ຫາລືຄວາມຄືບໜ້າແຜນງານວັກຊິນໄຂ້ຫວັດໃຫຍ່ໃນບັນດາຄູ່ຮ່ວມງານ

ກະຊວງສາທາລະນະສຸກຈັດກອງປະຊຸມສາກົນປະຈຳປີ ຂອງຄູ່ຮ່ວມພັດທະນາດ້ານການແນະນຳການໃຫ້ວັກຊິນກັນພະຍາດໄຂ້ຫວັດໃຫຍ່ ຄັ້ງທີ VI ໃນວັນທີ 31 ມັງກອນຜ່ານມາ ເພື່ອທົບທວນການຈັດຕັ້ງປະຕິບັດງານ ແລະ ຄວາມຄືບໜ້າຂອງແຜນງານວັກຊິນ ໄຂ້ຫວັດໃຫຍ່ ໃນບັນດາປະເທດຄູ່ຮ່ວມງານຂອງການພັດທະນາ ການຮ່ວມມືດ້ານການແນະນຳວັກຊິນກັນໄຂ້ຫວັດໃຫຍ່ (PIVI), ກຳນົດແນວທາງການປະຕິບັດງານທີ່ດີທີ່ສຸດສຳລັບແຜນງານໃຫ້ວັກຊິນກັນໄຂ້ຫວັດໃຫຍ່, ແລກປ່ຽນບົດຮຽນ-ປະສົບການ ຊຶ່ງກັນ ແລະກັນລະຫວ່າງບັນດາປະເທດຄູ່ຮ່ວມງານ ໂດຍເນັ້ນໃສ່ການປັບປຸງແຜນງານ, ລະບຸຄວາມທ້າທາຍຕ່າງໆ ແລະທິດທາງແກ້ໄຂສຳລັບການບໍລິການໃຫ້ວັກຊິນໄຂ້ຫວັດໃຫຍ່ໃນລະຫວ່າງການບໍລິການໃຫ້ວັກຊິນກັນໂຄວິດ-19 ແລະ ທົບທວນຄືນເຄື່ອງມືທີ່ຖືກພັດທະນາຂຶ້ນໃໝ່ສຳລັບການປະເມີນແຜນງານ. ພ້ອມນີ້, ຍັງໄດ້ປຶກສາຫາລືກ່ຽວກັບຄວາມກ້າວໜ້າທາງເຕັກໂນໂລຊີ ແລະການປ່ຽນແປງທາງດ້ານຄຳແນະໃນທົ່ວໂລກ.

ໂອກາດນີ້ ທ່ານ ດຣ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ຮູ້ວ່າ: ສຳລັບ ສປປ ລາວ ການພັດທະນາແຜນງານວັກຊິນ ກັນໄຂ້ຫວັດໃຫຍ່ ຖືເປັນວຽກບູລິມະສິດຂອງລັດຖະບານ, ໃນລະຫວ່າງປີ 2012-2017 ສປປ ລາວ ໄດ້ມີການວາງແຜນ ແລະໄດ້ຈັດຕັ້ງປະຕິບັດບັນດາກິດຈະກຳເພື່ອພັດທະນາແຜນງານວັກຊິນໄຂ້ຫວັດໃຫຍ່ ຊຶ່ງເປັນໜຶ່ງໃນແຜນງານການບໍລິການວັກຊິນແຫ່ງຊາດ, ຜົນສຳເລັດ ແລະ ຄວາມຍືນຍົງຂອງການພັດທະນາແຜນງານດັ່ງກ່າວໃນ ສປປ ລາວ ຖືໄດ້ວ່າເປັນບົດຮຽນສຳຄັນສຳລັບບັນດາປະເທດທີ່ມີລາຍໄດ້ຕໍ່າຫາປານກາງ ທີ່ມີຄວາມສົນໃຈໃນການລິເລີ່ມ ຫຼືຂະຫຍາຍແຜນງານໃຫ້ວັກຊິນໄຂ້ຫວັດໃຫຍ່ໃນປະເທດຂອງຕົນ.

ໃນປີ 2012, ສປປ ລາວ ໄດ້ກາຍເປັນປະເທດທຳອິດຂອງບັນດາປະເທດລາຍໄດ້ຕໍ່າທີ່ໄດ້ລິເລີ່ມແຜນງານວັກຊິນໄຂ້ຫວັດໃຫຍ່ຫຼັງຈາກທີ່ໄດ້ມີການນຳໃຊ້ ວັກຊິນໄຂ້ຫວັດໃຫຍ່ໃນໄລຍະທີ່ມີການແພ່ລະບາດຂອງ H1N1 ໃນລະຫວ່າງ ປີ 2009-2010. ໃນໄລຍະດັ່ງກ່າວ ສປປ ລາວ ໄດ້ຮັບວັກຊິນ H1N1 ຈາກອົງການອະນາໄມໂລກ ຈຳນວນ 1 ລ້ານໂດສ ເພື່ອສັກໃຫ້ບັນດາກຸ່ມເປົ້າໝາຍເຊັ່ນ: ແມ່ຍິງຖືພາ, ພະນັກງານແພດ, ຜູ້ທີ່ມີໂລກປະຈຳຕົວ ແລະ ຜູ້ທີ່ມີອາຍຸ 65 ຂຶ້ນໄປ. ປະສົບການດັ່ງກ່າວໄດ້ສ້າງຄວາມສົນໃຈ ແລະ ເປັນແຮງຜັກດັນໃຫ້ບັນດາພາກສ່ວນທີ່ກ່ຽວຂ້ອງຂອງລັດກໍຄືອົງການຈັດຕັ້ງສາກົນ ໃນການສ້າງຄວາມເຂັ້ມແຂງໃຫ້ກັບລະບົບເຝົ້າລະວັງ ແລະການກຽມຄວາມພ້ອມຮັບມືກັບການແພ່ລະບາດຂອງໄຂ້ຫວັດໃຫຍ່, ພ້ອມກັນນັ້ນກໍໄດ້ຜັກດັນໃຫ້ມີການລິເລີ່ມໂຄງການໃຫ້ວັກຊິນຕາມລະດູການພາຍໃນປະເທດອີກດ້ວຍ.

ທ່ານ ດຣ. ໄພວັນ ແກ້ວປະເສີດ ຍັງໃຫ້ຮູ້ອີກວ່າ: ການຮ່ວມມືດ້ານ PIVI ໄດ້ລິເລີ່ມຂຶ້ນໃນປີ 2013 ໂດຍຜ່ານການເຮັດວຽກຮ່ວມກັນລະຫວ່າງສູນຄວບຄຸມ ແລະ ກັນພະຍາດຂອງສະຫະລັດອາເມລິກາ, ລັດຖະບານແຫ່ງ ສປປ ລາວ ແລະຄະນະສະເພາະກິດເພື່ອສຸຂະພາບໃນທົ່ວໂລກພາຍໃຕ້ການຮ່ວມມືກັບສູນຄວບຄຸມ ແລະ ປ້ອງກັນພະຍາດ ຂອງ ສ ອາເມລິກາ ແລະອົງການອະນາໄມໂລກເຊິ່ງລັດຖະບານລາວ ໄດ້ມີການຄົ້ນຄວ້າວິໄຈ ແລະຈັດຕັ້ງປະຕິບັດບັນດາກິດຈະກຳການເຝົ້າລະວັງ ເພື່ອສ້າງຫລັກຖານເຊີງປະຕິບັດສຳລັບການໃຫ້ວັກຊິນ ແລະມີສ່ວນຮ່ວມໃນການຮ່ວມມືດ້ານນະວັດຕະກຳແນໃສ່ສະໜັບສະໜູນການພັດທະນາແຜນງານບໍລິການວັກຊິນຕາມລະດູການພາຍໃນປະເທດ.
ຂປລ. ພາບ, ຂ່າວ: ມະນີທອນ ສູນຂ່າວສານການແພດສຸຂະສຶກສາ

แชร์