ສະຫາຍ ເລຂາທິການໃຫຍ່ຢ້ຽມຢາມ ແລະເຮັດວຽກຢູ່ແຂວງອຸດົມໄຊ

ໃນລະຫວ່າງວັນທີ 21-22 ມັງກອນ 2023 ນີ້ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດພ້ອມຄະນະໄດ້ເດີນທາງໄປຢ້ຽມຢາມ ແລະເຮັດວຽກຢູ່ ແຂວງອຸດົມໄຊ ໂດຍໃຫ້ການຕ້ອນຮັບຈາກສະຫາຍ ບຸນຄົງ ຫລ້າຈຽມພອນ ເລຂາພັກແຂວງ, ເຈົ້າແຂວງອຸດົມໄຊ ພ້ອມດ້ວຍການນຳຂອງແຂວງ, ສອງກໍາລັງປະກອບອາວຸດ, ບັນດາອົງການຈັດຕັ້ງມະຫາຊົນຊາວໜຸ່ມ, ແມ່ຍິງ.

ໂອກາດເຄື່ອນໄຫວຢູ່ແຂວງອຸດົມໄຊສະຫາຍ ທອງ ລຸນ ສີສຸລິດ ເລຂາທິການໃຫຍ່, ປະທານປະເທດພ້ອມຄະນະໄດ້ເຂົ້າພົບປະກັບບັນດາສະຫາຍຄະນະປະຈຳພັກແຂວງອຸດົມໄຊ, ພ້ອມທັງຮັບຟັງລາຍງານສະພາບການພັດທະນາຂອງແຂວງຈາກ ສະຫາຍ ບຸນຄົງ ຫລ້າຈຽມພອນ. ຈາກນັ້ນ, ສະຫາຍທອງລຸນ ສີສຸລິດ ໄດ້ໂອ້ລົມ ແລະ ລົງເລິກບາງບັນຫາ ຕໍ່ຄະນະປະຈໍາພັກແຂວງ ແລະ ການນຳຫລັກແຫລ່ງ ເພື່ອເປັນທິດທາງໃຫ້ແກ່ຄະນະພັກໄດ້ສຸມໃສ່ ເປັນຕົ້ນ ໃຫ້ມີຄວາມສາມັກຄີ ແລະຄຳນຶງເຖິງຜົນປະໂຫຍດລວມຂອງແຂວງ ແລະຂອງປະເທດຊາດຕາມຫລັກການຂອງພັກ, ຕ້ອງມີລັກສະນະຕໍ່ສູ້, ມີການຕຳໜິສົ່ງຂ່າວ, ກໍ່ສ້າງເຊິ່ງກັນ ແລະກັນເພື່ອໃຫ້ມີການປ່ຽນແປງ. ໃນຄະນະປະຈຳ ຕ້ອງເປັນໃຈກາງໃນຄວາມເປັນແບບຢ່າງ ໃຫ້ພະນັກງານ, ສະມາຊິກພັກ ແລະປະຊາຊົນ, ຕ້ອງມີການຮຽນຮູ້, ຟັງຄຳຄິດຄຳເຫັນຂອງພະນັກງານ ແລະປະຊາຊົນ ເພື່ອນໍາມາປັບປຸງແບບແຜນ ວິທີການນຳພາໃຫ້ດີຂຶ້ນ, ມີການຮຽນຮູ້, ຄົ້ນຄວ້າຕະຫລອດເວລາ, ພ້ອມກັນປຶກສາຫາລື ແລະ ວາງອອກເປັນແນວທາງນະໂຍບາຍພ້ອມທັງແບ່ງວຽກກັນລົງຊີ້ນຳ ຈັດຕັ້ງປະຕິບັດ, ເອົາໃຈໃສ່ສືບຕໍ່ຫັນລົງຮາກຖານໂດຍສະເພາະແມ່ນຊີ້ນຳບັນດາເມືອງໃນການກະກຽມດຳເນີນກອງປະຊຸມໃຫຍ່ ໄລຍະກາງສະໄໝ, ການປະສານງານກັບສູນກາງຕ້ອງໃຫ້ໄວ ແລະໂລ່ງລ່ຽນ, ມີການຕິດຕາມ ແລະຊຸກຍູ້ຢ່າງຕໍ່ເນື່ອງ.

ຈາກນັ້ນ, ສະຫາຍ ເລຂາທິການໃຫຍ່ ພ້ອມຄະນະຍັງໄດ້ໄປຢ້ຽມຢາມໂຄງການພັດທະນາແຄມນໍ້າກໍຈຸດສວນສາທາລະນະເຂດສະໜາມກິລາເທດສະບານເມືອງໄຊເຊິ່ງມາຮອດປັດຈຸບັນ ສຳລັບສັນຍາທີ 1 ການກໍ່ສ້າງໃກ້ຈະສຳເລັດແລ້ວ. ໂຄງການກໍ່ສ້າງ ພັດທະນາແຄມນໍ້າກໍ (ສັນ ຍາ 1) ຢູ່ ເທດສະບານເມືອງໄຊປະກອບມີການກໍ່ສ້າງປ້ອງກັນຕາຝັ່ງເຈື່ອນ 1,32 ກິໂລແມັດ, ສວນສາທາລະນະ 1,18 ຮຕ, ຝາຍນໍ້າລົ້ນ 1 ແຫ່ງ ແລະປະຕູລະບາຍນໍ້າ 1 ຈຸດ, ໂດຍບໍລິສັດກວາງຕຸ້ງບໍລິຫານຈັດການນໍ້າ; ມາຮອດປັດຈຸບັນສໍາເລັດໄດ້ 99,41%, ຄາດວ່າຈະໃຫ້ສໍາເລັດ 100% ໃນທ້າຍເດືອນມັງກອນ 2023. ພ້ອມດຽວກັນຄະນະຍັງໄດ້ໄປຢ້ຽມຢາມພື້ນທີ່ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ໃນປີ 2022 ຜ່ານມາ ໂດຍສະເພາະແມ່ນພື້ນທີ່ນາຂອງປະຊາຊົນຢູ່ເຂດເມືອງຫລາ; ປັດຈຸບັນເຂດດັ່ງກ່າວພວມໄດ້ຮັບການຟື້ນຟູຄືນເພື່ອຈະໃຫ້ທ່ວງທັນກັບລະດູການຜະລິດທີ່ຈະມາເຖິງ. ໂອກາດດຽວກັນ, ສະຫາຍເລຂາທິການໃຫຍ່ຍັງໄດ້ໄປຢ້ຽມເບິ່ງສາງເຢັນເກັບຜົນຜະລິດກະສິກຳຂອງບໍລິສັດຊິງຕ້າທີ່ໄດ້ສົ່ງເສີມປະຊາຊົນເມືອງຫລາ ປູກໝາກຖົ່ວ ສ້າງອາຊີບໃຫ້ປະຊາຊົນ ເພື່ອແກ້ ໄຂຊີວິດການເປັນຢູ່ພາຍຫລັງໄພນໍ້າຖ້ວມໃຫ້ນັບມື້ດີຂຶ້ນ; ພ້ອມນັ້ນກໍໄດ້ໄປເບິ່ງເຂດການຜະລິດຂອງປະຊາຊົນເມືອງຫລາ ພາຍຫລັງໄດ້ຮັບຜົນກະທົບຈາກໄພນໍ້າຖ້ວມຜ່ານມາ ແລະຢ້ຽມຢາມເບິ່ງສາງຄ່ຽນຖ່າຍສິນຄ້າຂອງບໍລິສັດທາງລົດໄຟ ລາວ-ຈີນ ຢູ່ສະຖານີລົດໄຟເມືອງໄຊ ເຊິ່ງເປັນຈຸດໄດ້ຮອງຮັບການຂົນສົ່ງສິນຄ້າພາຍໃນແຂວງອຸດົມໄຊກໍຄືບັນດາແຂວງໃກ້ຄຽງດ້ວຍລົດໄຟອອກໄປສູ່ຕ່າງປະເທດ ແລະຢ້ຽມຊົມການບໍລິການຜູ້ໂດຍສານພາຍໃນສະຖານີລົດໄຟຕື່ມອີກ.
ຂປລ. ຂ່າວ-ພາບ: ໄມພອນ

แชร์