ເຊັນສັນຍາ ສໍາປະທານ (CA) ໂຄງການຂຸດຄົ້ນ ແລະປຸ່ງແຕ່ງແຮ່ຄໍາ, ແຮ່ມັງການ ຢູ່ 2 ເມືອງ ຂອງແຂວງໄຊສົມບູນ

ພິທີເຊັນສັນຍາ ສໍາປະທານ (CA) ໂຄງການຂຸດຄົ້ນ ແລະ ປຸ່ງແຕ່ງແຮ່ຄໍາ, ແຮ່ມັງການ ຢູ່ເມືອງອະນຸວົງ ແລະເມືອງລ້ອງແຈ້ງ ແຂວງໄຊສົມບູນ ໃນເນື້ອທີ່ 22,97 ກິໂລຕາແມັດ ລະຫວ່າງ ອົງການປົກຄອງ ແຂວງໄຊສົມບູນ ຕາງໜ້າໃຫ້ລັດຖະບານ ແຫ່ງ ສປປ ລາວ ກັບບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ໄດ້ຈັດຂຶ້ນໃນຕອນບ່າຍຂອງວັນທີ 17 ມັງກອນ 2023 ນີ້ ທີ່ຫ້ອງປະຊຸມຫ້ອງວ່າການແຂວງໂດຍມີ ທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍລັດຖະມົນຕີ ກະຊວງພະລັງງານ ແລະບໍ່ແຮ່, ກະຊວງອຸດສາຫະກຳ ແລະການຄ້າ, ປະທານບໍລິສັດ ຕະຫຼອດຮອດຮອງເລຂາພັກແຂວງ, ພະແນກການ ອ້ອມຂ້າງແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຄີພິຍານ.

ໂດຍໂຄງການຂຸດຄົ້ນ ແລະປຸງແຕ່ງແຮ່ຄໍາ, ແຮ່ມັງການຢູ່ເມືອງອະນຸວົງ ແລະເມືອງລ້ອງແຈ້ງ ແຂວງໄຊສົມບູນ ແມ່ນໄດ້ດໍາເນີນການຊອກຄົ້ນ,ສຳຫລວດ ແລະ ສຶກສາຄວາມເປັນໄປໄດ້ທາງດ້ານແຮ່ທາດ ຢູ່ 2 ເມືອງດັ່ງກ່າວ ມາເປັນເວລາ 2 ປີ ພາຍຫຼັງທີ່ໄດ້ເຊັນບົດບັນທຶກຄວາມເຂົ້າໃຈ MOU ກັບລັດຖະບານແຫ່ງ ສປປລາວ ແຕ່ປີ 2020 ເປັນຕົ້ນມາ ແລະ ເຫັນໄດ້ວ່າຢູ່ໃນຂອບເຂດເນື້ອທີ່ດັ່ງກ່າວແມ່ນມີບັນດາແຮ່ທາດຄື: ແຮ່ຄໍາ ແລະແຮ່ມັງການ. ດັ່ງນັ້ນ ບໍລິສັດຈຶ່ງໄດ້ດໍາເນີນການເຊັນສັນຍາ ເພື່ອສໍາປະທານໂຄງການຂຸດຄົ້ນ ແລະປຸ່ງແຕ່ງຢ່າງເປັນທາງການເພື່ອກໍານົດສິດ, ໜ້າທີ່ ແລະພັນທະຕ່າງໆ ລະຫວ່າງຄູ່ຮ່ວມສັນຍາກໍຄືລັດຖະບານ ແຫ່ງ ສປປ ລາວ ຕາງໜ້າໂດຍອົງການປົກຄອງ ແຂວງໄຊສົມບູນ ກັບບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ. ຊຶ່ງມີໄລຍະເວລາໃນການສຳປະທານ 20 ປີ ໃນນັ້ນ ໄລຍະການກໍ່ສ້າງ 2 ປີ, ໄລຍະຂຸດຄົ້ນ 15 ປີ ແລະໄລຍະການປິດບໍ່ 3 ປີ ໂດຍບໍລິສັດ ຕ້ອງໄດ້ມອບຄ່າຊັບພະຍາກອນລ່ວງໜ້າ ຈໍານວນ 1.000.000 ໂດລາສະຫະລັດ ໃນນັ້ນຕ້ອງມອບກ່ອນເຊັນສັນຍາ ຈໍານວນ 500.000 ໂດລາສະຫະລັດ ແລະ ມອບພາຍຫຼັງເຊັນສັນຍາອີກ ຈໍານວນ 500.000 ໂດລາສະຫະລັດ ພ້ອມທັງຕ້ອງປະຕິບັດພັນທະປະກອບສ່ວນພັດທະນາສັງຄົມ, ພັດທະນາທ້ອງຖີ່ນ ແລະເງິນຕິດຕາມທາງດ້ານວິຊາການ ຈໍານວນ 80.000 ໂດລາສະຫະລັດ/ປີ ຕາມທີ່ໄດ້ກໍານົດໄວ້ໃນສັນຍາ ເພື່ອຮັບປະກັນດ້ານຄວາມຖືກຕ້ອງ, ສອດຄ່ອງຕາມລະບຽບຫຼັກການພ້ອມທັງໄດ້ຮັບຜົນປະໂຫຍດຮ່ວມກັນທັງສອງຝ່າຍ. ຊຶ່ງພິທີ ລົງນາມເຊັນສັນຍາສຳປະທານໂຄງການໃນຄັ້ງນີ້ຕາງໜ້າຝ່າຍລັດຖະບານແຫ່ງ ສປປ ລາວ ເຊັນໂດຍທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ,ທ່ານ ບຸນທ່ຽມ ໄຊສົງຄາມ ຫົວໜ້າພະແນກພະລັງງານ ແລະບໍ່ແຮ່ແຂວງ, ທ່ານ ສົມລິດ ສຸພັດດີ ຮອງຫົວໜ້າພະແນກແຜນການ ແລະການລົງທຶນແຂວງ ແລະຕາງໜ້າຝ່າຍບໍລິສັດ ເຊັນໂດຍທ່ານ ຢັງຮົງເວີຍ ປະທານບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ແລະທ່ານ ວັນດີ ກວາລີວົງ ອໍານວຍການບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ໂດຍຊ້ອງໜ້າລັດຖະມົນຕີກະຊວງພະລັງງານ ແລະບໍ່ແຮ່, ກະຊວງອຸດສາຫະກຳ ແລະການຄ້າ, ການນໍາແຂວງຕະຫຼອດຮອດພາກສ່ວນທີ່ກ່ຽວຂ້ອງທັງສອງຝ່າຍຮ່ວມເປັນສັກຂີພິຍານ.
ບ.ກ: ຄໍາສາວ ເລືອງຄໍາທິບ ພາບ-ຂ່າວ: ພາພອນ ນະວົງໄຊ

แชร์