ກະຊວງການຕ່າງປະເທດ ລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ

ຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ກະຊວງການຕ່າງປະເທດໄດ້ຈັດກອງປະຊຸມເຜີຍແຜ່ບາງເອກະສານສຳຄັນເພື່ອລະນຶກວັນສາກົນ ເພື່ອຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ຊຶ່ງຈັດຂຶ້ນ ໃນວັນທີ 25 ມັງກອນ 2023 ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ, ມີພະນັກງານ-ລັດຖະກອນພາຍໃນກະຊວງການຕ່າງປະເທດພ້ອມດ້ວຍແຂກຖືກເຊີນເຂົ້າຮ່ວມ.

ໂອກາດນີ້ທ່ານ ຄຳຜ່ານ ສະຫວັນເພັດ ກ່າວວ່າ: ໃນທ່າມກາງບັນຍາກາດທີ່ທົ່ວອົງຄະນະພັກກະຊວງການຕ່າງປະເທດ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກກະຊວງການຕ່າງປະເທດຄັ້ງທີ IV ແລະ ແຜນດຳເນີນງານແຫ່ງຊາດ ເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງທຸກຮູບແບບກໍຄືການຈັດຕັ້ງປະຕິບັດແຜນການເຄື່ອນໄຫວວຽກງານເພື່ອຄວາມສະເໝີພາບຍິງ-ຊາຍ ແລະແມ່-ເດັກ ຂອງກະຊວງການຕ່າງປະເທດໄປພ້ອມກັບການປະຕິບັດໜ້າທີ່ການເມືອງ-ການຕ່າງປະເທດຂອງຕົນຢ່າງຕັ້ງໜ້າ. ການລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ ຄັ້ງນີ້ ເປັນການໂຄສະນາເຜີຍແຜ່ບາງເອກະສານສຳຄັນເປັນຕົ້ນແມ່ນ ປະຫວັດຄວາມເປັນມາກ່ຽວກັບວັນສາກົນຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ແລະການຈັດຕັ້ງປະຕິບັດວຽກງານເພື່ອຄວາມສະເໝີພາບຍິງ-ຊາຍ ແລະ ແມ່-ເດັກ ຂອງກະຊວງການຕ່າງປະເທດໃນໄລຍະ 1 ປີຜ່ານມາ; ເອກະສານກ່ຽວກັບການຈັດຕັ້ງປະຕິບັດວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງ ແລະເດັກ ຢູ່ ສປປ ລາວ; ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ ໃຫ້ແກ່ ພະນັກງານ-ລັດຖະກອນ ພາຍໃນກະຊວງການຕ່າງປະເທດໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕື່ມອີກໂດຍມີນັກວິທະຍາກອນທີ່ມາຈາກຫ້ອງການກອງເລຂາຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ແລະ ຈາກກົມສົນທິສັນຍາ ແລະ ກົດໝາຍ ຜູ້ທີ່ຮັບຜິດຊອບ ແລະ ລົງເລິກວຽກງານນີ້ໂດຍກົງ ໃຫ້ກຽດຂຶ້ນບັນຍາຍ.

ບັນດາເນື້ອໃນເອກກະສານເຜີຍແຜ່ຄັ້ງນີ້ລ້ວນແຕ່ເປັນການສະແດງໃຫ້ເຫັນໄດ້ເຖິງຄວາມໝາຍສຳຄັນ ທັງເປັນການຮັບຮູ້, ເຂົ້າໃຈ ແລະປູກຈິດສຳນຶກກ່ຽວກັບການໃຊ້ຄວາມຮຸນແຮງບົນພື້ນຖານທາງເພດໃນທົ່ວສັງຄົມເພື່ອໃຫ້ປັບປ່ຽນທັດສະນະຄະຕິທີ່ວ່າການໃຊ້ຄວາມຮຸນແຮງຕໍ່ແມ່ຍິງໃນທຸກປະເພດຖືວ່າເປັນການລະເມີດການບັນທອນສິດເສລີພາບຂັ້ນພື້ນຖານຂອງແມ່ຍິງທັງເປັນການກະທຳຜິດຕໍ່ກົດໝາຍ ແລະໃຫ້ຖືວຽກງານຕ້ານ ແລະສະກັດກັ້ນຄວາມຮຸນແຮງຕໍ່ແມ່ຍິງເປັນວຽກໜຶ່ງທີ່ສຳຄັນຂອງລັດ, ຂອງບຸກຄົນ, ນິຕິບຸກຄົນ ແລະທຸກພາກສ່ວນໃນສັງຄົມ.

ຂປລ. ພາບ:ຂັນໄຊ

แชร์