ຮອງນາຍົກລັດຖະມົນຕີ ຢ້ຽມຢາມວິທະຍາຄານນາຍທະຫານບົກກົມມະດຳ

ໃນວັນທີ 16 ມັງກອນທີ່ຜ່ານມາ ທ່ານ ກິແກ້ວ ໄຂຄຳພິທູນ ກຳມະການກົມການ ເມືອງສູນກາງພັກ, ຮອງນາຍົກລັດຖະມົນຕີ ພ້ອມຄະນະລົງຢ້ຽມຢາມວິທະຍາຄານນາຍທະຫານບົກກົມມະດຳເນື່ອງໃນໂອກາດວັນສ້າງກອງທັບປະຊາຊົນລາວ ຄົບຮອບ 74 ປີ ( 20 ມັງກອນ 1949-20 ມັງກອນ 2023) ໂດຍໄດ້ຮັບການຕ້ອນຮັບຈາກ ທ່ານ ພົນຈັດຕະວາ ຖາວອນ ແກ້ວອິນທະວົງ ຫົວໜ້າການເມືອງວິທະຍາຄານນາຍທະຫານບົກກົມມະດຳພ້ອມຄະນະ.

ໂອກາດນີ້, ທ່ານ ກິແກ້ວ ໄຂຄຳພິທູນ ໄດ້ຫວນຄືນມູນເຊື້ອປະຫວັດຄວາມເປັນມາຂອງວັນສ້າງຕັ້ງກອງທັບປະຊາຊົນລາວ ໃນໄລຍະ 74 ປີຜ່ານມາພ້ອມທັງເນັ້ນໃຫ້ຄະນະພັກ-ຄະນະອຳນວຍການ, ພະນັກງານ-ນັກຮົບ ວິທະຍາຄານກົມມະດຳຈົ່ງເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກສາ ໝາກຜົນຂອງການປະຕິວັດ, ສົມທົບແໜ້ນກັບວຽກງານການປ້ອງກັນຊາດ-ປ້ອງກັນຄວາມສະຫງົບ ແລະ ການສ້າງສາພັດທະນາເສດຖະກິດ-ສັງ ຄົມ ເພື່ອສືບຕໍ່ກໍ່ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຢູ່ຮາກຖານໃຫ້ທົ່ວເຖິງ, ຍົກສູງສະຕິເປັນເຈົ້າໃນການປົກປັກຮັກສາທ້ອງຖິ່ນ, ຕ້ານທຸກການເຄື່ອນໄຫວມ້າງເພທຳລາຍໃນຫຼາຍດ້ານຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການ ໄປພ້ອມກັບເພີ່ມທະວີການເຮັດວຽກງານກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານຕາມທິດ 3 ສ້າງ, ກົມກອງຕັ້ງທັບຢູ່ບ່ອນໃດ ຕ້ອງເຮັດວຽກງານກໍ່ສ້າງຮາກຖານຢູ່ບ່ອນນັ້ນໃຫ້ດີ, ປະກອບສ່ວນຢ່າງຕັ້ງໜ້າເຂົ້າໃນການປັບປຸງລະບົບອຳນາດປະຊາທິປະໄຕປະຊາຊົນ, ປົກປັກຮັກສາສິດເປັນເຈົ້າຂອງປະຊາຊົນ, ໂຄສະນາປຸກລະດົມຂົນຂວາຍປະຊາຊົນໃຫ້ສາມັກຄີປຸ້ມລຸມກັນ ສ້າງສາພັດທະນາບ້ານຊ່ອງ ແລະ ປະຕິບັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ ຢູ່ຮາກຖານປັບ ປຸງແບບແຜນວິທີເຮັດວຽກໃຫ້ມີວິທະຍາສາດ ສອດຄ່ອງກັບໜ້າທີ່ການເມືອງຂອງຕົນ, ເຮັດວຽກເປັນໝູ່ຄະນະແບ່ງໃຫ້ບຸກຄົນຮັບຜິດຊອບຢ່າງຂາດຕົວ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນ ເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ. ໃນນັ້ນ, ຖືເອົາຄຸນນະພາບທາງດ້ານການເມືອງ-ແນວຄິດເປັນກົກ, ເອົາຄວາມສາມາດດ້ານວິຊາສະເພາະມີຫົວ ຄິດປະດິດສ້າງ ແລະ ການຈັດຕັ້ງບັນຊາຕ້ອງມີແບບແຜນ ແລະປະຕິບັດລະບອບຫັດແອບເພື່ອຍົກສູງຄວາມສາມາດທາງດ້ານສິນລະປະຍຸດ-ຍຸດທະວິທີ, ຍົກສູງສະຕິການຈັດຕັ້ງລະບຽບວິໄນໃຫ້ເຂັ້ມງວດເພື່ອກ້າວໄປເຖິງການກຸ້ມຕົນເອງຢ່າງຮອບດ້ານ ໃຫ້ຖືເອົາວຽກງານຄຸ້ມຄອງ,ລ້ຽງດູທັບດ້ວຍການສ້າງພະລາທິການກັບທີ່ເປັນວຽກງານຕົ້ນຕໍເພື່ອແກ້ໄຂຊີວິດການເປັນຢູ່ໃຫ້ດີຂຶ້ນໂດຍສຸມໃສ່ດ້ານກະສິກຳທີ່ເປັນທ່າແຮງ (ການປູກຝັງ, ລ້ຽງສັດ) ໃຫ້ເປັນຂະບວນກວ້າງຂວາງ, ໄປຄຽງຄູ່ກັນນີ້ຍັງປະຕິບັດຫລັກການພົວພັນຮ່ວມມືກັບປະເທດເພື່ອນມິດຍຸດທະສາດເພີ່ມທະວີການຮ່ວມມືຮອບດ້ານກັບກອງທັບປະເທດໃກ້ຄຽງ ແລະການຮ່ວມມືກັບບັນດາປະເທດສັງຄົມນິຍົມອ້າຍນ້ອງ, ຍາດແຍ່ງການຊ່ວຍເຫລືອຈາກສາກົນເພື່ອປັບປຸງກໍ່ສ້າງກອງທັບ ໃຫ້ກ້າວໜ້າສູ່ຄຸນນະພາບໃໝ່.

ໂອກາດດຽວກັນນີ້, ທ່ານ ພົນຈັດຕະວາ ຖາວອນ ແກ້ວອິນທະວົງ ໄດ້ລາຍງານໂດຍຫຍໍ້ສະພາບທີ່ຕັ້ງ, ພາລະບົດບາດ ແລະຈຸດພິເສດຂອງວິທະຍາຄານໃນໄລຍະຜ່ານມາ ຊຶ່ງວິທະຍາຄານນາຍທະຫານບົກກົມມະດໍາ, ມີພາລະບົດບາດສິດສອນບຳລຸງ-ກໍ່ສ້າງນາຍສິບ ແລະນາຍທະຫານສືບທອດເພື່ອປະກອບໃຫ້ແກ່ກຳລັງຫລວງ-ກຳລັງທ້ອງຖິ່ນໃນທົ່ວປະເທດ. ພ້ອມນັ້ນ, ຍັງໄດ້ເອົາໃຈໃສ່ປັບປຸງກໍ່ສ້າງກົມກອງໃຫ້ມີຄວາມໜັກແໜ້ນທາງດ້ານການເມືອງເຂັ້ມແຂງທາງດ້ານການຈັດຕັ້ງ, ພ້ອມທັງເຮັດໜ້າທີ່ກຽມພ້ອມສູ້ຮົບ ແລະກອບກູ້ໄພພິບັດທີ່ອາດຈະເກີດຂຶ້ນໃຫ້ທັນເວລາ. ນອກນີ້, ຍັງເປັນກຳລັງຫລັກແຫລ່ງໃນວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະໄດ້ຊີ້ນຳພາກສ່ວນທີ່ກ່ຽວຂ້ອງລົງສົມທົບກັບອຳນາດການປົກຄອງບ້ານອ້ອມຂ້າງປຸກລະດົມປະຊາຊົນເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບເພື່ອຕ້ານ ແລະ ສະກັດກັ້ນປະກົດຫຍໍ້ທໍ້ຕ່າງໆ ເຮັດໃຫ້ສະພາບຂອບເຂດຕົນຮັບຜິດຊອບມີຄວາມສະຫງົບປອດໄພດີ, ໄດ້ເອົາໃຈໃສ່ຊີ້ນຳວຽກງານເພີ່ມພູນຜະລິດຜົນຕາມທິດນຳ 4 ປູກ 4 ລ້ຽງ ບົນຈິດໃຈເພິ່ງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງເພື່ອແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ນັບມື້ດີຂຶ້ນ.
ຂປລ. ຂ່າວ: ນາລີ ທະວີພອນ

แชร์