ຈຳປາສັກຖະແຫຼງ ງານບຸນມະໂຫລານກາເຟ-ຊາ ແລະຜົນຜະລິດກະສິກຳພູພຽງບໍລະເວນ ປະຈຳປີ 2023 ທີ່ເມືອງປາກຊ່ອງ

ໃນວັນທີ 27 ມັງກອນ 2023 ສະມາຄົມກາເຟລາວ ຮ່ວມກັບພະແນກການກ່ຽວຂ້ອງໄດ້ຈັດພິທີຖະແຫຼງການກ່ຽວກັບງານບຸນມະໂຫລານກາເຟ-ຊາ ແລະຜົນຜະລິດກະສິກຳພູພຽງບໍລະເວນ ປະຈຳປີ 2023 ທີ່ຈະໄດ້ຈັດຂຶ້ນໃນວັນທີ 2-4 ກຸມພານີ້ ທີ່ເມືອງປາກຊ່ອງ ແຂວງຈຳປາສັກ ໂດຍການເປັນປະທານຂອງທ່ານ ນາງ ບຸນເຮືອງ ແຄລໍ ລິດດັງ ປະທານສະມາຄົມກາເຟລາວ, ທ່ານ ຄຳ ນິລະວົງ ຮອງຫົວໜ້າພະແນກກະສິກຳ ແລະປ່າໄມ້ແຂວງ, ທ່ານ ອະພິວັດ ສົມບູນຂັນ ຮອງຫົວໜ້າພະແນກອຸດສາຫະກຳ ແລະການຄ້າແຂວງ, ມີຄະນະບໍລິຫານງານ, ສະມາຊິກສະມາຄົມ, ສະພາການຄ້າ ແລະອຸດສາຫະກຳແຂວງສື່ມວນຊົນ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໂອກາດນີ້ທ່ານ ນາງ ບຸນເຮືອງ ແຄລໍ ລິດດັງ ປະທານສະມາຄົມກາເຟລາວ ໄດ້ຖະແຫລງບາງຕອນສຳຄັນວ່າ: ງານບຸນມະໂຫລານກາເຟ-ຊາ ແລະຜົນຜະລິດກະສິກາ ປູພຽງບໍລະເວນ ປີ 2023 ທີ່ ເມືອງປາກຊ່ອງ ແຂວງຈໍາປາສັກ ໃນທັງວັນທີ 2 - 4 ກຸມພ 2023 ນີ້ ແລະໃນປີນີ້ກໍແມ່ນການສະເຫຼີມສະຫຼອງ ຄົບຮອບ 29 ປີ ການສ້າງຕັ້ງສະມາຄົມກາເຟລາວ.

ພູພຽງບໍລະເວນ ເປັນປັນແຜ່ນດິນຄໍາ ສົມຄໍາຊ່າລື, ມີສະພາບອາກາດເຢັນຕະຫຼອດປີ, ມີປະລິມານນໍ້າຝົນຫຼາຍ ແລະຝົນຕົກແກ່ຍາວເປັນເວລາຫຼາຍເດືອນກ່ວາຂົງເຂດອື່ນໆໃນທົ່ວປະເທດ, ເປັນພູພຽງທີ່ໃຫ້ກໍາເນີດແມ່ນນໍ້າຫຼາຍສາຍທັງຢູ່ເທິງໜ້າດິນ ແລະໃຕ້ດິນ. ອໍານວຍຄວາມສະດວກໃຫ້ແກ່ການພັດທະນາເສດຖະກິດ - ສັງຄົມຢ່າງຮອບດ້ານ. ພູພຽງບໍລະເວນ ເປັນພື້ນທີ່ເໝາະສົມແກ່ການປູກພືດຜັກ - ໝາກໄມ້ເມືອງໜາວໄດ້ຫຼາຍຊະນິດໂດຍສະເພາະແມ່ນເໝາະສົມແກ່ການປູກກາເຟ ທີ່ມີຄຸນນະພາບ, ມີລົດຊາດທີ່ເປັນເອກະລັກສະເພາະ ຊຶ່ງມີຊື່ສຽງທຽບເທົ່າກັບກາເຟຄຸນນະພາບຈາກປະເທດທີ່ຜະລິດກາເຟ ອັນດັບຕົ້ນໆຂອງໂລກ. ປະຈຸບັນ, ໃນເຂດພູພຽງບໍລະເວນເວົ້າລວມ, ເວົ້າສະເພາະແມ່ນເມືອງປາກຊ່ອງ ໄດ້ມີຜູ້ລົງທຶນທັງຈາກພາຍໃນ ແລະຕ່າງປະເທດເຂົ້າມາລົງທຶນປູກ ແລະຊຸກຍູ້ສົ່ງເສີມປະຊາຊົນ ປປູກກາເຟ ເຂດພູພຽງບໍລະເວນນີ້ມີເນື້ອທີ່ທັງໝົດ ປະມານ 80,000 ເຮັກຕາ. ໃນນັ້ນ, ເມືອງປາກຊ່ອງ ກວມເອົາເກືອບ 50.000 ເຮັກຕາ. ກາເຟແມ່ນສິນຄ້າຍຸດທະສາດຂອງລັດຖະບານ, ເປັນພື້ນຖານດຶງດູດ ເງິນຕາຕ່າງປະເທດ ເຂົ້າມາໝູນວຽນພາຍໃນ ໄດ້ຫຼາຍສິບລ້ານໂດລາສະຫະລັດ ໃນແຕ່ລະປີ, ສ້າງລາຍຮັບທີ່ໝັ້ນທ່ຽງ ໃຫ້ແກ່ປະຊາຊົນ. ໄດ້ສົ່ງອອກສິນຄ້າປະເພດ ກາເຟ ໄປຫຼາຍກ່ວາ 21 ປະເທດ, ລວມຍອດມູນຄ່າການສົ່ງອອກກາເຟເມັດ ຂຽວ ໃນປີຜ່ານມາ ໂດຍຜ່ານສະມາກົມກາເຟລາວ ມີຈໍານວນ 21.761,91 ໂຕນ, ມີມູນຄ່າ67.888.779,83 ໂດລາສະຫາລັດ.

ຈາກນັ້ນທ່ານ ຄຳ ນິລະວົງ ຮອງຫົວໜ້າພະແນກກະສິກຳ ແລະປ່າໄມ້ແຂວງ ແລະທ່ານ ອະພິວັດ ສົມບູນຂັນ ຮອງຫົວໜ້າພະແນກອຸດສາຫະກຳ ແລະການຄ້າແຂວງ ກໍໄດ້ມີຄຳເຫັນກ່ຽວກັບງານບຸນມະໂຫລານກາເຟ-ຊາ ແລະຜົນຜະລິດກະສິກຳພູພຽງບໍລະເວນ ປະຈຳປີ 2023 ແລະຕອບຄຳຖາມຂອງສື່ມວນຊົນທີ່ມີຄວາມສົນໃຈຕື່ມອີກ.
ຂ່າວ: ເກດສະໜາ

แชร์