ສະຫາຍ ບຸນທອງ ຈິດມະນີ ລົງຢ້ຽມຢາມ ແລະພົບປະໂອ້ລົມນາຍ ແລະພົນທະຫານ ກອງພົນທີ 2

ໃນລະຫວ່າງວັນທີ 17-18 ມັງກອນ 2023 ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ລົງຢ້ຽມຢາມ ແລະ ພົບປະໂອ້ລົມນາຍ ແລະ ພົນທະຫານ ກອງພົນທີ 2 ,ເນື່ອງໃນໂອກາດວັນສ້າງຕັ້ງກອງທັບ ຄົບຮອບ 74 ປີ, ໂດຍມີ ສະຫາຍ ພົງສະຫວັນ ສິດທິວົງ ເຈົ້າແຂວງໄຊຍະບູລີ, ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດພ້ອມດ້ວຍ ຄະນະພັກ-ຄະນະບັນຊາ ກອງພົນທີ 2 ຕະຫຼອດຮອດ ກອງບັນຊາການທະຫານແຂວງ, ຄະນະປະຈຳພັກເມືອງໄຊຍະບູລີ, ເມືອງ ພຽງ, ພະນັກງານອາວຸໂສບໍານານ, ນັກຮົບແຂ່ງຂັນ, ວິລະຊົນແຫ່ງຊາດ ແລະ ພະນັກງານຫຼັກແຫຼ່ງທົ່ວກອງພົນທີ 2 ເຂົ້າຮ່ວມ.

ສະຫາຍ ພັນເອກ ຄໍາດີ ໄຊຍະວົງ ຫົວໜ້າການທະຫານກອງພົນທີ 2 ໄດ້ລາຍງານສະພາບການເຄື່ອນໄຫວທີ່ພົ້ນເດັ່ນໃນໄລຍະຜ່ານມາເຊິ່ງກອງພົນທີ 2 ໄດ້ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ສາມາດປະຕິບັດບັນດາຄາດໝາຍສູ້ຊົນ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພໂດຍພື້ນຖານ ໂດຍສະເພາະການປ້ອງກັນບັນດາເປົ້າໝາຍສຳຄັນ, ວັນບຸນປະ ຫວັດສາດ ແລະ ກອງປະຊຸມຕ່າງໆລະດັບຊາດ ແລະ ສາກົນມີຄວາມສະຫງົບ 100%; ໄປຄຽງຄູ່ກັນນັ້ນ, ຄະນະພັກ-ຄະນະບັນຊາຍັງໄດ້ຖືເອົາວຽກງານປ້ອງກັນຊາດ- ປ້ອງກັນຄວາມສະຫງົບຢ່າງແຂງແຮງ,ຫັນເອົາກໍາລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ, ສຸມໃສ່ສ້າງບ້ານປ້ອງກັນຊາດເຂັ້ມແຂງ, ກຸ່ມບ້ານປ້ອມໝັ້ນສູ້ຮົບເຂັ້ມແຂງໃຫ້ເພີ່ມຂຶ້ນທາງດ້ານຈໍານວນ ແລະ ຄຸນນະພາບ, ຍູ້ແຮງການອົບຮົມ-ຫັດແອບ ການເມືອງ-ການທະຫານ, ພະລາທິການ, ເຕັກນິກ, ສິລະປະຍຸດ-ຍຸດທະວິທີຂອງທະຫານຮາບ ແລະ ເຫຼົ່າຮົບວິຊາສະເພາະໃຫ້ມີຄວາມຊໍານິຊໍານານ, ເປັນກໍາລັງຫຼັກແຫຼ່ງໃຫ້ກະຊວງປ້ອງກັນປະເທດຮັບປະກັນເຮັດໃຫ້ສະພາບມີຄວາມສະຫງົບ, ໄປຄວບຄູ່ກັບການຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕາມເງື່ອນໄຂທ່າແຮງບົ່ມຊ້ອນຂອງກົມກອງ . ນອກນັ້ນ, ໄດ້ປ້ອງກັນກວດກາຕິດຕາມເຂດຫຼັກໝາຍຊາຍແດນຕ່າງໆ ແລະ ສັງຄົມທົ່ວໄປຮັບປະກັນສ້າງເງື່ອນໄຂໃຫ້ແກ່ການພັດທະນາເສດຖະ ກິດ-ສັງຄົມແຫ່ງຊາດໄດ້ຂະຫຍາຍຕົວຢ່າງຕໍ່ເນື່ອງ. ໂອກາດດຽວກັນນີ້ກໍໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການປະດັບຫຼຽນໄຊພິລະອາດຫານຊັ້ນ II ໃຫ້ຫ້ອງວ່າການປົກແຂວງໄຊຍະບູລີ ໂດຍການປະດັບຂອງ ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ.

ຈາກນັ້ນ, ສະຫາຍ ບຸນທອງ ຈິດມະນີ ໄດ້ສະແດງຄວາມຍ້ອງຍໍຊົມເຊີຍ ແລະຕີລາຄາສູງ ຕໍ່ການຈັດຕັ້ງປະຕິບັດໜ້າທີ່ວຽກງານທີ່ຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງພົນທີ 2 ຍາດມາໄດ້ໃນໄລຍະຜ່ານມາ ພ້ອມດຽວກັນນີ້, ສະຫາຍ ຍັງໄດ້ຮຽກຮ້ອງໃຫ້ພະນັກງານ-ນັກຮົບທົ່ວກອງພົນທີ 2 ເອົາໃຈໃສ່ ເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍ ບາຍຂອງພັກ-ລັດ, ປົກປັກຮັກສາ ໝາກຜົນ ຂອງການປະຕິວັດ, ປົກປັກຮັກສາອະທິປະໄຕ ແລະ ລະບອບການເມືອງຂອງພວກເຮົາໄວ້ໃຫ້ໝັ້ນຄົງ; ສົມທົບແໜ້ນວຽກງານການປ້ອງກັນຊາດ- ປ້ອງກັນຄວາມສະຫງົບ ກັບການສ້າງສາພັດທະນາເສດຖະກິດ-ສັງຄົມ; ກອງທັບກໍຄືຂອງກົມກອງ, ຕ້ອງເປັນຫຼັກແຫຼ່ງ, ເປັນພາຫະນະອັນແຫຼມຄົມຂອງພັກໃນການນຳພາທົ່ວປວງຊົນເຮັດວຽກງານປ້ອງກັນຊາດ-ປ້ອງກັນຄວາມສະຫງົບ, ຕິດພັນກັບການພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ຕາມທິດ 3 ສ້າງ; ກົມກອງຕັ້ງທັບຢູ່ບ່ອນໃດ ຕ້ອງເຮັດວຽກງານກໍ່ສ້າງຮາກຖານຢູ່ບ່ອນນັ້ນໃຫ້ດີ, ພ້ອມດຽວກັນນີ້ ຫົວໜ່ວຍກົມກອງຕ່າງໆຕ້ອງຢູ່ໃຕ້ການນຳພາ ຂອງຄະນະພັກຂັ້ນຂອງຕົນ, ຕ້ອງຮັບປະກັນໃຫ້ຄະນະພັກ ນໍາພາທຸກວຽກງານ, ເປັນຜູ້ຕົກລົງຕັດສິນທຸກບັນຫາສຳຄັນຂອງກົມກອງ; ໄປພ້ອມນີ້ ຕ້ອງປັບປຸງແບບແຜນວິທີເຮັດ, ມີວິທະຍາສາດ, ແທດເໝາະກັບສະພາບການຕົວຈິງ, ໂປ່ງໃສ, ກ້າຄິດ, ກ້າເຮັດ ແລະ ກ້າຮັບຜິດຊອບ ຕໍ່ຜົນໄດ້ຜົນເສຍໃນການຈັດຕັ້ງປະຕິບັດໜ້າທີ່ການເມືອງ ທີ່ນອນໃນຂອບເຂດຮັບຜິດຊອບ ໂດຍຖືເອົາຜົນປະໂຫຍດຂອງຊາດ, ຂອງປະຊາຊົນ ເປັນບ່ອນອີງ. ນອກນັ້ນກໍຕ້ອງໄດ້ສືບຕໍ່ປົກປັກຮັກສາ ແລະເສີມຂະຫຍາຍມູນເຊື້ອອັນດີງາມຂອງກອງທັບ, ຕັ້ງໜ້າປັບປຸງກຳລັງໃນທຸກດ້ານ ໃຫ້ໜັກແໜ້ນເຂັ້ມແຂງ ດັ່ງນັ້ນ, ຕ້ອງມີແຜນການ ແລະປະຕິບັດລະບອບຫັດແອບເພື່ອຍົກສູງຄວາມສາມາດ ທາງດ້ານສິນລະປະຍຸດ-ຍຸດທະວິທີ, ລະດັບວິຊາສະເພາະໃຫ້ສູງຂຶ້ນເລື້ອຍໆ, ທັງຍົກສູງສະຕິການຈັດຕັ້ງລະບຽບວິໄນ ໃຫ້ເຂັ້ມງວດ, ດ້ານວຽກງານແກ້ໄຂຊີວິການເປັນຢູ ຕ້ອງສຸມທຸກເງື່ອນໄຂຄວາມສາມາດ ເພື່ອກ້າວໄປເຖິງການກຸ້ມຕົນເອງຢ່າງຮອບດ້ານ. ພ້ອມນີ້ຕ້ອງໄດ້ຍົກສູງປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ກັບປະເທດຕ່າງໆ, ປັບປຸງ ແລະ ເພີ່ມທະວີການຮ່ວມມືຮອບດ້ານກັບກອງທັບເພື່ອນມິດຍຸດທະສາດ (ສສ ຫວຽດນາມ ແລະ ສປ ຈີນ) ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງກໍ່ຄືເພື່ອນມິດທີ່ກ້າວໜ້າໃຫ້ດີ, ຍາດແຍ່ງການຊ່ວຍເຫຼືອຈາກສາກົນ ເພື່ອປັບປຸງກໍ່ສ້າງກອງທັບພວກເຮົາ ໃຫ້ກ້າວໜ້າສູ່ຄຸນນະພາບໃໝ່ ແລະ ທັນຍຸກສະໄໝ.

ໃນໂອກາດທີ່ຢ້ຽມຢາມ ແລະພົບປະໂອ້ລົມ ນາຍ ແລະພົນທະຫານ ຢູ່ກອງພົນທີ 2 ຂອງສະຫາຍ ບຸນທອງ ຈິດມະນີ ຍັງໄດ້ມອບເຄື່ອງອຸປະໂພກ-ບໍລິໂພກ ແລະເຄື່ອງກິລາ ປະກອບມີ ເຂົ້າສານ 3 ໂຕນ, ສາດ 100 ຜືນ, ມຸ່ງ 50 ດາງ, ເຄື່ອງໃຊ້ຄົວເຮືອນ 100 ຊຸດ, ບານສົ່ງ 10 ໜ່ວຍ,ບານເຕະ 10 ໜ່ວຍ, ກະຕໍ້ 10 ໜ່ວຍ, ຕາໜ່າງບານສົ່ງ ແລະກະຕໍ້ 10 ດາງ ແລະເຄື່ອງກິລາ 50 ຊຸດ, ພ້ອມນີ້ຍັງໄດ້ປູກຕົ້ນໄມ້ເພື່ອເປັນທີລະລືກໄວກອງພົນທີ 2 ຕື່ມອີກ .

ໂອກາດດັ່ງກ່າວ,ສະຫາຍ ບຸນທອງ ຈິດມະນີ ຍັງໄດ້ລົງຢ້ຽມຢາມພະນັກງານ- ນັກຮົບ ກອງພັນ 409,ກອງພັນ 627 ແລະກອງພັນ 614 ທີ່ຂຶ້ນກັບກອງພົນທີ 2.
ໂດຍ: ອາຫວຸ້ນ

แชร์