ຮອງປະທານປະເທດ ຊີ້ນຳວຽກງານຢູ່ແຂວງຈຳປາສັກ

ໃນວັນທີ 16 ມັງກອນ 2023 ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມ ແລະຊີ້ນຳວຽກງານ ຢູ່ແຂວງຈຳປາສັກ ໂດຍໄດ້ຮັບການຕ້ອນຮັບຈາກທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະນຳ, ມີຫົວໜ້າພະແນກການໃນຂົງເຂດວຽກງານເສດຖະກິດເຂົ້າຮ່ວມ.

ທ່ານຮອງປະທານປະເທດໄດ້ຮັບຟັງການລາຍງານຈາກບັນດາຫົວໜ້າພະແນກການກ່ຽວກັບການຈັດຕັ້ງປະຕິບັດວຽກງານປີ 2022 ແລະ ທິດທາງແຜນປີຕໍ່ໜ້າໃນຂົງເຂດ ຂະແໜງການເງິນ, ລາຍງານການປ່ອຍສິນເຊື່ອ ແລະ ຍອດເຫຼືອເງິນຝາກ, ຂໍ້ສະດວກ ແລະ ຂໍ້ຫຍຸ້ງຍາກ ກ່ຽວກັບການລົງທຶນຜ່ານປະຕູດຽວ, ການຈັດສັນທຶນຕາມການແບ່ງຂັ້ນຄຸ້ມຄອງຂອງແຂວງ, ລາຍງານການສົ່ງເສີມສິນຄ້າສົ່ງອອກ, ຂໍ້ສະດວກ ແລະຂໍ້ຫຍຸ້ງຍາກໃນການຈັດຕັ້ງປະຕິບັດນະໂຍບາຍສົ່ງເສີມການຜະລິດ ເປັນສິນຄ້າໂດຍສະເພາະດ້ານນິຕິກຳຂອງສະພາ, ຂອງລັດຖະບານ, ແລະທ້ອງຖິ່ນ,ກົນໄກການຕະຫລາດໃນການສົ່ງເສີມສິນຄ້າລາວເພື່ອສົ່ງອອກໄປຕະຫລາດພາຍໃນປະເທດຈາກແຂວງຈຳປາສັກໄປ ແຂວງອື່ນໆ ຫລືໄປຕ່າງປະເທດ;ການຄຸ້ມຄອງລາຄາສິນຄ້າ ແລະການອະນຸຍາດນຳເຂົ້າສິນຄ້າ ແລະຮັບຟັງລາຍງານການສົ່ງເສີມການຜະລິດໃນວຽກງານກະສິກຳໂດຍສະເພາະສິນຄ້າທີ່ລັດຖະບານລາວໄດ້ເຊັນກັບ ຫວຽດນາມ, ຈີນ ແລະ ໄທ; ກົນໄກການປະສານງານກ່ຽວກັບການສົ່ງເສີມການຜະລິດ ກັບກະຊວງທີ່ກ່ຽວຂ້ອງຊີ້ໃຫ້ເຫັນດ້ານດີ ແລະດ້ານອ່ອນທີ່ຈະໄດ້ສືບຕໍ່ແກ້ໄຂ.

ໂອກາດນີ້, ທ່ານນາງ ປານີ ຢາທໍ່ຕູ້ ກໍໄດ້ມີຄຳເຫັນໂອ້ລົມ ໂດຍໄດ້ຍ້ອງຍໍຊົມເຊີຍຄະນະພັກ-ອົງການປົກ ຄອງແຂວງເຫັນໄດ້ຄວາມພະຍາຍາມໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ; ແຜນງົມປະມານ ຂອງລັດຖະບານ ໂດຍສະເພາະ ຂອງແຂວງຈຳປາສັກ ທີ່ມີຫລາຍດ້ານປະຕິບັດໄດ້ດີ, ບັນດາພະແນກ ການມີຄວາມເປັນເຈົ້າການໃນການຈັດຕັ້ງປະຕິບັດສິດ,ໜ້າທີ່, ພາລະບົດບາດ, ມີການແບ່ງຂັ້ນຄຸ້ມຄອງ ແລະຫັນເຂົ້າສູ່ການຄຸ້ມຄອງລັດດ້ວຍລະບຽບກົດໝາຍ. ພ້ອມນັ້ນ, ທ່ານຮອງປະທານປະເທດ ຍັງໄດ້ເນັ້ນໃຫ້ ຄະນະພັກ-ອົງ ການປົກຄອງແຂວງຈຳປາສັກ ເອົາໃຈໃສ່ໃນການຊີ້ນຳການຈັດຕັ້ງປະຕິບັດ 2 ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຫັນເຂົ້າສູ່ແຜນງານ,ເປັນໂຄງການລະອຽດ,ເປັນຄວາມຮັບຜິດຊອບລວມຂອງທຸກຂະແໜງການ, ລວມທັງຜູ້ປະກອບການ ແລະປະຊາຊົນ, ເພີ່ມທະວີການຄຸ້ມຄອງເງິນຕາ, ສົ່ງເສີມການຜະລິດເປັນສິນຄ້າດ້ວຍການສ້າງກົນໄກປະສານງານໃນການຮ່ວມມື ແລະ ການແກ້ໄຂວຽກງານດັ່ງກ່າວຕ້ອງຮັບການຈັດຕັ້ງປະຕິບັດຢ່າງເຂັ້ມງວດ.
ຂປລ. ຂ່າວພາບ: ທັດຊະນະ, ພູທິບສະຫວັນ

แชร์