ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ເຄື່ອນໄຫວວຽກຢູ່ກອງພັນໃຫ່ຍ 497

ໃນວັນທີ 17 ມັງກອນ 2023, ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ, ຕິດຕາມໄປຄັ້ງນີ້ມີ ສະຫາຍ ບຸນເຫຼືອ ສິນໄຊວໍຣະວົງ, ຜູ້ວ່າທະນາຄານ ແຫ່ງ ສປປ ລາວ ພ້ອມດ້ວຍຄະນະ, ຄະນະນຳກະຊວງການຕ່າງປະເທດ, ສາມອົງການຈັດຕັ້ງມະຫາຊົນ ແລະຄະນະກົມຂອງກະຊວງການຕ່າງປະເທດໄດ້ລົງເຄື່ອນໄຫວຢ້ຽມຢາມອວຍພອນ ແລະພົບປະໂອ້ລົມບັນດານາຍ ແລະພົນທະຫານຢູ່ກອງພັນໃຫ່ຍ 497, ຢູ່ ແຂວງວຽງຈັນ, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ, ເຊິ່ງໄດ້ຮັບການຕ້ອນຮັບຢ່າງອົບອູ່ນຈາກ ສະຫາຍ ພົນຕີ ປະສິດ ທ່ຽງທໍາ, ຄະນະປະຈໍາພັກກະຊວງປ້ອງກັນປະເທດ, ຫົວໜ້າກົມໃຫ່ຍເຕັກນິກກອງທັບປະຊາຊົນລາວ, ຄະນະນຳກອງພົນ,ກອງກຽດຕິຍົດ, ບັນດາພະນັກງານຫຼັກແຫຼ່ງກົມກອງກ່ຽວຂ້ອງລວມທັງພະນັກງານປະຕິວັດອາວຸໂສບຳນານເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ, ສະຫາຍ ສະເຫຼີມໄຊ ກົມມະສິດ ໄດ້ຮັບຟັງການລາຍງານສະພາບການໂດຍຫຍໍ້ກ່ຽວກັບການເຄື່ອນໄຫວປະຕິບັດໜ້າທີ່ການເມືອງຂອງກົມກອງໃນໄລຍະຜ່ານມາຈາກ ສະຫາຍ ພັນເອກ ຄຳສຸກ ໄຊມວນສິນ, ຫົວໜ້າການທະຫານກອງພັນໃຫ່ຍຕີພິເສດ 497, ໂດຍສະເພາະແມ່ນການປະຕິບັດແນວທາງປ້ອງກັນຊາດປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ເຖິງວ່າໄລຍະຜ່ານມາສະພາບການພາກພື້ນ ແລະສາກົນ ແລະສະພາບການພາຍໃນປະເທດກໍ່ຄືກອງທັບ ໄດ້ປະເຊີນກັບຄວາມຫຍຸ້ງຍາກ ແລະສິ່ງທ້າທາຍຫຼາຍດ້ານກໍ່ຕາມແຕ່ບັນດາສະຫາຍຄະນະພັກ-ຄະນະບັນຊາ, ພະນັກງານຫຼັກແຫຼ່ງກໍ່ໄດ້ຕັ້ງໜ້າ, ສູ້ຊົນ, ບຸກບືນຜ່ານຜ່າ, ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ໃຫ້ມີຜົນສຳເລັດຢ່າງມີຄວາມຮັບຜິດຊອບສູງ, ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະສ້າງສາປະເທດຊາດ,ຮັບປະກັນເອກະລາດແຫ່ງຊາດໄດ້ຮັບການປົກປ້ອງຢ່າງໝັ້ນຄົງ, ການເມືອງສືບຕໍ່ມີສະຖຽນລະພາບ, ລະບອບປະຊາທິປະໄຕປະຊາຊົນໄດ້ຮັບການເສີມຂະຫຍາຍ, ສ້າງເງື່ອນໄຂອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ,ສ້າງສະພາບແວດລ້ອມທີ່ສະຫງົບສັນຕິໃຫ້ແກ່ປະຊາຊົນ ໃນການດຳລົງຊີວິດ, ທຳມາຫາກິນ ແລະສ້າງສາພັດທະນາປະເທດຊາດ.

ໃນໂອກາດດຽວກັນນີ້, ສະຫາຍ ສະເຫຼີມໄຊ ກົມມະສິດ ກໍໄດ້ໃຫ້ກຽດໂອ້ລົມນາຍ ແລະພົນທະຫານ ລວມທັງພະນັກງານອາວຸໂສບຳນານ, ໂດຍໄດ້ກ່າວສະແດງຄວາມຍ້ອງຍໍຊົມເຊີຍ ແລະ ອວຍພອນວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ ແຫ່ງການຕໍ່ສູ້ ແລະເຄື່ອນໄຫວຢ່າງລຽນຕິດໃນເງື່ອນໄຂທີ່ຫຍຸ້ງຍາກລໍາບາກ ແລະ ທຸລະກັນດານທີ່ສຸດນັ້ນ, ພາຍໃຕ້ການນຳພາຂອງພັກ, ບັນດາກຳລັງປະກອບອາວຸດປະຊາຊົນລາວ ໄດ້ເຮັດສຳເລັດພາລະກິດປະຕິວັດອັນຍິ່ງໃຫຍ່ ແລະ ໜັກໜ່ວງທີ່ພັກມອບໝາຍໃຫ້ຢ່າງສະຫງ່າງາມ, ສ້າງຜົນງານອັນດີເດັ່ນ, ວິລະກຳອັນລໍ້າເລີດປະດັບໄວ້ໃນໜ້າປະຫວັດສາດຂອງຊາດຢ່າງສົມກຽດ, ສ້າງມູນເຊື້ອອັນດີງາມຫຼາຍປະການໄວ້ໃຫ້ແກ່ກຳລັງປະກອບອາວຸດປະຕິວັດ, ສົມແລ້ວທີ່ເປັນກອງທັບວິລະຊົນຂອງຊາດລາວວິລະຊົນ, ຊຶ່ງໄດ້ຮັບຄຳສັນລະເສີນຈາກພັກ ແລະລັດ ວ່າ: "ກອງທັບ ຍາມໃດກໍ່ນໍາໜ້າໃນທຸກວຽກງານ,ເດັດດ່ຽວຜ່ານຜ່າທຸກອຸປະສັກ,ຕີເອົາຊະນະສັດຕູທຸກໂຕ, ສຳເລັດທຸກໜ້າທີ່, ສົມເປັນກຳລັງແກ່ນສານທີ່ເຂັ້ມແຂງຂອງການປະຕິວັດ, ເປັນເຄື່ອງມືອັນແຫຼມຄົມຂອງພັກ", ສືບຕໍ່ມີຜົນງານໃນໄລຍະຕໍ່ສູ້ປົດປ່ອຍຊາດຢ່າງອົງອາດມີໄຊ ກໍ່ຄື ໃນພາລະກິດປົກປັກຮັກສາ ແລະສ້າງສາປະເທດຊາດໄປຄຽງຄູ່ກັບການຮັບໃຊ້ສັງຄົມກໍ່ຄືຮັບໃຊ້ປະຊາຊົນ,ໂດຍໄດ້ຈັດຕັ້ງປະຕິບັດຕາມແນວທາງນະໂຍບາຍຂອງ ພັກ-ລັດ ຖືກທິດ, ສອດຄ່ອງກັບເງື່ອນໄຂສະພາບການຕົວຈິງ, ແມ່ນໝາກຜົນຈາກຄວາມບາກບັ່ນບຸກບືນ ແລະ ຄວາມສາມັກຄີເປັນປຶກແຜ່ນຂອງສະມາຊິກພັກ, ພະນັກ ງານ-ນັກຮົບ ໃນທົ່ວກົມກອງທີ່ທຸ້ມເທເຫື່ອແຮງກໍຄືສະຕິປັນຍາເຂົ້າໃນການຈັດຕັ້ງປະຕິບັດຢ່າງຕັ້ງໜ້າ, ເສີມຂະຫຍາຍມູນເຊື້ອຂອງກອງທັບປະຕິວັດ, ຍາມໃດກໍ່ຕອບສະໜອງຕໍ່ຄວາມຮຽກຮ້ອງຕ້ອງການຂອງ ພັກ-ລັດ ແລະປະຊາຊົນ ດ້ວຍຄວາມຈົ່ງຮັກພັກດີ, ຊື່ສັດບໍລິສຸດ ແລະເດັດດ່ຽວໜຽວແໜ້ນກ້າວເດີນຕາມອຸດົມການຂອງພັກ. ໃນໂອກາດນີ້, ກໍ່ໄດ້ແຈ້ງສະພາບການພາກພື້ນ ແລະສາກົນທີ່ພົ້ນເດັ່ນໃນປັດຈຸບັນ.

ໃນໂອກາດອັນທີ່ມີຄວາມໝາຍສຳຄັນນີ້, ສະຫາຍ ສະເຫຼີມໄຊ ກົມມະສິດ,ກໍໄດ້ຕາງໜ້າໃຫ້ສູນກາງພັກ, ລັດຖະບານ ແລະໃນນາມສ່ວນຕົວສະແດງຄວາມຍ້ອງຍໍສັນລະເສີນມາຍັງ ຄະນະພັກ- ຄະນະບັນຊາ, ບັນດາສະຫາຍນາຍ ແລະ ພົນທະຫານ ໃນທົ່ວກົມກອງ ທີ່ໄດ້ພ້ອມກັນຕັ້ງຫນ້າເຮັດສຳເລັດໜ້າທີ່ການເມືອງອັນມີກຽດສະຫງ່າຂອງຕົນ, ອວຍພອນໃຫ້ບັນດາສະຫາຍຄະນະພັກ-ຄະນະບັນຊາ, ພະນັກງານນັກຮົບທຸກສະຫາຍ ຈົ່ງມີສຸຂະພາບເຂັ້ມແຂງ ແລະ ສືບຕໍ່ຈັດຕັ້ງປະຕິບັດໜ້າທີ່ວຽກງານທີ່ມອບໝາຍໃຫ້ມີຜົນສຳເລັດໃໝ່ໃຫ່ຍຫຼວງກວ່າເກົ່າ. ພ້ອມດຽວກັນນີ້,ຍັງໄດ້ນໍາເອົາຄວາມເປັນຫ່ວງເປັນໄຍ ແລະຢື້ຢາມຖາມຂ່າວອັນອົບອຸ່ນ,ຄວາມສາມັກຄີຮັກແພງຂອງການນຳພັກ-ລັດ ຕໍ່ພະນັກງານ-ນັກຮົບ ແລະຄອບຄົວຜູ້ເສຍຊີວິດ, ຜູ້ບາດເຈັບ, ເຈັບປ່ວຍ, ບັນດາຄອບຄົວ ນາຍ ແລະ ພົນທະຫານ ທີ່ກຳລັງປະຕິບັດຫນ້າທີ່ຢູ່ເຂດທຸລະກັນດານລວມທັງພະນັກງານປະຕິວັດອາວຸໂສທີ່ອອກພັກຜ່ອນບຳນານ. ໃນໂອກາດນີ້, ສະຫາຍ ສະເຫຼີມໄຊ ກົມມະສິດ ພ້ອມດ້ວຍພັນລະຍາ, ສະຫາຍ ບຸນເຫຼືອ ສິນໄຊວໍຣະວົງ ແລະ ສາມອົງການຈັດຕັ້ງມະຫາຊົນ ກໍ່ໄດ້ມອບວັດຖຸປັດໄຈ ແລະ ເຄື່ອງກິລາຈຳນວນໜຶ່ງໃຫ້ແກ່ກອງພົນໃຫ່ຍ 497 ເພື່ອເປັນການຊຸກຍູ້ໃຫ້ກຳລັງໃຈບັນດານາຍ ແລະພົນທະຫານ ທີ່ກຳລັງປະຕິບັດຫນ້າທີ່ວຽກງານ. ນອກຈາກນີ້, ສະຫາຍ ສະເຫຼີມໄຊ ກົມມະສິດ, ພ້ອມດ້ວຍຄະນະກໍ່ໄດ້ສືບຕໍ່ລົງເຄື່ອນໄຫວຢ້ຽມຢາມກົມກອງຕົວແບບ ງໍ 423 ແລະຊົມການສະແດງລາຍການຕ່າງໆຢູ່ກອງເຄື່ອນທີ່ໄວ ງໍ 428 ຕື່ມອີກ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ

แชร์