ສະຫຼອງວັນສາກົນໂຄສະນາເພື່ອຕ້ານລະເບີດທີ່ບໍ່ທັນແຕກ

  ເພື່ອເປັນຂີດໝາຍສຳຄັນສຳລັບວັນສາກົນໂຄສະນາເພື່ອຕ້ານລະເບີດບໍ່ທັນແຕກໃນປີນີ້, ຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກ (ຄຊກລ) ແລະ ອົງການສະຫະປະຊາຊາດເພື່ອການພັດທະນາ (UNDP) ໄດ້ຈັດພິທີສະເຫຼີມສະຫຼອງວັນດັ່ງກ່າວຂຶ້ນທີ່ບ້ານດ້າງ, ເມືອງມະຫາໄຊ, ແຂວງຄຳມ່ວນ ໃນວັນທີ 4 ເມສາ 2019  ຊຶ່ງຢູ່ໃນຫຼາຍໆປະເທດທີ່ໄດ້ຮັບຜົນກະທົບຈາກສິ່ງເສດເຫຼືອຈາກສົງຄາມ, ກໍໄດ້ກິດຈະກຳຕ່າງໆເຊັ່ນກັນທີ່ກຳລັງເກີດຂຶ້ນໃນມື້ນີ້ເພື່ອຍົກໃຫ້ເຫັນວ່າສິ່ງເສດເຫຼືອຈາກສົງຄາມໄດ້ສົ່ງຜົນສະທ້ອນແນວໃດຕໍ່ກັບຊຸມຊົນ ແລະປະຊາຊົນ.

  4 ເມສາແມ່ນວັນໂຄສະນາເພື່ອຕ້ານລະເບີດບໍ່ທັນແຕກ/ມິນ ແລະຊ່ວຍເຫຼືອການດຳເນີນງານເພື່ອແກ້ໄຂບັນຫາມິນໃນໂອກາດນີ້, ທ່ານ ປອ. ຄໍາແພງ ໄຊ ສົມແພງ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ປະທານ ຄຊກລ ແລະ ທ່ານ ນາງ ຄາຣີນາ ອິມໂມເນັນ, ຜູ້ຕາງໜ້າອົງການ UNDP ໄດ້ນຳພາຄະນະມາທີ່ເມືອງມະຫາໄຊ. ແຂວງຄຳມ່ວນ ເປັນແຂວງໜຶ່ງທີ່ມີລະເບີດບໍ່ທັນແຕກຕົກຄ້າງຫຼາຍທີ່ສຸດຂອງປະເທດ. ກິດຈະກຳຕ່າງໆເພື່ອສະເຫຼີມສະຫຼອງວັນດັ່ງກ່າວໄດ້ຈັດຂຶ້ນທີ່ໂຮງຮຽນປະຖົມຂອງບ້ານດ່າງຊຶ່ງໄດ້ມີການມອບຮັບປຶ້ມຫຼັກສູດກ່ຽວກັບລະເບີດບໍ່ທັນແຕກ ແລະເສື້ອຄໍມົນທີ່ມີໂລໂກ້ເປົ້າໝາຍການພັດທະນາແບບຍືນຍົງທີ 18 ໃຫ້ແກ່ນັກຮຽນເພື່ອສຶກສາກ່ຽວກັບຄວາມສ່ຽງຂອງລະເບີດບໍ່ທັນແຕກ. 

  ຕໍ່ໜ້ານັກຮຽນ ແລະ ຄູ-ອາຈານ, ທ່ານລັດຖະມົນຕີກ່າວວ່າ: “ໃນໄລຍະຊຸມປີຜ່ານມານີ້, ຢູ່ແຂວງຄໍາມ່ວນມີອຸບັດເຫດຈາກ ລບຕ 46 ຄັ້ງ ເຮັດໃຫ້ມີຜູ້ບາດເຈັບ ແລະ ເສຍຊີວິດ 94 ຄົນ, ສະເພາະເມືອງມະຫາໄຊ ມີອຸບັດເຫດຈາກ ລບຕ 5 ຄັ້ງ ແລະ ມີຜູ້ບາດເຈັບ ແລະເສຍຊີວິດ 14 ຄົນ.” ຕົວເລກຜູ້ ບາດເຈັບ ແລະ ເສຍຊີວິດໃນທົ່ວປະເທດໄດ້ຫຼຸດລົງຫຼາຍໃນຊຸມປີທີ່ຜ່ານໆມາຊຶ່ງຢູ່ໃນລະດັບທີຕໍ່າລົງທີ 24 ຄົນ ໃນປີ  2018.

    ນອກຈາກນີ້, ທ່ານ ຄຳສີ ອຸດທິວົງ, ຮອງເຈົ້າແຂວງໆຄຳມ່ວນຮັບຜິດຊອບວຽກງານລະເບີດບໍ່ທັນແຕກ ແລະ ປະທານຄະນະກຳມະການຄຸ້ມຄອງ ລບຕ ແຂວງພ້ອມດຽວກັນກັບ ທ່ານ ພູຂຽວ ຈັນທະສົມບູນ, ຫົວໜ້າ ຄຊກລ ກໍຍັງໄດ້ເຂົ້າຮ່ວມໃນພິີທີດັ່ງກ່າວ. ຫຼັງຈາກພິທີມອບຮັບປຶ້ມ ແລະ ເສື້ອຄໍມົນແລ້ວ, ກໍສືບຕໍ່ກິດຈະກຳດ້ວຍການສະແດງລະຄອນຫຸ່ນເພື່ອເຜີຍແຜ່ກ່ຽວກັບຄວາມສ່ຽງຂອງລະເບີດບໍ່ທັນແຕກຊຶ່ງຈັດໂດຍໂຄງການເກັບກູ້ລະເບີດແຫ່ງຊາດ (UXO Lao).

  ບ້ານດ້າງ ແລະ ບ້ານອື່ນໆທົ່ວເມືອງໄດ້ຮັບຜົນກະທົບຢ່າງໜັກໜ່ວງຈາກໄພນໍ້າຖ້ວມປີກາຍນີ້ເນື່ອງຈາກວ່ານໍ້າອາດຈະເຮັດໃຫ້ ລບຕ ມີການເຄື່ອນຍ້າຍ. ເຂດທີ່ໄດ້ຮັບການກວກກູ້ ລບຕ ແລ້ວກ່ອນໜ້ານີ້ ຫຼື ເຂດທີ່ບໍ່ມີ ລບຕ ມາຮອດດຽວນີ້ກໍອາດຈະມີ ລບຕ ແລ້ວ.

 ທ່ານ ນາງ ຄາຣີນາ ອິມໂມເນັນ ໄດ້ອະທິບາຍວ່າກອງທຶນຕອບໂຕ້ສຸກເສີນແຫ່ງສະຫະປະຊາຊາດ (CERF) ໄດ້ສະໜອງທຶນຊ່ວຍເຫຼືອລ້າຈຳນວນ 3.8 ລ້ານໂດລາສະຫະລັດແກ່ 4 ອົງການໃນເຄືອຂ່າຍ ສປຊ– WHO, WFP,  FAO ແລະ UNDP - ເພື່ອໃຫ້ຮັກສາຊີວິດຂອງປະຊາຊົນພາຍຫຼັງໄພນໍ້າຖ້ວມໃນປີ 2018. ທຶນຊ່ວຍເຫຼືອລ້າດັ່ງກ່າວແມ່ນມີເປົ້າໝາຍຊ່ວຍເຫຼືອແຂວງຄຳມ່ວນ ແລະ ໂດຍການຊ່ວຍເຫຼືອຂອງທຶນດັ່ງກ່າວເຮັດໃຫ້ອົງການ UNDP ສາມາດສ້າງວຽກເຮັດງານທຳໄລຍະສັ້ນໃຫ້ແກ່ປະຊາຊົນ 3,000 ຄົນ ເຊິ່ງພວກເຂົາໄດ້ສ້ອມແປງຖະໜົນຫົນທາງ ແລະ ພື້ນຖານໂຄງລ່າງອື່ນໆທີ່ໄດ້ຮັບຄວາມເສຍ ຫາຍຈາກນໍ້າຖ້ວມ.

  “ໄພນໍ້າຖ້ວມອາດຈະເຮັດໃຫ້ ລບຕ ມີການເຄື່ອນຍ້າຍ. ດ້ວຍເຫດນີ້, ການປູກຈິດສຳນຶກກ່ຽວກັບອັນຕະລາຍຂອງ ລບຕ ແກ່ເດັກນ້ອຍຈິ່ງເປັນພາກສ່ວນໜຶ່ງສິ່ງທີ່ສຳຄັນຂອງວຽກງານຟື້ນຟູຫຼັງໄພພິບັດ. ນີ້ເປັນເຫດຜົນທີ່ວ່າເປັນຫຍັງພວກເຮົາຈິ່ງໄດ້ມາທີ່ບ້ານດ່າງມື້ນີ້ເພື່ອກ່າວຄຳຖະແຫຼງກ່ຽວກັບວັນສາກົນໂຄສະນາເພື່ອຕ້ານລະເບີດບໍ່ທັນແຕກ ແລະ ເພື່ອຮັບປະກັນຄວາມປອດໄພຂອງເດັກນ້ອຍເຫຼົ່ານີ້”, ນີ້ເປັນຄຳເວົ້າຂອງທ່ານ ນາງ ອິມໂມເນັນ.

  ຫົວຂໍ້ວັນສາກົນເພື່ອຕ້ານລະເບີດບໍ່ທັນແຕກໃນປີນີ້ແມ່ນ “ອົງການສະຫະປະຊາຊາດສົ່ງເສີມເປົ້າໝາຍການພັດທະນາແບບຍືນຍົງ–ພື້ນທ່ີປອດໄພ–ບ້ານ ກໍປອດໄພ “ ຊຶ່ງສອດຄ່ອງຫຼາຍກັບການສະເຫຼີມສະຫຼອງໃນມື້ນີ້. ຄໍາໝັ້ນໝາຍຂອງ ສປປ ລາວ ຕໍ່ກັບຫົວຂໍ້ດັ່ງກ່າວແມ່ນເຫັນໄດ້ຊັດເຈນໃນຄວາມພະຍາ ຍາມເຮັດວຽກຢ່າງໜັກເພື່ອບັນລຸເປົ້າໝາຍການພັດທະນາແບບຍືນຍົງແຫ່ງຊາດເປົ້າໝາຍທີ 18 ກ່ຽວກັບຊີວິດທີ່ປອດໄພຈາກລະເບີດບໍ່ທັນແຕກ .

ຂ່າວ: ນສພ ເສດຖະກິດ-ສັງຄົມ

แชร์