ອົງການກອງທຶນອະນຸລັກທຳມະຊາດໂລກ ປະຈຳລາວ ເຄື່ອນໄຫວວຽກງານຢູ່ຈໍາປາສັກ
ແຫລ່ງຂ່າວຈາກ ແຂວງຈຳປສັກ ໃຫ້ຮູ້ວ່າ: ວັນທີ 20 ມັງກອນ 2023 ຜ່ານມາ, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ຕ້ອນຮັບ ທ່ານ ຣໍລິດ ປາເລນຕິນີ ຜູ້ອໍານວຍການ ອົງການກອງທຶນອະນຸລັກທຳມະຊາດໂລກ ປະຈຳ ສປປ ລາວ ຫລື WWF-Laos ເຂົ້າຢ້ຽມຂໍ່ານັບໃນໂອກາດມາເຄື່ອນໄຫວວຽກງານຢູ່ແຂວງຈຳປາສັກ.
ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ສະແດງການຕ້ອນຮັບ ແລະຊົມເຊີຍ ທ່ານ ຣໍລິດ ປາເລນຕິນີ ພ້ອມຄະນະທີ່ມາເຄື່ອນໄຫວວຽກງານເພື່ອສືບຕໍ່ສົງເສີມວຽກງານອະນຸລັກຊີວະນາໆພັນສັດນໍ້າແບບມີສ່ວນຮ່ວມຢູ່ເຂດສີພັນດອນຊຶ່ງໄດ້ກວມເອົາ 3 ເມືອງຄື: ເມືອງໂຂງ, ສຸຂຸມາ ແລະ ເມືອງປະທຸມພອນ ແຂວງຈຳປາສັກ ເຊິ່ງໄດ້ປະກອບສ່ວນສະໜັບສະໜູນຊ່ວຍປັບປຸງຊີວິດການເປັນຢູ່ແບບຍືນຍົງຂອງຊຸມຊົນທີ່ເປັນມິດຕໍ່ສິ່ງແວດລ້ອມ, ຂະຫຍາຍຮູບແບບການບໍລິຫານ ແລະຄຸ້ມຄອງການປະມົງ ແບບມີສ່ວນຮ່ວມ ປະກອບສ່ວນເຂົ້າໃນການພັດທະນາ ເສດຖະ ກິດ-ສັງຄົມ ຢູ່ແຂວງຈຳປາສັກ.
ໂອກາດນີ້, ທ່ານ ຜູ້ອໍານວຍການ WWF-Laos ໄດ້ໃຫ້ຮູ້ເຖິງຈຸດປະສົງກໍຄືແຜນວຽກ ແລະບັນດາກິດຈະກຳຂອງໂຄງການໂດຍສະເພາະໃນເຂດສີພັນດອນພາຍໃຕ້ແຜນງານນໍ້າຈືດ 5 ປີ “ສົ່ງເສີມການຄຸ້ມຄອງ-ບໍລິຫານ ຊັບພະຍາກອນສັດນໍ້າໂດຍຜ່ານການຄຸ້ມຄອງ, ການອະນຸລັກແບບມີສ່ວນຮ່ວມ ແລະການຊຸກຍູ້ສົ່ງເສີມການດໍາລົງຊີວິດທີ່ປັບໂຕຕໍ່ສະພາບດິນຟ້າອາກາດ ໃນ ສປປ ລາວ”.
ການພົບປະລະຫວ່າງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ແລະທ່ານ ຣໍລິດ ປາເລນຕິນີ, ຜູ້ອໍານວຍການ ອົງການ WWF-Laos ໄດ້ເຫັນດີສືບຕໍ່ການຮ່ວມມື ເພື່ອສືບຕໍ່ຜັນຂະຫຍາຍໂຄງການຕ່າງໆ ໂດຍສະເພາະຕໍ່ການສະໜັບສະໜູນວຽກງານຄຸ້ມຄອງການປະມົງແບບຊຸມຊົນມີສ່ວນຮ່ວມຢູ່ເຂດສີພັນດອນ, ວຽກງານບໍລິການ-ຄຸ້ມຄອງປ່າໄມ້ ແລະສັດປ່າໃນເຂດອຸທິຍານແຫ່ງຊາດ ເຊປຽນ, ດົງຫົວສາວ ແລະອື່ນໆ.
ພາບ,ຂ່າວ: ທັດຊະນະ. ພູທິບສະຫວັນ
