ຄະນະພົວພັນຕ່າງປະເທດສູນກາງພັກເຜີຍແຜ່ເຊື່ອມຊຶມເອກສານສຳຄັນຂອງພັກ-ຂອງຊາດ

ໃນວັນທີ 17 ມັງກອນ 2023 ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດປາຖະກະຖາເຊື່ອມຊຶມເອກສານສຳຄັນຂອງພັກ-ຂອງຊາດຄື: ວັນສ້າງຕັ້ງກອງ ທັບປະຊົນຊົນລາວ ຄົບຮອບ 74 ປີ (20 ມັງກອນ 1949- 20 ມັງກອນ 2023); ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI ແລະມະຕິກອງປະຊຸມວຽກງານການເມືອງ- ແນວຄິດ ທົ່ວປະເທດຄັ້ງທີ V. ໂດຍການເປັນກຽດເຜີຍແຜ່ຂອງທ່ານ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາທ່ານໃນຄະນະບໍລິຫານງານພັກ, ສະມາຊິກພັກ, ພະນັກງານທົ່ວຄະນະພົວພັນຕ່າງປະເທດສູນກາງພັກເຂົ້າຮ່ວມ 132 ທ່ານ.

ໃນພິທີທ່ານ ທອງສະຫວັນ ພົມວິຫານ, ຫົວໜ້າຄະນະພົວພັນຕ່າງປະເທດສູນກາງພັກໄດ້ຫວນຄືນມູນເຊື້ອ, ການເຕີບໃຫຍ່ຂະຫຍາຍຕົວ ແລະຜົນງານວິລະກຳອັນພິລະອາດຫານຂອງກອງທັບປະຊາຊົນລາວຕະຫຼອດໄລຍະ 74 ປີ ຜ່ານມາພາຍໃຕ້ການຊີ້ນຳຂອງພັກ ປະຊາຊົນ ປະຕິວັດລາວ ໃນພາລະກິດຕໍ່ສູ້ກູ້ຊາດສາມາດຍາດໄດ້ໄຊຊະນະຢ່າງເນືອງນິດລຽນຕິດ ສາມາດປົດປ່ອຍປະເທດຊາດໄດ້ຢ່າງສົມບູນ ແລະສືບຕໍ່ປົກປັກຮັກສາ ແລະສ້າງສາພັດທະນາປະເທດຊາດດັ່ງຄຳຂວັນ “ກອງທັບຂອງຊາດລາວ ວິລະຊົນ, ຄົນລາວພິລະອາດຫານ”.

ທ່ານ ຫົວໜ້າ ຄຕພ ຍັງສືບຕໍ່ຍົກໃຫ້ເຫັນເນື້ອໃນສຳຄັນຂອງມະຕິ 5 ສະໄໝທີ XI ເປັນຕົ້ນແມ່ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບ 2 ວາລະແຫ່ງຊາດ,ວຽກງານປ້ອງກັນຊາດປ້ອງກັນຄວາມສະຫງົບ,ວຽກງານການຕ່າງປະເທດໃນ 1 ປີ ທີ່ຜ່ານມາ ແລະທິດທາງແຜນການໃນຕໍ່ໜ້າ;ພ້ອມກັນນັ້ນ, ທ່ານ ທອງສະຫັວນ ພົມວິຫານ ຍັງໄດ້ຍົກໃຫ້ເຫັນເຖິງ ການຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມວຽກງານການເມືອງ-ແນວຄິດ ທົ່ວປະເທດຄັ້ງທີ V ເປັນຕົ້ນແມ່ນຄໍາເຫັນຊີ້ນໍາຂອງສະຫາຍເລຂາທິການໃຫຍ່ຕໍ່ກອງປະຊຸມດັ່ງກ່າວດ້ວຍການຍົກສູງຄຸນນະພາບການເມືອງ-ແນວຄິດ ເຂົ້າໃນຊີວິດສັງຄົມຕົວຈິງໃນໄລຍະໃໝ່.

แชร์