ກອງປະຊຸມສະຫຼຸບວຽກງານແຜນການ ແລະການລົງທຶນທົ່ວປະເທດ

ກະຊວງແຜນການແລະການລົງທຶນ (ຜທ) ໄດ້ຈັດກອງປະຊຸມສະຫຼຸບວຽກງານ ແຜນການ ແລະ ການລົງທຶນ ທົ່ວປະເທດ ປະຈຳປີ 2022 ແລະ ທິດທາງປີ 2023 ຂຶ້ນໃນວັນທີ 17 ມັງກອນນີ້ ທີ່ຫໍປະຊຸມແຫ່ງຊາດໂດຍການເປັນປະທານຂອງ ທ່ານ ຄໍາເຈນ ວົງໂພສີລັດຖະມົນຕີກະຊວງແຜນການ ແລະການລົງທຶນ,ມີລັດຖະມົນຕີ, ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ໄດ້ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2022 ແລະ ທິດທາງແຜນການ ປີ 2023, ສະຫຼຸບຕີລາຄາການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ (2021-2023) ທີ່ຕິດພັນກັບຂະແໜງແຜນການ ແລະການລົງທຶນ; ຮັບຟັງການເຜີຍແຜ່ດໍາລັດຂອງທ່ານນາຍົກ ລັດຖະມົນຕີ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະແຜນງົບປະມານແຫ່ງລັດ ປະຈໍາປີ 2023, ບົດແນະນໍາຂອງລັດຖະມົນຕີ ກະຊວງແຜນການ ແລະການລົງທຶນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນການລົງທຶນຂອງລັດ ປະຈໍາປີ 2023 ແລະອື່ນໆ, ຮັບຟັງການປະກອບຄໍາເຫັນຂອງບັນດາຂະແໜງການ ແລະທ້ອງຖິ່ນຈໍານວນໜຶ່ງທີ່ຕິດພັນກັບວຽກງານແຜນການ ແລະການລົງທຶນ.

ທ່ານ ຄຳເຈນ ວົງໂພສີ ໄດ້ລາຍງານການຈັດຕັ້ງປະຕິບັດວຽກງານແຜນການ ແລະ ການລົງທຶນປີ 2022 ຜ່ານມາໂດຍໄດ້ຍົກໃຫ້ເຫັນຜົນສໍາເລັດຫຼາຍດ້ານເປັນຕົ້ນວຽກງານດ້ານສະຖິຕິ: ການຜະລິດຂໍ້ມູນສະຖິຕິທາງການໄດ້ຮັບການປັບປຸງດີຂຶ້ນສາມາດຮັບໃຊ້ການສະຫຼຸບຕີລາຄາແຜນພັດທະນາເສດຖະກິດ-ສັງຄົມແຫ່ງຊາດ ທ່ວງທັນກັບສະພາບການຫຼາຍຂຶ້ນກວ່າເກົ່າເປັນຕົ້ນການຄາດຄະເນໂຕເລກລວມຍອດຜະລິດຕະພັນພາຍໃນປະຈໍາງວດ,ໂຕເລກລວມຍອດຜະລິດຕະພັນພາຍໃນປະຈຳປີດ້ານການໃຊ້ຈ່າຍ,ດັດຊະນີລາຄາ-ອັດຕາເງິນເຟີ້ຂອງສປປລາວ,ການສະໜອງໂຕເລກສະຖິຕິດ້ານເສດຖະກິດ,ສັງຄົມ (ພົນລະເມືອງ ແລະຄວາມທຸກຍາກ) ແລະອື່ນໆ.

ສຳລັບວຽກງານການວາງແຜນ ແລະການລົງທຶນຂອງລັດ ແລະປະເມີນຜົນໂຄງການລົງທຶນຂອງລັດ: ໄດ້ຄົ້ນຄວ້າກໍານົດຫຼັກການ, ເງື່ອນໄຂ ແລະຂັ້ນຕອນໃນການດັດແກ້ມູນຄ່າໂຄງການລົງທຶນຂອງລັດທີ່ຕິດພັນກັບການເໜັງຕີງຂອງລາຄາວັດສະດຸກໍ່ສ້າງໃນທ້ອງຕະຫຼາດທີ່ເພີ່ມຂຶ້ນ; ໄດ້ຄົ້ນຄວ້ານໍາສະເໜີລັດຖະບານເພື່ອອອກນະໂຍບາຍແກ້ໄຂໜີ້ສິນໂຄງການລົງທຶນຂອງລັດດ້ວຍຮູບແບບຕ່າງໆ ເປັນຕົ້ນ: ດ້ວຍຮູບແບບອວ່າຍໜີ້ 3 ແຈ ແລະອອກພັນທະບັດຊໍາລະໂດຍກົງໃຫ້ໂຄງການເພື່ອສ້າງສະພາບຄ່ອງ ແລະຊຸກຍູ້ໃຫ້ຜູ້ປະກອບການສາມາດດໍາເນີນທຸລະກິດໄດ້ຢ່າງຄ່ອງຕົວເຮັດໃຫ້ໜີ້ສິນລົງທຶນຂອງລັດຢູ່ໃນລະດັບທີ່ສາມາດຄຸ້ມຄອງໄດ້. ສຳລັບການປະເມີນ ໄດ້ປະເມີນ ແລະລາຍງານຕໍ່ກອງປະຊຸມຮັບຮອງຜົນການປະເມີນທັງໝົດ ຈໍານວນ 522 ໂຄງການ; ໃນນັ້ນ, ສາມາດອອກໃບຢັ້ງຢືນໄດ້ 447 ໂຄງການ, ບໍ່ສາມາດອອກໃບຢັ້ງຢືນໄດ້ ຈຳນວນ 75 ໂຄງການຊຶ່ງໄດ້ແຈ້ງຕອບໃຫ້ພາກສ່ວນທີ່ສະເໜີໂຄງການມາປະເມີນແລ້ວ. ໄດ້ມີການດັດປັບມູນຄ່າລວມຂອງໂຄງການໃຫ້ສອດຄ່ອງກັບລະບຽບການກ່ຽວຂ້ອງຈາກປະມານ,ວຽກງານສົ່ງເສີມ ແລະຄຸ້ມຄອງການລົງທຶນ ແລະເຂດເສດຖະກິດພິເສດ: ວຽກງານບໍລິການປະຕູດຽວ, ກົນໄກການອອກອະນຸຍາດລົງທຶນໄດ້ຮັບການປັບປຸງໃຫ້ມີຄວາມສະດວກວ່ອງໄວຂຶ້ນທັງຂັ້ນສູນກາງ ແລະທ້ອງຖິ່ນດ້ວຍການຕັດຂອດຂັ້ນການອະນຸມັດການລົງທຶນ ແລະການດໍາເນີນທຸລະກິດໃຫ້ສັ້ນລົງ.

ສຳລັບການສົ່ງເສີມການລົງທຶນ ແລະຄຸ້ມຄອງເຂດເສດຖະກິດພິເສດໄດ້ເປັນເຈົ້າການຄົ້ນຄວ້າ ແລະລາຍງານລັດຖະບານພິຈາລະນາອະນຸມັດບັນດາໂຄງການລົງທຶນສໍາປະທານ ແລະກິດຈະການໃນບັນຊີຄວບຄຸມຈຳນວນໜຶ່ງຊຶ່ງສາມາດດຶງດູດການລົງທຶນໄດ້ເຖິງ 37 ພັນຕື້ກີບ ຫຼື ເທົ່າກັບ 2,39 ຕື້ໂດລາ. ສຳລັບເຂດເສດຖະກິດພິເສດ ສາມາດດຶງດູດການລົງທຶນໂດຍມີທຶນຈົດທະບຽນ 167 ລ້ານກວ່າໂດລາ ແລະຄາດຄະເນມູນຄ່າການລົງທຶນທັງໝົດ 236 ລ້ານໂດລາແລະປະຕິບັດພັນທະເຂົ້າໃຫ້ງົບປະມານຂອງລັດ 192 ຕື້ກວ່າກີບ, ສ້າງວຽກເຮັດງານທໍາ ໄດ້ທັງໝົດ 62.450 ຄົນ ໃນນີ້ ແຮງງານລາວ 32.058 ຄົນ.

ສຳລັບທິດທິດທາງແຜນການເພື່ອສາມາດປະຕິບັດໜ້າວຽກຈຸດສຸມໃນປີ2023ແມ່ນສຸມໃສ່ປະຕີບັດຄາດໝາຍຂອງແຜນພັດທະນາເສດຖະກິດ-ສັງຄົມ ປະຈຳປີ ແລະ 5 ວຽກຈຸດສຸມຂອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກເສດຖະກິດ-ການເງິນ ໃຫ້ບັນລຸຕາມຄາດໝາຍທີ່ໄດ້ກຳນົດໄວ້ເພື່ອເລັ່ງຟື້ນຟູເສດຖະກິດ ແລະສ້າງສະຖຽນລະພາບເສດຖະກິດມະຫາພາກ ແລະແກ້ໄຂສະພາບຄວາມທຸກຍາກຂອງປະຊາຊົນ,ເພີ່ມທະວີການປັບປຸງ ແລະ ສ້າງຖານຂໍ້ມູນສະຖິຕິຢ່າງຮອບດ້ານ ແລະຄົບຊຸດເພື່ອສະໜັບສະໜູນການຄົ້ນຄວ້າ, ການວາງແຜນ, ການພິຈາລະນາ ແລະ ການຕິດຕາມການລົງທຶນຂອງລັດ ແລະເອກະຊົນ ແລະການຕິດຕາມປະເມີນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບວາລະແຫ່ງຊາດ ຢ່າງເປັນວິທະຍາສາດ ແລະ ເປັນມືອາຊີບ.ເປັນໃຈກາງໃນການຊຸກຍູ້ການຜະລິດ ແລະບໍລິການທີ່ເປັນຂະແໜງການເສດຖະກິດປາຍແຫຼມ ແລະເປັນທ່າແຮງຂອງແຕ່ລະທ້ອງຖິ່ນໃຫ້ຂະຫຍາຍຕົວເພື່ອສ້າງເງື່ອນໄຂໃນການຫັນປ່ຽນໂຄງປະກອບເສດຖະກິດຕາມພາກສ່ວນ, ຂະແໜງການ ແລະ ເຂດແຄ້ວນ ຕາມທິດຫັນເປັນອຸດສາຫະກຳ ແລະ ທັນສະໄໝ ແລະ ມີຄຸນະພາບສູງຂຶ້ນ,ຫັນປ່ຽນລະບົບ ແລະກົນໄກການເຮັດວຽກ,ການປະສານງານ ແລະຕິດຕາມປະເມີນຜົນໃນແຕ່ລະວຽກງານພາຍໃນຂະແໜງການ,ລະຫວ່າງຂະແໜງການຕ່າງໆ ແລະລະຫວ່າງຂັ້ນສູນກາງ ແລະທ້ອງຖິ່ນໃຫ້ມີປະສິດທີຜົນ ແລະ ເປັນທັນສະໄໝ, ເອົາໃຈໃສ່ການສ້າງ ແລະ ພັດທະນາບຸກຄະລາກອນຂອງຂະແໜງການແຜນການ ແລະ ການລົງທຶນທັງຂັ້ນສູນກາງ ແລະ ທ້ອງຖິ່ນໃຫ້ມີຄຸນນະພາບສູງຂຶ້ນ ແລະກາຍເປັນເສນາທິການທີ່ເຂັ້ມແຂງໃນການຊຸກຍູ້ວຽກງານຂອງຂະແໜງການແຜນການ ແລະການລົງທຶນທີ່ແທ້ຈິງ.
(ຂ່າວ-ພາບ:ສຳນານ)

แชร์