ນາຍົກລັດຖະມົນຕີ ເຄື່ອນໄຫວຊຸກຍູ້ພື້ນຖານການຜະລິດກະສິກຳ

ໃນວັນທີ 29 ມັງກອນ 2023 ທີ່ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມຄະນະເຄື່ອນໄຫວຢ້ຽມຢາມໂຄງການກໍ່ສ້າງໂຮງງານຜະລິດຫົວອາຫານສັດລາວຂອງບໍລິສັດ ລາວໂຮມມາດ ຂາເຂົ້າ-ຂາອອກ ຈຳກັດຜູ້ດຽວ ຢູ່ບ້ານໃໝ່ ເມືອງໂພນໂຮງ ແຂວງວຽງຈັນ ແລະ ໂຄງການກໍ່ສ້າງຟາມໄກ່ສຸກຈະເລີນຢູ່ບ້ານນາຂ່າ ເມືອງນາຊາຍທອງ ນະຄອນຫຼວງວຽງຈັນ ໂດຍມີທ່ານຮອງເຈົ້າແຂວງວຽງຈັນ,ຮອງເຈົ້າຄອງນະຄອນຫລວງວຽງຈັນ,ການນຳເມືອງ ແລະຜູ້ຕາງໜ້າພາກສ່ວນກ່ຽວຂ້ອງໃຫ້ການຕ້ອນຮັບ.

ໃນໂອກາດນີ້, ໄດ້ຮັບຟັງການລາຍງານຫຍໍ້ກ່ຽວກັບສະພາບລວມຂອງໂຄງການຈາກຜູ້ຕາງໜ້າບໍລິສັດຜູ້ລົງທຶນເຫັນວ່າ: ໂຄງການກໍ່ສ້າງໂຮງງານຜະລິດຫົວອາຫານສັດລາວ ມີເນື້ອທີ່ 5 ເຮັກຕາ, ໄດ້ເລີ່ມກໍ່ສ້າງໃນປີ 2020, ກໍ່ສ້າງສຳເລັດສົມບູນ ສາມາດທົດລອງຜະລິດ ໃນທ້າຍປີ 2022 ແລະ ຈະໄດ້ດໍາເນີນການຜະລິດຢ່າງເປັນປົກກະຕິໃນເດືອນມີນາ 2023 ເປັນຕົ້ນໄປເຊິ່ງປະກອບມີອາຄານຫລັກທັງໝົດ 3 ຫລັງ ຄື: ອາຄານສາງເກັບວັດຖຸດິບ,ອາຄານກົນຈັກທຳການຜະລິດ ແລະອາຄານສາງເກັບມ້ຽນຜະລິດຕະພັນສຳເລັດຮູບ; ມີມູນຄ່າການລົງທຶນກໍ່ສ້າງທັງໝົດ 130 ຕື້ກວ່າກີບ; ມີກໍາລັງການຜະລິດ 10 ໂຕນ/ຊົ່ວໂມງ (ເບື້ອງຕົ້ນຄາດວ່າຈະຜະລິດ 8 ຊົ່ວໂມງ/ມື້ ອີງຕາມຄວາມຕ້ອງການຂອງຕະຫລາດ) ແລະ ຈະຜະລິດຫົວອາຫານ 2 ຊະນິດ ຄື: ຫົວອາຫານໝູ ປະມານ 20.000 ໂຕນ/ປີ ແລະ ຫົວອາຫານສັດປີກ 10.000 ໂຕນ/ປີ. ໃນນັ້ນ, ຄວາມຕ້ອງການວັດຖຸດິບ ເພື່ອສະໜອງປ້ອນເຂົ້າໂຮງງານແມ່ນ ສາລີ 5.000 ໂຕນ/ປີ, ມັນຕົ້ນແຫ້ງ 4.000 ໂຕນ/ປີ, ເຂົ້າປຽນ 4.000 ໂຕນ/ປີ, ກາກຖົ່ວເຫຼືອງ 6.000 ໂຕນ/ປີ, ຮໍາ 2.500 ໂຕນ/ປີ.

ສໍາລັບໂຄງການກໍ່ສ້າງຟາມໄກ່ສຸກຈະເລີນ ມີເນື້ອທີ່ຈໍານວນ44 ເຮັກຕາ, ເລີ່ມກໍ່ສ້າງ ໃນຕົ້ນປີ 2022, ປັດຈຸບັນ ສຳເລັດ 96% ແລະ ຈະໃຫ້ສຳເລັດ 100% ໃນທ້າຍເດືອນມີນາ 2023 ໂດຍນໍາໃຊ້ວັດສະດຸທີ່ມີຄຸນນະພາບ, ກົນຈັກ ແລະ ເຕັກນິກຕ່າງໆ ທີ່ທັນສະໄໝ ເປັນຕົ້ນ ລະບົບການໃຫ້ນໍ້າ, ໃຫ້ອາຫານ, ການຈັດເກັບ, ຄັດແຍກ ແລະ ລຳລຽງໄຂ່, ການມ້ຽນ-ອະນາໄມ, ບຳບັດ ແລະ ລຳລຽງຂີ້ໄກ່; ມີອາຄານລ້ຽງໄກ່ທັງໝົດ 10 ຫລັງ (ໄກ່ນ້ອຍ 2 ຫລັງ ແລະ ໄກ່ໃຫຍ່ 8 ຫລັງ), ສາມາດບັນຈຸໄກ່ໄດ້ທັງໝົດ 1 ລ້ານໂຕ, ຄາດວ່າ ຈະສາມາດຜະລິດໄຂ່ໄກ່ໄດ້ປະມານ 800.000-850.000 ໜ່ວຍ/ມື້.

ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ມີຄຳເຫັນໂອ້ລົມຕໍ່ຜູ້ລົງທຶນ ແລະພາກສ່ວນທີ່ກ່ຽວຂ້ອງໂດຍທ່ານໄດ້ສະແດງຄວາມຍ້ອງຍໍຊົມເຊີຍທີ່ຜູ້ລົງທຶນໄດ້ຕັດສິນໃຈ ເລືອກລົງທຶນໃນກິດຈະການສ້າງພື້ນຖານການຜະລິດ ທີ່ສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາເສດຖະກິດ-ສັງຄົມຂອງປະເທດ ໃນປັດຈຸບັນ ກໍຄື ສະເພາະໜ້າ ໂດຍສະເພາະແມ່ນປະ ກອບສ່ວນເຂົ້າໃນການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສົ່ງເສີມການຜະລິດພາຍໃນໃຫ້ເຂັ້ມແຂງ ແລະ ມີປະລິມານຫລາຍຂຶ້ນ, ເຮັດໃຫ້ຄົນລາວ ໄດ້ຊົມໃຊ້ຜະລິດຕະພັນພາຍໃນທີ່ມີຕົ້ນທຶນການຜະລິດຕໍ່າກໍຄືເພື່ອຫລຸດຜ່ອນການນຳເຂົ້າສິນຄ້າ, ປະກອບສ່ວນເຂົ້າໃນການຊຸກຍູ້ສົ່ງເສີມປະຊາຊົນ ທຳການຜະລິດ, ມີວຽກເຮັດງານທຳໂດຍສະເພາະການລ້ຽງສັດໃຫ້ເປັນຂະບວນການທີ່ພົ້ນເດັ່ນຫລາຍຂຶ້ນ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ເນັ້ນໃຫ້ບໍລິສັດ ສົມທົບກັບຂະແໜງການ, ທ້ອງຖິ່ນ ແລະ ພາກສ່ວນກ່ຽວຂ້ອງເອົາໃຈໃສ່ຕໍ່ຂອດການຜະລິດ ແລະ ສະໜອງວັດຖຸດິບເຂົ້າໂຮງງານໃຫ້ສາມາດທຳການຜະລິດໄດ້ເປັນປົກກະຕິ ແລະເຕັມປະສິດທິພາບໂດຍສະເພາະການຮັບປະກັນໃຫ້ມີແຫລ່ງການຜະລິດວັດຖຸດິບທີ່ຊັດເຈນ ແລະໝັ້ນຄົງ,ລວມທັງຂອດການຈໍາໜ່າຍຫົວອາຫານໃຫ້ມີລະບົບການຮອງຮັບຄັກແນ່,ທັງນີ້ກໍເພື່ອຄວາມຍືນຍົງຂອງໂຮງງານ;ເອົາໃຈໃສ່ຕໍ່ດ້ານສິ່ງແວດລ້ອມຂອງໂຮງງານ ແລະຟາມລ້ຽງໄກ່ໃຫ້ດີເພື່ອບໍ່ເປັນມົນລະພິດທາງດ້ານສິ່ງແລດລ້ອມ ແລະສັງຄົມ; ຄົ້ນຄວ້າແຜນການຈໍາໜ່າຍ ແລະປຸງແຕ່ງໄຂ່ ໃຫ້ເປັນຜະລິດຕະພັນທີ່ຫລາກຫລາຍ, ມີຄຸນນະພາບ ແລະສາມາດຮັບປະກັນສະໜອງຄວາມຕ້ອງການຂອງສັງຄົມເປັນປົກກະຕິ.
ຂປລ. ຂ່າວ-ພາບ: ກົມປະຊາສຳພັນ ຫສນຍ.

แชร์