ປກສ ເມືອງສາມັກຄີໄຊ ທຳລາຍອາວຸດລ່າເນື້ອ, ເຄື່ອງມືຫາປາ ແລະພາຫະນະທີ່ຖືກດັດແປງ

ໃນວັນທີ 27 ມັງກອນ 2023 ປກສ ເມືອງສາມັກຄີໄຊ ແຂວງອັດຕະປື ໄດ້ຈັດພິທີທໍາລາຍອາວຸດລ່າເນື້ອ, ເຄື່ອງມືຫາປາ ແລະ ພາຫະນະທີ່ຖືກດັດແປງແບບຜິດກົດໝາຍຂື້ນຢູ່ທີ່ກອງບັນຊາການດັ່ງກ່າວ, ໂດຍການເຂົ້າຮ່ວມຂອງທ່ານ ເພັດມີໄຊ ຄຳພັກດີ ເຈົ້າເມືອງສາມັກຄີໄຊ, ມີທ່ານ ພັທ ວົງສັກ ແກ້ວວົງພິມ ຫົວໜ້າກອງບັນຊາການປ້ອງກັນຄວາມສະຫງົບເມືອງ, ບັນດາທ່ານໃນຄະນະພັກ-ຄະນະບັນຊາ, ນາຍ ແລະພົນຕຳຫຼວດ, ແຂກຖືກເຊີນ, ອຳນາດການປົກຄອງ 28 ບ້ານ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ພັທ ຕິກຄຳ ນາມແສນວົງ ຮອງຫົວໜ້າກອງບັນຊາການປ້ອງກັນຄວາມສະຫງົບເມືອງ ແລະ ທ່ານ ພັຕ ຄຳໃບ ແກ້ວພາວົງ ຮອງພະແນກຕຳຫຼວດເມືອງ ໃຫ້ຮູ້ວ່າ: ໂດຍປະຕິບັດຕາມ ດຳລັດວ່າດ້ວຍກົດຈາລະຈອນທາງບົກ ສະບັບເລກທີ 615/ລບ, ລົງວັນທີ 9 ທັນວາ 2020, ດຳລັດວ່າດ້ວຍການປັບໃໝ ແລະ ມາດຕະການອື່ນຕໍ່ຜູ້ລະເມີດກົດໝາຍ ແລະລະບຽບການຈາລະຈອນທາງບົກ, ຄໍາສັ່ງເລກທີ 1163/ຈຂ,ອປ ລົງວັນທີ 26 ກັນຍາ 2014 ວ່າດ້ວຍການກວດກາ,ຄຸ້ມຄອງວຽກງານອາຊີບພິເສດ-ພາຫະນະພິເສດໃນທົ່ວແຂວງອັດຕະປື, ຄຳສັ່ງຂອງທ່ານເຈົ້າເມືອງ ສະບັບເລກທີ 572/ຈມ ລົງວັນທີ 22 ທັນວາ 2022 ວ່າດ້ວຍການເພີ່ມທະວີຄວາມເຂັ້ມງວດໃນການສະກັດກັ້ນການລ່າເນື້ອ ແລະ ການນຳໃຊ້ເຄື່ອງມືຫາປາແບບຜິດກົດໝາຍ, ແຈ້ງການເຈົ້າເມືອງສະບັບເລກທີ 461/ຈມ, ລົງວັນທີ 5 ສິງຫາ 2022, ເລື່ອງເພີ່ມທະວີຄວາມເຂັ້ມງວດໃນການກວດກາລາດຕະເວນ ແລະໃຊ້ມາດຕະການຕໍ່ບຸກຄົນ, ກຸ່ມຄົນທີ່ຫາປາຕາມລຳນໍ້າສາຍເຊ, ຫ້ວຍໜອງ, ຄອງບຶງຕ່າງໆດ້ວຍເຄື່ອງມືຜິດກົດໝາຍ, ທີ່ພົວພັນເຖິງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ, ດັ່ງນັ້ນ, ກຳລັງ ປກສ ເມືອງຈຶ່ງໄດ້ເອົາໃຈໃສ່ໃນການກວດກາຄຸ້ມຄອງພົນລະເມືອງໃນການທຳມາຫາກິນ, ການດຳລົງຊີວິດທີ່ບໍ່ຖືກຕ້ອງຕາມລະບຽບກົດໝາຍ, ໂດຍສະເພາະແມ່ນການຕິດຕາມກວດກາ ແລະ ຢຶດອາວຸດລ່າເນື້ອ, ທາດແຕກ, ທາດລະເບີດ, ເຄື່ອງມືຊ໋ອດປາ ແລະພາຫະນະທີ່ຖືກດັດແປງ, ຈາກຜູ້ລະເມີດຕໍ່ລະບຽບກົດໝາຍເພື່ອນຳມາທຳລາຍຖິ້ມ, ເຊິ່ງອາວຸດລ່າເນື້ອ, ເຄື່ອງມືຫາປາ ແລະພາຫະນະທີ່ຖືກດັດແປງທີ່ນຳມາທຳລາຍໃນຄັ້ງນີ້, ປະກອບມີປືນແກັບຈຳນວນ 440 ກະບອກ, ໝໍ້ຊ໋ອດ 41 ໜ່ວຍ ແລະ ພະຫະທີ່ຖືກດັດແປງອີກຈຳນວນໜຶ່ງໃນນັ້ນມີທໍ່ດັດແປງ 58 ທໍ່, ຢາງນ້ອຍທີ່ບໍ່ໄດ້ມາດຖານ 50 ເສັ້ນ, ຕາສະປອດໄລ໋ຈຳນວນ 2 ອັນ.

แชร์