ນາຍົກ ຕ້ອນຮັບປະທານຄະນະມິດຕະພາບລັດຖະສະພາ ມົງໂກລີ-ລາວ

ໃນວັນທີ 30 ມັງກອນ 2023 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຢໍ ບາທາຣ໌ບີເລັກ(Yo. BAATARBILEG) ສະມາຊິກສະພາຄູຣານໃຫຍ່, ປະທານຄະນະມິດຕະພາບລັດຖະສະພາ ມົງໂກລີ-ລາວ ປະຈໍາສະພາຄູຣານໃຫຍ່ ແຫ່ງ ມົງໂກລີ ພ້ອມຄະນະ ໃນໂອກາດມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ ສປປ ລາວ ໃນລະຫວ່າງ ວັນທີ 28 ມັງກອນ ຫາ ວັນທີ 3 ກຸມພາ 2023.

ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ ທ່ານ ຢໍ ບາທາຣ໌ບີເລັກ ພ້ອມຄະນະ ທີ່ໄດ້ມາຢ້ຽມຢາມ ແລະເຄື່ອນໄຫວເຮັດວຽກ ຢູ່ ສປປ ລາວ ໃນຄັ້ງນີ້ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນ ແລະການຮ່ວມມືລະຫວ່າງ ລາວ-ມົງໂກລີ, ມົງໂກລີ-ລາວ ທີ່ມີມູນເຊື້ອອັນດີງາມມາແຕ່ດົນນານແລ້ວນັ້ນ ໃຫ້ນັບມື້ແໜ້ນແຟ້ນ ແລະເກີດດອກອອກຜົນເປັນກ້າວໆ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ຕີລາຄາສູງຕໍ່ສາຍພົວພັນ ແລະການຮ່ວມມືລະຫວ່າງ ສປປ ລາວ ແລະມົງໂກລີ ໃນໄລຍະຜ່ານມາ ເຫັນວ່າ ການນຳຂັ້ນສູງຂອງສອງປະເທດໄດ້ແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ ໂດຍສະເພາະໄລຍະກ່ອນເກີດການແຜ່ລະບາດຂອງພະຍາດໂຄວິດ-19. ຄຽງຄູ່ກັນນັ້ນ, ບັນດາຂະແໜງການ ແລະທ້ອງຖິ່ນຈຳນວນໜຶ່ງກໍມີການພົວພັນຮ່ວມມືກັນ ໃນຂົງເຂດວຽກງານຕ່າງໆ ເປັນຕົ້ນ ຂະແໜງກະສິກຳ, ສາທາລະນະສຸກ, ສຶກສາ (ການພັດທະນາຊັບພະຍາກອນມະນຸດ) ແລະ ອື່ນໆ ຊຶ່ງການພົວພັນຮ່ວມມືເຫລົ່ານັ້ນ ລ້ວນແຕ່ມີປະສິດທິພາບ ແລະ ປະສິດທິຜົນ ເປັນຢ່າງດີ. ອັນພົ້ນເດັ່ນ ໃນປີ 2022 ຜ່ານມາ ເປັນປີຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລາວ ແລະ ມົງໂກລີ, ມົງໂກລີ-ລາວ ໂດຍໄດ້ຈັດກິດຈະກຳຕ່າງໆ ເພື່ອສະເຫລີມສະຫລອງວັນສຳຄັນທາງປະຫວັດສາດດັ່ງກ່າວມີເນື້ອໃນ ແລະ ເປັນຂະບວນການຟົດຟື້ນຢ່າງດີ. ນອກນັ້ນ, ທ່ານນາຍົກລັດຖະມົນຕີ ຍັງໄດ້ຝາກຄວາມຢ້ຽມ ຢາມຖາມຂ່າວ ແລະ ຄຳເຊື້ອເຊີນຜ່າທ່ານ ຢໍ ບາທາຣ໌ບີເລັກ ໄປຍັງທ່ານນາຍົກລັດຖະມົນຕີ ແລະ ທ່ານປະທານສະພາຄູຣານໃຫຍ່ ແຫ່ງ ມົງໂກລີ ເພື່ອມາຢ້ຽມຢາມ ສປປ ລາວ ໃນເວລາທີ່ເໝາະສົມ, ທັງໃຫ້ຄຳໝັ້ນສັນຍາວ່າ ຈະສືບຕໍ່ໃຫ້ການສະໜັບສະໜູນ ຢ່າງສຸດຄວາມສາມາດ ເພື່ອເຮັດໃຫ້ການພົວພັນຮ່ວມມື ລະຫວ່າງ ສປປ ລາວ ແລະ ມົງໂກລີ ນັບມື້ເຕີບໃຫຍ່ຂະຫຍາຍຕົວ ບໍ່ຢຸດຢັ້ງ ໂດຍຫວັງຢ່າງຍິ່ງວ່າ ໃນຕໍ່ໜ້າ ມົງໂກລີ ຈະສືບຕໍ່ໃຫ້ການຊ່ວຍເຫລືອ ແລະສະໜັບສະໜູນ ສປປ ລາວ ໃນຂອບສອງຝ່າຍ ແລະຫລາຍຝ່າຍຕື່ມອີກ.

ໂອກາດດຽວກັນ, ທ່ານ ຢໍ ບາທາຣ໌ບີເລັກ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານນາຍົກລັດຖະມົນຕີ, ພ້ອມທັງລາຍງານໃຫ້ຊາບກ່ຽວກັບຈຸດປະສົງ ແລະຜົນສຳເລັດເບື້ອງຕົ້ນໃນການເຄື່ອນໄຫວເຮັດວຽກຢູ່ ສປປ ລາວ ສອງມື້ຜ່ານມາ. ພ້ອມນັ້ນ, ກໍໄດ້ສະເໜີທ່ານນາຍົກລັດຖະມົນຕີສືບຕໍ່ຊຸກຍູ້ການພົວພັນຮ່ວມມືທາງດ້ານເສດຖະກິດຂອງສອງປະເທດໂດຍສະເພາະການຄ້າ, ການລົງທຶນ, ການຜະລິດກະສິກຳ, ການທ່ອງທ່ຽວ ແລະອື່ນໆໃຫ້ນັບມື້ມີຜົນສຳເລັດຫລາຍຂຶ້ນເປັນກ້າວໆ, ເນື່ອງຈາກວ່າໃນເງື່ອນໄຂປັດຈຸບັນແມ່ນມີສິ່ງອຳນວຍຄວາມສະດວກຫລາຍຂຶ້ນກວ່າເກົ່າໂດຍສະເພາະການຂົນສົ່ງຜ່ານເສັ້ນທາງລົດໄຟ ລາວ-ຈີນ, ລວມທັງແຜນການຮ່ວມມືກັນໃນຕໍ່ໜ້າໃນການພິຈາລະນາເປີດສາຍການບິນໂດຍກົງ ລະຫວ່າງ ລາວ-ມົງໂກລີ ແລະມົງໂກລີ-ລາວ.
ຂ່າວ: ກົມປະຊາສຳພັນ ຫສນຍ

แชร์