ປະຊຸມເຈົ້າໜ້າທີ່ຜູ້ອາວຸໂສເສດຖະກິດອາຊຽນ

  ວັນທີ 4 ເມສາ 2019 ທີ່ນະຄອນຫຼວງວຽງຈັນ ກົມນະໂຍບາຍກະຊວງອຸດສາຫະກໍາ ແລະການຄ້າໄດ້ຈັດກອງປະຊຸມເຈົ້າໜ້າທີ່ຜູ້ອາວຸໂສເສດຖະກິດອາຊຽນ ຄັ້ງທີ 2/50 ໂດຍການເປັນປະທານຂອງ ທ່ານ ໄຊຊະນະ ໄຊຍະກອນ ຫົວໜ້າກົມນະໂຍບາຍການຄ້າຕ່າງປະເທດ,ກະຊວງອຸດສາຫະກໍາ ແລະ ການຄ້າ, ທັງເປັນຫົວໜ້າເຈົ້າໜ້າທີ່ຜູ້ອາວຸໂສເສດຖະກິດອາຊຽນຂອງລາວ, ທ່ານ ນາງ ອໍລະມົນ ຊັບທະວີທໍາ ຫົວໜ້າກົມເຈລະຈາຈາກການຄ້າຕ່າງປະເທດກະຊວງການຄ້າ ແຫ່ງປະເທດໄທ, ບັນດາຄະນະຜຸ້ແທນຈາກ 10 ປະເທດສະມາຊິກອາຊຽນ,ກອງເລຂາອາຊຽນ ແລະ 4 ເທດຄູ່ຮ່ວມເຈລະຈາຂອງອາຊຽນ: ລາວ, ຈີນ, ສ. ເກົາຫຼີ, ຍີ່ປຸ່ນ ແລະອາເມລິກາເຂົ້າຮ່ວມ.

 ທ່ານ ນາງ ອໍລະມົນ ຊັບທະວີທໍາ ກ່າວວ່າ: ກອງປະຊຸມເຈົ້າໜ້າທີ່ຜູ້ອາວຸໂສເສດຖະກິດອາຊຽນຄັ້ງນີ້ເພື່ອຮັບຮູ້ຄວາມຄືບໜ້າຂອງການຈັດຕັ້ງປະຕິບັດບັນດາ ໜ້າວຽກພາຍໃຕ້ເສົ້າຄໍ້າເສດຖະກິດໂດຍສະເພາະແມ່ນແຜນວຽກບຸລະມິສິດພາຍໃຕ້ເສົ້າຄໍ້າເສດຖະກິດອາຊຽນໃນໄລຍະການເປັນປະທານອາຊຽນຂອງໄທ 20 19 ພາຍໃຕ້ຄໍາຂວັນ “ຮ່ວມແຮງຮ່ວມໃຈ, ກ້າວໄກ, ຍືນຍົງ”, ເພື່ອກະກຽມສະເໜີໃຫ້ລັດກະມົນເສດຖະກິດອາຊຽນພິຈາລະນາຮັບຮອງໃນທ້າຍເດືອນເມສາ 2019 ນີ້. ທັງນັ້ນ, ໂດຍເນັ້ນໃສ່ສົ່ງເສີມນະວັດຕະກໍາ ແລະຄວາມອາດສາມາດຂອງຈຸນລະວິສາຫະກິດ, ວິສະຫະກິດຂະໜາດນ້ອຍ ແລະ ກາງ,ການເພີ່ມທະວີການເຊື່ອມຈອດພາຍໃນອາຊຽນ ແລະການສົ່ງເສີມຄວາມຍືນຍົງໃນທຸກດ້ານ.

  ພ້ອມດຽວກັນນັ້ນ, ໃນກອງປະຊຸມຍັງປຶກສາຫາລືເພື່ອແກ້ໄຂບັນຫາຄົງຄ້າງເຊັ່ນ: ການເຊື່ອມຕໍ່ລະບົບການແຈ້ງພາສີປະຕູດຽວພາຍໃນອາຊຽນ, ການຮັບ ຮອງມາດຕະຖານຂອງສິ້ນສ່ວນພາຫະນະ, ການຮ່ວມມືດ້ານເສດຖະກິດໃນຂອບອາຊຽນ-ຈີນ, ອາຊຽນ-ສ.ເກົາຫຼີ, ອາຊຽນ-ຍີ່ປຸ່ນ, ອາຊຽນບວກສາມ ແລະອາຊຽນ-ອາເມລິກາ ເພື່ອສົ່ງເສີມການຄ້າ-ການລົງທຶນ ແລະຮັດແໜ້ນການຮ່ວມມືດ້ານເສດຖະກິດລະຫວ່າງອາຊຽນ ແລະ ຄູ່ຮ່ວມເຈລະຈາ.

ຂ່າວ: ວົງມະນີ  

แชร์