ທ່ານຮູ້ບໍ່ວ່າ ງານບຸນປົດປີ ຫຼື ບຸນເກຼີ ຂອງເຜົ່າກຶມມຸ ແມ່ນງານບຸນປະເພນີແນວໃດ?

ທ່ານ ຄໍາສອນ ຕາໄຊຄໍາ ນາຍບ້ານແກ້ວມະນີ ໄດ້ຍົກໃຫ້ເຫັນສະພາບລວມໂດຍຫຍໍ້ຂອງບ້ານໃນໄລຍະຜ່ານມາ.ຈາກນັ້ນກໍໄດ້ຮັບຟັງປະຫວັດຄວາມເປັນມາຂອງບຸນເກີຣ ຂອງເຜົ່າກຶ່ມມຸວ່າ: ຊຶ່ງານບຸນດັ່ງກ່າວຈັດຂຶ້ນເພື່ອເປັນການສະເຫຼີມສະຫຼອງການເກັບກ່ຽວຜົນລະປູກ ແລະໄຫວ້ບູຊາບັນພະບູລຸດ ທັງເປັນການນໍາເອົາຜົນລະປູກຕ່າງໆມາປຸງແຕ່ງເປັນອາຫານເພື່ອບູຊາບັນພະບູລຸດ ແລະພໍ່ແມ່ ປູ່ຍ່າ ຕາຍາຍ ຍາດຕິພີ່ນ້ອງທີ່ລ່ວງຫຼັບ, ເຈົ້າດິນ, ເຈົ້າດອນທີ່ຊ່ວຍປົກປັກຮັກສາຜົນລະປູກໃຫ້ໄດ້ຮັບຜົນດີ ແລະປົກປ້ອງຄຸ້ມຄອງລູກຫຼານໃຫ້ມີສຸຂະພາບແຂງແຮງປາສະຈາກໂລກໄພໄຂ້ເຈັບທັງເປັນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ແລະເປັນມື້ເລີກງາມຍາມດີ ເປັນສີລິມຸງຄຸນເພື່ອສົ່ງພອນອັນປະເສີດໄປຍັງພໍ່ແມ່ພີ່ນ້ອງຊົນເຜົ່າກືມມຸ ແລະ ປະຊາຊົນບັນດາເຜົ່າພາຍໃນບ້ານແກ້ວມະນີທຸກເພດທຸກໄວຈົ່ງມີແຕ່ໂຊກແຕ່ໄຊ, ມີຄວາມສຸກກາຍສະບາຍໃຈຕະຫຼອດໄປພ້ອມກັນສຶບຕໍ່ປົກປັກຮັກສາໝາກຜົນຂອງຄວາມສາມັກຄີປອງດອງປະຊາຊົນບັນດາເຜົ່າພ້ອມກັນສ້າງເສດຖະກິດພາຍໃນຄອບຄົວໃຫ້ມີຄວາມຮັ່ງມີເຂັ້ມແຂງເພື່ອເປັນການປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດກໍ່ຄືເມືອງນານ, ບ້ານແກ້ວມະນີ ໃຫ້ມີການພັດທະນາດີຂຶ້ນເທື່ອລະກ້າວ.

ໃນວັນທີ 13 ມັງກອນ ຜ່ານມານີ້, ຢູ່ເດີ່ນໂຮງຮຽນປະຖົມ ບ້ານ ແກ້ວມະນີ ເມືອງນານ ແຂວງຫຼວງພະບາງ ໄດ້ຈັດງານບຸນສະເຫຼີມສະຫຼອງ ບຸນປົດປີ ຫຼືບຸນເກຼີ ຂອງເຜົ່າກຶມມຸ ປະຈໍາປີ 2022 ໂດຍການເປັນປະທານຂອງທ່ານ ບົວສີ ພີມມະເສນ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ທ່ານ ທອງດາ ຈັນທະວົງ ຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ, ມີແນວລາວສ້າງຊາດເມືອງພ້ອມດ້ວຍນາຍບ້ານ-ບ້ານ ແລະປະຊາຊົນພາຍໃນບ້ານຕະຫຼອດຮອດແຂກທີ່ມາທ່ຽວຊົມເຂົ້າຮ່ວມຢ່າງຟົດຟື້ນ.

ຊຶ່ງໃນພິທີຍັງໄດ້ມີການມອບຫຼຽນໄຊແຮງງານຊັ້ນ 3 ໃຫ້ກັບບຸກຄົນທີ່ມີຜົນງານດີເດັ່ນໄລຍະ 5 ປີໃນການປະກອບສ່ວນເຂົ້າໃນວຽກງານຮັກຊາດ ແລະພັດທະນາ 2 ທ່ານ ເປັນກຽດຂຶ້ນປະດັບຫຼຽນດັ່ງກ່າວໂດຍ ທ່ານ ບົວສີ ພີມມະເສນ ຮອງເລຂາພັກເມືອງຫົວໜ້າຄະນະຈັດຕັ້ງເມືອງ, ໃນນີ້ຍັງໄດ້ປະດັບຫຼຽນກາແຮງງານຊັ້ນ 3 ໃຫ້ບຸກຄົນທີ່ມີຜົນງານດີເດັ່ນ 3 ທ່ານ ເຊິ່ງເປັນກຽດຂຶ້ນປະດັບໂດຍທ່ານ ທອງດາ ຈັນທະວົງ ຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ ແລະ ບຸກຄົນໄດ້ຮັບໃບຍ້ອງຍໍຂອງທ່ານເຈົ້າເມືອງ-ເມືອງນານ 30 ທ່ານ ໂດຍການເປັນກຽດຂຶ້ນມອບຂອງທ່ານ ທອງພັດ ວັນນະຈັກ ຮອງປະທານແນວລາວສ້າງຊາດເມືອງ ໃນພິທີຍັງໄດ້ມີການບາສີສູ່ຂັວນໃຫ້ເຈົ້າກົກ, ເຈົ້າເລົ່າ, ແຂກຖືກເຊີນ ເພື່ອເອົາເລີກ ເອົາໄຊຍາມປີໃໝ່ ອວຍພອນເຊິ່ງກັນ ແລະກັນ ໃຫ້ມີສຸຂະພາບເຂັ້ມແຂງ ປະສົບຜົນສໍາເລັດໃນໜ້າທີ່ການງານຕັ້ງໜ້າສຶບຕໍ່ປົກປັກຮັກສາເອກະລັກ ວັດທະນະທໍາ ຮີດຄອງປະເພນີອັນດີງາມຂອງຊາດຂອງເຜົ່າເວົ້າລວມເວົ້າສະເພາະກໍ່ຄືຮີດຄອງປະເພນີຂອງເຜົ່າກືມມຸ ໄວ້ໃຫ້ຍືນຍົງ ຄົງຢູ່ກັບຄົນລຸ້ນຫຼັງໄດ້ສຶບທອດຕໍ່ໆໄປໃນນີ້ບັນດາຜູ້ເຂົ້າຮ່ວມຍັງໄດ້ຮັບຊົມການສະແດງສິລະປະວັນນະຄະດີທີ່ສະແດງເຖິງເອກະລັກຂອງເຜົ່າ ເຕັມໄປດ້ວຍບັນຍາກາດຄວາມເບີກບານມ່ວນຊື່ນ.
ຂ່າວ: ຫຸມແພງ ສີດາໄລ

แชร์