັນຫາຂໍ້ຄົງຄ້າງໃນສະພາບປະຈຸບັນທີ່ເສດຖະກິດມີຄວາມຫຍຸ້ງຍາກຄຸ້ມຄອງລາຍຮັບ-ລາຍຈ່າຍໃຫ້ມີ ຄວາມທັນສະໄໝຄົ້ນຄວ້ານະໂຍບາຍຟື້ນຟູເສດຖະກິດ ແລະອື່ນໆ.

• 03/02/2023