ປະທານສະພາແຫ່ງຊາດຢ້ຽມຢາມ, ພະນັກງານ-ນັກຮົບ ກອງພົນທະຫານຮາບທີ 1

ໃນວັນທີ 17 ມັງກອນ 2023 ນີ້, ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນການພັກປະທານສະພາແຫ່ງຊາດ ໄດ້ເຄື່ອນໄຫວຢ້ຽມຢາມ, ເຮັດວຽກ ແລະພົບປະໂອ້ລົມພະນັກງານຫຼັກແຫຼ່ງ ແລະນັກຮົບຢູ່ກອງພົນທະຫານຮາບທີ 1 ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ ( 20/1/2/1949 – 20/1/2023 ) ແລະ ວັນສ້າງຕັ້ງກອງພົນທະຫານຮາບທີ 1 ຄົບຮອບ 38 ປີ ( 12/2/1985 – 12/2/2023 ), ໂດຍມີ ພົນໂທ ທອງລອຍ ສິລິວົງ ຮອງລັດຖະມົນຕີ ຫົວໜ້າກົມໃຫຍ່ການເມືອງກອງທັບກະຊວງປ້ອງກັນປະເທດ, ທ່ານຄໍາພັນ ສິດທິດໍາພາ ເຈົ້າແຂວງວຽງຈັນ, ພ້ອມດ້ວຍຄະນະໃຫ້ການຕ້ອນຮັບ.

ພົນຈັດຕະວາ ອຸ່ນຈັນ ແດງວັນສົມ ຫົວໜ້າການທະຫານ ກອງພົນທີ1 ລາຍງານໃຫ້ຮູ້ວ່າ: ກອງພົນທີທະຫານຮາບ ທີ1 ໄດ້ຮັບການສ້າງຕັ້ງຂຶ້ນໃນວັນທີ 12 ກຸມພາ 1985; ໃນເວລານັ້ນ, ເຮັດໜ້າທີ່ປົກປັກຮັກສາອົງການ, ການນໍາພັກ - ລັດ ແລະ6 ຕົວເມືອງ ໃນນະຄອນຫຼວງວຽງຈັນ,ເປັນກໍາລັງເຄື່ອນທີ່ຂອງສູນກາງ, ປັດຈຸບັນເຮັດໜ້າທີ່ເປັນກໍາລັງເຄື່ອນທີ່ໃຫ້ກະຊວງປ້ອງກັນປະເທດ ເຮັດໜ້າທີ່ປົກປັກຮັກສານະຄອນຫຼວງວຽງຈັນ, ບັນດາແຂວງເຂດໃຈກາງ ແລະດໍາເນີນພາລະກິດປົກປັກຮັກສາ ແລະສ້າງສາພັດທະນາປະເທດຊາດ.

ໃນໂອກາດນີ້ປະທານສະພາແຫ່ງຊາດໄດ້ໂອ້ລົມຄະນະພັກ-ຄະນະບັນຊາ, ພະນັກງານຫຼັກແຫຼ່ງ ແລະນັກຮົບໂດຍສະຫາຍໄດ້ສະແດງຄວາມຍ້ອງຍໍຊົມເຊີຍຢ່າງສຸດໃຈຕໍ່ຜົນງານ ແລະຜົນສໍາເລັດຫຼາຍດ້ານທີ່ພະນັກງານ-ນັກຮົບກອງພົນທະຫານຮາບທີ 1 ຍາດມາໄດ້ໃນໄລຍະຜ່ານມາ; ພ້ອມຍົກໃຫ້ເຫັນສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງໄວວາ, ສະຫຼັບຊັບຊ້ອນ ເຊິ່ງຄາດເດົາໄດ້ຍາກ, ໂດຍສະເພາະກໍ່ແມ່ສະພາບພາຍໃນປະເທດ ແລະ ຂອບເຂດກົມກອງຮັບຜິດຊອບ ພວມປະສົບກັບບັນຫາທ້າທາຍ, ທົດສອບຫຼາຍປະການ; ຕໍ່ບັນຫາດັ່ງກ່າວ ພະນັກງານ-ນັກຮົບກອງພົນທະຫານຮາບທີ1 ກໍ່ໄດ້ສ້າງຄວາມຕັດສິນໃຈສູງໂດຍເຊື່ອໝັ້ນຕໍ່ແນວທາງການນໍາພາຂອງພັກ-ລັດຖະບານ, ເຊື່ອໝັ້ນຕໍ່ກໍາລັງແຮງຂອງຕົນ, ມີຄວາມອົງອາດກ້າຫານ, ເດັດດ່ຽວໜຽວແໜ້ນ, ຍອມເສຍສະຫຼະເຫື່ອແຮງ ແລະຈິດໃຈ, ຄວາມຮູ້ຄວາມສາມາດເຂົ້າໃນພາລະກິດປະຕິວັດຊາດປະຊາທິປະໄຕ. ເພື່ອເປັນບ່ອນອີງ ແລະ ເພື່ອພ້ອມກັນບັນລຸຄາດໝາຍທີ່ວາງໄວ້ ແລະ ຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນປັດຈຸບັນ.

ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ໃຫ້ທິດຊີ້ນໍາດັ່ງນີ້: ຕ້ອງເຊີດຊູສິຕິລະວັງຕົວໃນການປົກປັກຮັກສາແນວທາງນະໂຍບາຍຂອງພັກ - ລັດ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາລະບອບປະຊາທິປະໄຕປະຊາຊົນໄວ້ໃຫ້ໝັ້ນຄົງ; ສົມທົບແໜ້ນວຽກງານປ້ອງກັນຊາດ-ປ້ອງກັນຄວາມສະຫງົບ ກັບການສ້າງສາພັດທະນາເສດຖະກິດ - ສັງຄົມ; ກອງທັບກໍ່ຄືກົມກອງ ຕ້ອງເປັນຫຼັກແຫຼ່ງ, ເປັນພາຫະນະອັນແຫຼມຄົມຂອງພັກ ໃນການນໍາພາປວງຊົນລາວ ເຮັດວຽກງານປ້ອງກັນຊາດ - ປ້ອງກັນຄວາມສະຫງົບ; ໃນນີ້, ວຽກງານກໍ່ສ້າງຮາກຖານຍັງແມ່ນວຽກງານຍຸດທະສາດຕົ້ນຕໍ່ຂອງພັກ; ດັ່ງນັ້ນ, ກົມກອງຕັ້ງທັບຢູ່ບ່ອນໃດຕ້ອງເຮັດວຽກງານກໍ່ສ້າງຮາກຖານການເມືອງໃຫ້ດີ,ປະກອບສ່ວນຢ່າງຕັ້ງໜ້າເຂົ້າໃນການປັບປຸງລະບົບອໍານາດປະຊາທິປະໄຕປະຊາຊົນ, ປົກປັກຮັກສາສິດເປັນເຈົ້າຂອງປະຊາຊົນ,ໂຄສະນາປຸກລະດົມຂົນຂວາຍປະຊາຊົນໃຫ້ສະມັກຄີປຸ້ມລຸມກັນສ້າງສາພັດທະນາບ້ານຊ່ອງ ແລະປະຕິບັດໜ້າທີ່ປ້ອງກັນຊາດປ້ອງກັນຄວາມສະຫງົບຢູ່ຮາກຖານ.

ກຳລັງປະກອບອາວຸດຂອງພວກເຮົາແມ່ນກຳລັງຂອງພັກ, ແມ່ນພັກປະຊາຊົນປະຕິວິດລາວເປັນຜູ້ສ້າງຂຶ້ນ ແລະກໍ່ໄດ້ເຕີບໃຫຍ່ເຂັ້ມແຂງຂຶ້ນ, ຢູ່ໃນການອົບຮົມບົ່ມສອນຂອງພັກມາໂດຍຕະຫຼອດ; ດັ່ງນັ້ນ, ບໍ່ວ່າຈະຢູ່ໃນໄລຍະໃດກໍ່ຕ້ອງຮັບປະກັນຄວາມຈົ່ງຮັກພັກດີຢ່າງສຸດຊຶ້ງຕໍ່ພາລະກິດຂອງພັກ ແລະ ປະເທດຊາດ;ທົ່ວກອງທັບກໍ່ຄືກົມກອງ ຕ້ອງຢູ່ໃຕ້ການນໍາພາເດັດຂາດໂດຍກົງ ແລະ ຮອບດ້ານຂອງພັກ, ຫົວໜ່ວຍກົມກອງຕ່າງໆຕ້ອງຢູ່ໃຕ້ການນໍາພາຂອງຄະນະພັກຂັ້ນຂອງຕົນ,ຕ້ອງຮັບປະກັນໃຫ້ຄະນະພັກນຳພາທຸກວຽກງານ, ເປັນຜູ້ຕົກລົງຕັດສິນທຸກບັນຫາສໍາຄັນຂອງກົມກອງ, ໄປພ້ອມນີ້ຕ້ອງປັບປຸງແບບແຜນວິທີເຮັດວຽກໃຫ້ມີລັກສະນະປະຕິວັດບຸກ, ມີວິທະຍາສາດ, ແທດເຖິງຕົວຈິງ ແລະ ໂປ່ງໃສ, ມີການແບ່ງງານ, ມອບໝາຍຄວາມຮັບຜິດຊອບຢ່າງຈະແຈ້ງ, ສົມທົບຢ່າງກົມກຽວລະຫວ່າງບົດບາດ-ຄວາມສາມາດນຳພາຂອງໝູ່ຄະນະ ກັບ ບົດບາດ-ຄວາມສາມາດນໍາພາຂອງບຸກຄົນໃນຄະນະ, ແບບແຜນນຳພາຕ້ອງປະດິດສ້າງ, ກ້າຄິດ, ກ້າເຮັດ ແລະ ກ້າຮັບຜິດຊອບຕໍ່ຜົນໄດ້ຜົນເສຍໃນການຈັດຕັ້ງປະຕິບັດໜ້າທີ່ການເມືອງທີ່ນອນໃນຂອບເຂດຮັບຜິດຊອບໂດຍຖືເອົາຜົນປະໂຫຍດຂອງຊາດ, ຂອງປະຊາຊົນເປັນບ່ອນອີງ.

ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ; ໃນນັ້ນ, ຖືເອົາຄຸນນະພາບທາງດ້ານການເມືອງ-ແນວຄິດເປັນກົກ, ເອົາຄວາມສາມາດດ້ານວິຊາສະເພາະ, ຫົວຄິດປະດິດສ້າງ ແລະການຈັດຕັ້ງບັນຊາເປັນສິ່ງສຳຄັນ; ຕ້ອງມີແຜນການ ແລະປະຕິບັດລະບອບຫັດແອບເພື່ອຍົກສູງຄວາມສາມາດທາງດ້ານສິນລະປະຍຸດ-ຍຸດທະວິທີ, ລະດັບວິຊາສະເພາະໃຫ້ສູງຂຶ້ນ ທັງຍົກສູງສະຕິການຈັດຕັ້ງປະຕິບັດລະບຽບວິໄນໃຫ້ເຂັ້ມງວດ; ພ້ອມກັນນີ້, ກໍ່ຕ້ອງຕັ້ງໜ້າປະກອບສ່ວນເຂົ້າໃນການຊ່ວຍເຫຼືອກໍາລັງທ້ອງຖິ່ນ ຢູ່ຂັ້ນຮາກຖານໃນການປັບປຸງລະບົບການຈັດຕັ້ງ, ອົບຮົມຫັດແອບວຽກງານສຶກສາປ້ອງກັນຊາດໃຫ້ກວ້າງຂວາງເພື່ອໃຫ້ເຂົາເຈົ້າສາມາດເຮັດລ້ອນໜ້າທີ່ ໃນການປົກປັກຮັກສາທ້ອງຖິ່ນຂອງຕົນ.

ຕ້ອງສຸມທຸກເງື່ອນໄຂຄວາມສາມາດເພື່ອກ້າວໄປເຖິງການກຸ້ມຕົນເອງຢ່າງຮອບດ້ານ, ໃຫ້ຖືເອົາວຽກງານຄຸ້ມຄອງ, ລ້ຽງດູທັບດ້ວຍການສ້າງພະລາທິການກັບທີ່ເປັນວຽກງານຕົ້ນຕໍເພື່ອແກ້ໄຂຄວາມຫຍຸ້ງຍາກຝຶດເຄືອງດ້ານຊີວິດການເປັນຢູ່ໂດຍສຸມໃສ່ດ້ານກະສິກໍາເປັນທ່າແຮງ (ການປູກຝັງ, ລ້ຽງສັດ) ໃຫ້ເປັນຂະບວນ, ຂະຫຍາຍດ້ານການບໍລິການທີ່ຕິດພັນກັບຂົງເຂດປ້ອງກັນຊາດໃຫ້ຄ່ອຍເພີ່ມຂຶ້ນຕາມເງື່ອນໄຂ; ພ້ອມກັນນັ້ນ, ກໍ່ຕ້ອງເຂົ້າຮ່ວມຢ່າງຕັ້ງໜ້າໃນການກໍ່ສ້າງກິດຈະການດ້ານເສດຖະກິດ-ສັງຄົມຕ່າງໆຢູ່ທ້ອງຖິ່ນນັ້ນ, ອອກແຮງຊ່ວຍເຫຼືອປະຊາຊົນໃນການປັບປຸງຊີວິດການເປັນຢູ່ດ້ານວັດຖຸ ແລະວັດທະນະທຳໃຫ້ນັບມື້ນັບດີຂຶ້ນ.

ໂອກາດດຽວກັນນີ້ປະທານສະພາແຫ່ງຊາດ ຍັງໄດ້ໄປຢ້ຽມຢາມກອງພັນ 631 ທ່ຽວຊົມຄ້າຍຄູ, ຢ້ຽມຊົມປືນໃຫຍ່ໜ້າດິນ ແລະ ສໍາຜັດກັບວິຖີການດໍາລົງຊີວິດຂອງນາຍ ແລະພົນທະຫານ ໃນກົມກອງຕົວຈິງ, ພ້ອມກັນນີ້ປະທານສະພາແຫ່ງຊາດຍັງໄດ້ນໍາເອົາອຸປະກອນທາງການແພດ, ອຸປະກອນການຫຼິ້ນກິລາ ແລະເຄື່ອງບໍລິໂພກ ມອບໃຫ້ນາຍ ແລະພົນທະຫານກອງພົນທີ 1 ທີ່ປະຕິບັດໜ້າທີ່ຢູ່ສະໜາມ ແລະເຂດຫ່າງໄກຕື່ມອີກ.
ໂດຍ: ໂກຮັງ ພັນທະວົງ.

แชร์