ໂຮງ​ໝໍ​ສັງ​ທອງ ຮັບ​ເຄື່ອງ​ການ​ແພດ​ຈາກ LKFA

​ຄະ​ນະ​ບໍ​ລິ​ຫານ​ງານສະມາຄົມມິດຕະພາບ ລາວ-ສ.ເກົາຫລີ (LKFA) ຊຶ່ງນຳໂດຍ ທ່ານ ດາວ​ວອນ ພະ​ຈັນ​ທະ​ວົງ ​ຮອງປະທານສະມາຄົມມິດຕະພາບ ລາວ-ສ.ເກົາຫ​ລີ; ຮອງ​ປະ​ທານ​ສະ​ພາ​ການ​ຄ້າ ແລະອຸດ​ສາ​ຫະ​ກຳ​ແຫ່ງ​ຊາດ​ລາວ ໄດ້ນຳເອົາເຄື່ອງຊ່ວຍເຫຼືອຈໍານວນໜຶ່ງທີ່ໄດ້ຮັບຈາກສະມາຄົມມິດຕະພາບ ສ.ເກົາຫຼີ-ລາວ (LKFA) ໂດຍການເປັນປະ ທານຂອງທ່ານ ໂອ ມຽງ ຮວັນ ( Oh Myung Hwan ) ເພື່ອມອບໃຫ້ແກ່ໂຮງໝໍຊຸມຊົນ ເມືອງສັງ​ທອງ ​ນະ​ຄອນຫຼວງວຽງ​ຈັນ ທີ່​ຫ້ອງ​ການໂຮງໝໍເມືອງດັ່ງກ່າວ ໃນວັນທີ 26 ມັງກອນ ໂດຍການກ່າວຮັບຂອງທ່ານ ດຣ. ບຸນ​ຮອງ ດວງ​ມາ​ລາ ຫົວໜ້າຫ້ອງການສາທາລະນະສຸກ ເມືອງ​ສັງ​ທອງ ໂດຍການໃຫ້ກຽດເຂົ້າເປັນສັກຂີພິຍານຂອງທ່ານ ​ບຸນ​ສວຍ ອຸ່ນ​ດາ​ລາ ຮອງ​ເລ​ຂາຄະ​ນະ​ບໍ​ລິ​ຫານ​ງານ​ພັກ​ເມືອງ​ສັງ​ທອງ; ປະ​ທານ​ສະ​ພາ​ປະ​ຊາ​ຊົນ (ສ​ສ​ຂ) ເມືອງ​ສັງ​ທອງ ​ພ້ອມ​ດ້ວຍຄະນະນຳຂອງທັງ 2 ພາກສ່ວນ.

ອຸ​ປະ​ກອນ​ການ​ແພດ ແລະການ​ຢາທີ່​ນຳ​ມາ​ຊ່ວຍເຫຼືອໂຮງໝໍໃນຄັ້ງນີ້ ປະກອບດ້ວຍປະເພດຢາ-ອຸ​ປະ​ກອນ​ການ​ແພດ ທີ່​ຈະ​ນຳ​ໃຊ້​​ເ​ຂົ້າ​ໃນ​ການ​ປິ່ນປົວພະຍາດ 27 ແກັດ ທີ່ສົ່ງໂດຍກົງມາຈາກ ສ.ເກົາຫຼີ ປະກອບມີເຂັມສັກຢາ + ຊີແລັງຈໍານວນ 17 ແກັດ, ຢາລົດຄວາມດັນເລືອດສູງ 04 ແກັດ, ສະເປດັບກິ່ນ 03 ແກັດ ແລະຜ້າອັດປາກ+ດັງ 03 ແກັດ; ລວມມູນຄ່າຊ່ວຍເຫຼືອທັງໝົດປະມານ 300 ລ້ານກ່ວາກີບ ຫຼື 17.843,76 ໂດລາສະຫະລັດ.

ທ່ານ ດາວ​ວອນ ພະ​ຈັນ​ທະ​ວົງ ​ຮອງປະທານສະມາຄົມມິດຕະພາບ ລາວ-ສ.ເກົາຫ​ລີ ໄດ້ຕາງໜ້າໃຫ້ 2 ສະມາຄົມມິດຕະພາບລາວ-ສ. ເກົາຫລີ ແລະ ສ.ເກົາຫລີ-ລາວ ຂໍນໍາເອົາສິ່ງຂອງເຫຼົ່ານີ້ທີ່ທາງສະມາຄົມມິດຕະພາບ ສ.ເກົາຫລີ-ລາວ ໄດ້ລະດົມຂົນຂວາຍຈາກບຸກຄົນ, ນິຕິບຸກຄົນ ແລະພາກສ່ວນບໍລິສັດ, ຫ້າງຮ້ານຕ່າງໆໃນ ສ.ເກົາຫລີ ແລ້ວໄດ້ຈັດສົ່ງມາຍັງສະມາຄົມຂອງພວກເຮົາ ເພື່ອນໍາມາມອບໃຫ້ແກ່ໂຮງໝໍມິດຕະພາບ 150 ຕຽງ; ໂຮງໝໍມະໂຫສົດ ເປັນແຫ່ງ ທີ 2 ແລະ ຄັ້ງທີ 3 ມອບໃຫ້ແກ່ໂຮງໝໍຊຸມຊົນ ເມືອງບໍລິຄັນ ແລະເທື່ອ​ທີ 4 ແມ່ນໂຮງໝໍຊຸມຊົນ ເມືອງສັງ​ທອງ ແລະໃນ​ບໍ່​ດົນ​ນີ້ຍັງມີແຜນຈະສືບຕໍ່ມອບໃຫ້ແຫ່ງອື່ນໆໃນເວລາຕໍ່ໄປ; ສໍາລັບຢາ ທີ່ນໍາມາມອບຊຸດນີ້​ແມ່ນ​ເໝາະແກ່ການນໍາໃຊ້ເຂົ້າໃນການປິ່ນປົວພະຍາດ  ແລະນໍາໃຊ້ເຂົ້າໃນການຮັກສາສຸຂະພາບ ແລະປິ່ນປົວພະຍາດຂອງພໍ່ແມ່ປະຊາຊົນບັນດາເຜົ່າ ທີ່ເຈັບ ເປັນໃຫ້ຫາຍດີ ແລະມີຄຸນປະໂຫຍດສູງສຸດ.

ໃນຜ່ານມາ, ສະມາຄົມມິດຕະພາບ ສ.ເກົາຫຼີ-ລາວ ກໍ່ໄດ້ໃຫ້ການຊ່ວຍເຫຼືອອັນລໍ້າຄ່າ ໃນຫຼາຍຄັ້ງໃຫ້ແກ່ ສປປ ລາວ ເປັນຕົ້ນ ຢາປິ່ນປົວພະຍາດລວມທັງເຄື່ອງຮັບໃຊ້-ອຸປະກອນໃນການປ້ອງກັນພະຍາດ ໂຄວິດ-19; ເຄື່ອງນຸ່ງຫົ່ມ, ເຄື່ອງໃຊ້ອື່ນໆ ລວມທັງການກໍ່ສ້າງ ແລະປັບປຸງໂຮງຮຽນອະນຸບານ-ໂຮງຮຽນປະຖົມ ຊຶ່ງສະມາຄົມມິດຕະພາບ ລາວ-ສ.ເກົາຫຫລີ ກໍ່ໄດ້ພ້ອມກັນສືບຕໍ່ນໍາໄປມອບຕໍ່ ໃຫ້ພາກສ່ວນທີ່່ກ່ຽວຂ້ອງ ໂດຍສະເພາະໂຮງຮຽນ, ໂຮງໝໍທີ່ຢູ່ເຂດຫ່າງໄກ, ສອກຫຼີກ ເປັນທີ່ຮຽບຮ້ອຍແລ້ວ.

ສ່ວນທ່ານ ດຣ. ບຸນ​ຮອງ ດວງ​ມາ​ລາ ຫົວໜ້າຫ້ອງການສາທາລະນະສຸກ ເມືອງບໍລິຄັນ ກໍ່ໄດ້ກ່າວສະແດງຂອບ ໃຈຢ່າງສູງມາຍັງ 2 ສະມາຄົມມິດຕະພາບດັ່ງ​ກ່າວ ທີ່ໄດ້ມອບເຄື່ອງຊ່ວຍເຫຼືອໃນມູນຄ່າສູງໃຫ້ແກ່ໂຮງໝໍພວກຂ້າພະເຈົ້າໃນຄັ້ງນີ້; ທາງຄະນະແພດໝໍຂອງພວກເຮົາຂໍໃຫ້ຄໍາໝັ້ນສັນຍາວ່າ: ຈະໄດ້ນໍາໃຊ້ຢາ ແລະ ອຸປະກອນດັ່ງກ່າວເພື່ອນໍາໃຊ້ເຂົ້າໃນການປິ່ນປົວພະ​ນັກ​ງານ, ພໍ່ແມ່ປະຊາຊົນໃຫ້ຖືກກັບຄວາມປະສົງຂອງສອງສະມາຄົມດັ່ງກ່າວ ແລະໃນໂອກາດໜ້າພວກ​ເຮົາ​ຫວັງ​ວ່າ: ທັງ 2 ສະມາຄົມມິດຕະພາບ ລາວ-ສ.ເກົາຫລີ, ສ.ເກົາຫລີ-ລາວ ຄົງສືບຕໍ່ໃຫ້ການຊ່ວຍເຫຼືອແກ່ໂຮງໝໍພວກເຮົາອີກໃນຕໍ່ໜ້າເພື່ອ​ເປັນ​ການ​ປະ​ກອບ​ສ່ວນ​ເຂົ້າ​ໃນ​ປິ່ນ​ປົວ ແລະແກ້​ໄຂ​ພະ​ຍາດ​ໃຫ້ຫຼຸດ​ໜ້ອຍ​ຖອຍ​ລົງ.

ໃນ​ເວ​ລາ​ຕໍ່​ມາ; ທ່ານ ​ບຸນ​ສວຍ ອຸ່ນ​ດາ​ລາ ຮອງ​ເລ​ຂາ​ພັກ​ເມືອງ​ສັງ​ທອງ, ປະ​ທານ​ສະ​ພາ​ປະ​ຊາ​ຊົນ (ສ​ສ​ຂ) ເມືອງ​ສັງ​ທອງ ​ພ້ອມ​ດ້ວຍຄະນະກໍ່ໄດ້​ນຳ​ພາທ່ານ ດາວ​ວອນ ພະ​ຈັນ​ທະ​ວົງ ຮອງ​ປະ​ທານ​ສະ​ພາ​ການ​ຄ້າ ແລະ ອຸດ​ສາ​ຫະ​ກຳ​ແຫ່ງ​ຊາດ​ລາວ ແລະ ຄະ​ນະ​ບໍ​ລິ​ຫານ​ງານສະມາຄົມມິດຕະພາບ ລາວ-ສ.ເກົາຫລີ ເດີນ​ທາ​ງ​ຢ້ຽມ​ຢາມ​ສະ​ຖານ​ທີ່ ​ທີ່​ທາງ​ເມືອງ​ສັງ​ທອງໄດ້​ກະ​ກຽມ ເພື່ອ​ເປີດ​ງານ​ບຸນ​ປະ​ເພ​ນີ ບຸນກອງ​ເຂົ້າ​ໃນ​ວັນ​ທີ 27.01.2023 ຊຶ່ງ​ມີ​ຜົນ​ຜະ​ລິດ​ຂອງ​ຊາວ​ກະ​ສິ​ກອນ​ທົ່ວ​ເມືອງ​ນຳ​ມາ​ຈຳ​ໜ່າຍອັນ​ສຳ​ຄັນ​ທີ່​ເຄີຍ​ຮັບ​ຄວາມ​ນິ​ຍົມ​ໃນ​ຜ່ານ​ມາ​ແມ່ນ​ “ເຂົ້າ​ຫອມ​ເມືອງ​ສັ​ງທອງ” ແລະໄດ້​ມີ​ການ​ຕ້ອນ​ຮັບ​ຢ່າງ​ອົບ​ອຸ່ນ​ຈາກ​ພໍ່​ຄ້າ-ຊາວ​ຂາຍ ແລະປະ​ຊາ​ຊົນ​ຈຳ​ນວນ​ໜຶ່ງ ທີ່​ມາ​ໃນ​ງານ​ດັ່ງ​ກ່າວ.

ຂ່າວ: ຣັດສະໝີ ດວງສັດຈະ

 

แชร์