ວາງສີລາລືກໂຄງການກໍ່ສ້າງຕຶກອາຄານ ຫຼັກໄຊ ຄອມເພຣັກເຊັນເຕີ ຢູ່ແຂວງໄຊສົມບູນ

ພິທີ ວາງສີລາລືກ ແລະ ເປີດການກໍ່ສ້າງຕຶກອາຄານ ຄົບວົງຈອນ ຫຼັກໄຊ ຄອມເພຣັກເຊັນເຕີ ຢູ່ແຂວງໄຊສົມບູນ ໄດ້ຈັດຂຶ້ນໃນວັນທີ 1 ກຸມພາ 2023 ຢູ່ຕິດກັບເດີ່ນຫໍຫຼັກເມືອງ ຂອງແຂວງ ໂດຍການເຂົ້າຮ່ວມຂອງ ທ່ານ ພອຍຄໍາ ຮຸ່ງບຸນຍວງ, ເຈົ້າແຂວງໄຊສົມບູນ ພ້ອມດ້ວຍຄະນະນຳແຂວງ, ມີ ທ່ານ ຄຳໄຊ ບຸນມີສີດາວົງ, ປະທານບໍລິສັດ ຫຼັກໄຊ ລົງທຶນ ຈຳກັດຜູ້ດຽວ ຕະຫຼອດຮອດພະແນກການ ອ້ອມຂ້າງແຂວງ, ຕາງໜ້າຈາກບັນດາບໍລິສັດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນໂອກາດຂຶ້ນນຳສະເໜີ ຄວາມເປັນມາ ແລະ ແຜນພັດທະນາໂຄງການ, ການບໍລິການ, ອົງປະກອບໂຄງການຕ່າງໆ ແລະ ມູນຄ່າການລົງທຶນ ທ່ານ ຄຳພໍໃຈ ບຸດທະລາດ, ຜູ້ອຳນວຍການບໍລິສັດ ຫຼັກໄຊ ຄອມເພຣັກ ໄຊສົມບູນ ຈຳກັດຜູ້ດຽວ ໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ຂອງໂຄງການ ຊຶ່ງມີຈຸດປະສົງເພື່ອປະກອບສ່ວນພັດທະນາເສດຖະກິດ-ສັງຄົມ ຂອງແຂວງໄຊສົມບູນ ໃຫ້ມີບາດກ້າວເຕີບໃຫຍ່ເຂັ້ມແຂງ ແນໃສ່ຮອງຮັບນັກທ່ອງທ່ຽວ ທັງພາຍໃນ, ຕ່າງແຂວງ ແລະ ນັກທ່ອງທ່ຽວຕ່າງປະເທດ ທີ່ຈະເຂົ້າມາທ່ອງທ່ຽວ ແຂວງໄຊສົມບູນ ໃນອະນາຄົດ ພ້ອມທັງຊຸກຍູ້ສົ່ງເສີມປະຊາຊົນບັນດາເຜົ່າ ໃຫ້ມີວຽກເຮັດງານທຳທີ່ແນ່ນອນ ແລະ ສ້າງໃຫ້ແຂວງໄຊສົມບູນ ກາຍເປັນຈຸດເຊື່ອມຈອດ-ເຊື່ອມໂຍງ ກັບຫຼາຍທິດຫຼາຍຝ່າຍ ຕາມ 5 ທ່າແຮງ ທັງສະເພາະໜ້າ ແລະ ຍາວນານ. ຊຶ່ງໂຄງການດັ່ງກ່າວ ໄດ້ກຳນົດແຜນການກໍ່ສ້າງໃນເບື້ອງຕົ້ນ 48 ເດືອນ, ລວມມູນຄ່າປະເມີນເບື້ອງຕົ້ນໃນການພັດທະນາໂຄງການ ທັງໝົດ ຈຳນວນ 65.000.000.000 ຕື້ກີບ ( ຫົກສິບຫ້າຕື້ກີບ ) ຊຶ່ງແຫຼ່ງທຶນໃນການພັດທະນາ ແມ່ນການລົງທຶນຂອງບໍລິສັດ 100% ໂດຍມີສິດນໍາໃຊ້ທີ່ດິນລັດແບບມີກໍານົດ 50 ປີ ໃນເນື້ອທີ່ 5.477 ຕາແມັດ. ໃນໂອກາດມີຄຳເຫັນກ່າວເປີດພິທີ ທ່ານເຈົ້າແຂວງໄຊສົມບູນ ໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ຂອງໂຄງການກໍ່ສ້າງຕຶກອາຄານ ຄົບວົງຈອນ ຫຼັກໄຊ ຄອມເພຣັກເຊັນເຕີ ເມື່ອໂຄງການດັ່ງກ່າວ ສຳເລັດການກໍ່ສ້າງ ມັນຈະຊ່ວຍຍົກລະດັບຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ ໂດຍສະເພາະ ແມ່ນເຮັດໃຫ້ທ່າແຮງການທ່ອງທ່ຽວ ໄດ້ຮັບການພັດທະນາຍິ່ງໆ ຂຶ້ນ ແລະ ສ້າງເງື່ອນໄຂທີ່ສະດວກ ໃຫ້ທ່າແຮງການເຊື່ອມໂຍງ-ເຊື່ອມຈອດ ກັບ ຕ່າງແຂວງ ໄດ້ຫຼາຍຂຶ້ນກວ່າເກົ່າ ເນື່ອງຈາກວ່າໂຄງການນີ້ ຕິດພັນກັບການທ່ອງທ່ຽວ ແລະ ການບໍລິການ ຊຶ່ງຈະເຮັດໃຫ້ເມືອງອະນຸວົງ ກໍຄືແຂວງໄຊສົມບູນ ມີໂສມໜ້າອັນໃໝ່ ທັງເປັນໂຄງການແບບຢ່າງທີ່ດີ ໃຫ້ຫຼາຍໆ ໂຄງການ ທີ່ຈະຫັນໜ້າເຂົ້າມາລົງທຶນ ຢູ່ແຂວງໄຊສົມບູນ ໃນອະນາຄົດ. ນອກນີ້ ຍັງຈະເປັນສະຖານທີ່ຮອງຮັບການຄ້າ-ການບໍລິການ ແລະ ການທ່ອງທ່ຽວ ໄດ້ເປັນຢ່າງດີ ຊຶ່ງທ່ານເຊື່ອໝັ້ນວ່າໂຄງການດັ່ງກ່າວ ຈະບັນລຸຜົນສຳເລັດການກໍ່ສ້າງໃນ 48 ເດືອນ ທີ່ກຳນົດໄວ້. ພ້ອມດ້ຽວກັນນີ້ ຄອບຄົວຂອງ ທ່ານ ນາງ ບົວວັນ ບຸນມີສີດາວົງ ພ້ອມດ້ວຍລູກຫຼານ ຍັງໄດ້ນຳເອົາເຄື່ອງນຸ່ງຫົ່ມ ແລະ ເຄື່ອງອຸປະໂພກ-ບໍລິໂພກ ຈຳນວນໜຶ່ງ ມາມອບຊຸກຍູ້ໂຮງຮຽນ ມສ ກິນນອນຊົນເຜົ່າ ແຂວງໄຊສົມບູນ ຕື່ມອີກ. ຈາກນັ້ນ ໄດ້ມີພິທີ ຕັດແຖບຜ້າເປີດການວາງສີລາລືກການກໍ່ສ້າງ ຕຶກອາຄານ ຄົບວົງຈອນ ຫຼັກໄຊ ຄອມເພຣັກເຊັນເຕີ ໄຊສົມບູນ ພ້ອມທັງລັ່ນຄ້ອງ 9 ບາດ ເພື່ອເປັນສິລິມຸງຄຸນ ແລະ ຊວ້ານດິນ, ຫີນ-ຊາຍ ຖົມສີລາລືກ ຢ່າງເປັນທາງການ.

ບກ: ຄໍາສາວ ເລືອງຄໍາທິບ ຂ່າວ: ຈິນລະວອນ ວໍລະສົມບູນ

แชร์