ວາງສິລາລຶກໂຄງການກໍ່ສ້າງສູນການຄ້ານິຍົມລາວ

ວັນທີ 22 ມັງກອນຜ່ານມາ ພິທີຕັ້ງເສົາມຸງຄຸນ ສູນການຄ້າ "ນິຍົມລາວ" ໃຫ້ກຽດເຂົ້າຮ່ວມທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ ໄປຮ່ວມເປັນປະທານວາງສີລາລືກຕັ້ງເສົາເອກມູງຄູນ.

ທ່ານ ບົວພອນ ຄຳທະວີ ປະທານບໍລິສັດນິຍົມລາວ ຈະເລີນຊັບ ຈໍາກັດຜູ້ດຽວ, ຊ້ອງໜ້າໂດຍທ່ານ ບຸນເສັງ ປະທໍາມະວົງ ຮອງເຈົ້າແຂວງບໍລິຄຳໄຊ ພ້ອມດ້ວຍຫົວໜ້າພະແນກການ, ເມືອງ ແລະພະນັກງານວິຊາການເຂົ້າຮ່ວມເປັນສັກຂີພິຍານ.

ບໍລິສັດ ນິຍົມລາວຈະເລີນຊັບ ຈໍາກັດຜູ້ດຽວ ມີຄວາມຕ້ອງການລົງທຶນສໍາປະທານ ແລະກໍ່ສ້າງສູນການຄ້າ ຢູ່ເຂດບ້ານຫຼັກຊາວ ເມືອງຄໍາເກີດ ແຂວງບໍລິຄໍາໄຊ ໃນເນື້ອທີ່ 5.899 ຕາແມັດ ດ້ວຍມູນຄ່າການລົງທຶນ 46 ຕື້ກວ່າກີບ, ເຊີ່ງຈະໄດ້ເລີ່ມກໍ່ສ້າງພາຍໃນເດືອນມັງກອນ 2023 ແລະໄລຍະເວລາການກໍ່ສ້າງ 30 ເດືອນ.

ໂຄງການກໍ່ສ້າງສູນການຄ້ານິຍົມລາວ ຈະເລີນຊັບ ເປັນອາຄານຊັ້ນດຽວມີຂະໜາດ 60x80 ​ແມັດ ເມື່ອສ້າງສໍາເລັດ ຈະເປັນສູນລວມສິນຄ້າຂອງແຂວງເພຶ່ອສົ່ງໄປຕ່າງປະທດ, ທັງນີ້ກໍ່ເພື່ອເປັນການພັດທະນາເສດຖະກິດຂອງ ສປປ ລາວ ກໍ່ຄືແຂວງບໍລິຄໍາໄຊ, ເພື່ອຊຸກຍູ້ ແລະສົ່ງເສີມສິນຄ້າຂອງພໍ່ແມ່ປະຊາຊົນ, ສົ່ງເສີມການລົງທຶນ ການກໍ່ສ້າງພຶ້ນຖານໂຄງລ່າງ, ການແລກປ່ຽນສິນຄ້າໃຫ້ມີຄວາມສະດວກ, ປອດໄພ, ວ່ອງໄວ ແລະທັນສະໄໝ.

แชร์