ບໍລິສັດ ຮ່ວມໃຈພັດທະນາ ຮັບ​ລາງວັນ​ນັກ​ທຸ​ລະ​ກິດ​ຊັ້ນ​ນຳ​ດີ​ເດັ່ນ

ບໍລິສັດ ຮ່ວມໃຈພັດທະນາ ຄົບວົງຈອນຈໍາກັດຜູ້ດຽວ ໄດ້ຮັບລາງວັນນັກທຸລະກິດຊັ້ນນໍາດີເດັ່ນ ສະ​ພາ​ການ​ຄ້າ ແລະ​ອຸດ​ສາ​ຫະ​ກຳ​ແຫ່ງ​ຊາດ (ສຄອຊ) ປະຈໍາປີ 2022 (Lao Business Award 2022) ຊຶ່ງ​ໄດ້​ມີ​ພິ​ທີ​ມອບ-ຮັບ​ລາງວັນ​ເມື່ອວັນ​ທີ 23 ມັງ​ກອນ​ 2023 ທີ່​ນະ​ຄອນຫຼວງວຽງ​ຈັນ ​ໂດຍ​ໃຫ້​ກຽດ​ມອບ​ລ​າງວັນ​ຂອງທ່ານ ມະ​ໄລ​ທອງ ກົມ​ມະ​ສິດ ລັດ​ຖະ​ມົນ​ຕີ​ກະ​ຊວງ​ອຸດ​ສາ​ຫະ​ກຳ ແລະ​ການ​ຄ້າ ແລະ​ຮັບ​ໂດຍທ່ານ ນາງ ດວງ​ມະ​ນີ ເຢຍ​ເຊັງ ຮອງ​ອຳ​ນວຍ​ການ​ບໍ​ລິ​ສັດ ​ຮ່ວມ​ໃຈ​ພັດ​ທະ​ນາ​ ຄົບ​ວົງ​ຈອນ​ຈຳ​ກັດ​ຜູ້​ດຽວ.

ບໍລິສັດ ຮ່ວມໃຈພັດທະນາ ຄົບວົງຈອນຈໍາກັດຜູ້ດຽວ ໄດ້ສ້າງຕັ້ງ ແລະມີປະຫວັດການດໍາເນີນດ້ານທຸລະກິດການຄ້າ ແລະການສົ່ງເສີມການລົງທືນມາໄດ້ 20 ກວ່າປີ ​ໂດຍ​ທ່ານ ຕົງລີ ເຢຍເຊັງ ເປັນ​ຜູ້​ສ້າງ​ຕັ້ງ ແລະ​ເປັນ​ທັງ​ປະ​ທານບໍລິສັດ ຮ່ວມໃຈພັດທະນາ ຄົບວົງຈອນຈໍາກັດຜູ້ດຽວ, ຊຶ່ງ​ທຸ​ລະ​ກິດ​ຂອງ​ບໍ​ລິ​ສັດປະ​ກອບ​ມີ: ທຸລະກິດດ້ານການຄ້າ: ບໍລິການເອກະສານສິນຄ້າ (ຊີບປິງ) ນໍາເຂົ້າ,ສົ່ງອອກ ແລະຜ່ານແດນ, ມີຄວາມສາມາດບໍລິການສິນຄ້າດ້ວຍທາງລົດບັນທຸກ ແລະລົດໄຟໄດ້ຢ່າງວ່ອງໄວ ທັນເວລາ; ສົ່ງເສີມປະຊາຊົນປູກຢາງພາລາ ຢູ່ແຂວງຫຼວງນໍ້າທາ ແລະແຂວງວຽງຈັນ ໃນພື້ນທີ່ທັງໝົດ 300 ເຮັກຕາ ຜະລິດນໍ້າຢາງໄດ້ 1.500 ໂຕນຕໍ່ປີ;  ສົ່ງເສີມການລົງທືນຮ່ວມມືກັບບໍລິສັດ ແລະນັກທຸລະກິດຈີນປູກພືດລົ້ມລຸກ ສົ່ງອອກໄປ ສປ ຈີນ; ບໍລິສັດ ມີໜ່ວຍງານບໍລິການປະຈໍາດ່ານ ພາສີສາກົນບໍ່ເຕັນ, ດ່ານປາງໄຮ, ດ່ານຊຽງກົກ (ແຂວງຫຼວງນໍ້າທາ) ແລະຕົວແທນປະຈໍາດ່ານພາສີສາກົນປາງຫົກ, ດ່ານພາສີສາກົນລານຕຸຍ (ແຂວງຜົ້ງສາລີ), ດ່ານພາສີສາກົນ ຂົວມິດຕະພາບ4 ແລະນະຄອນຫຼວງວຽງຈັນ.

• 26/01/2023