ລັດຖະມົນຕີກະຊວງການເງິນ ຊຸກຍູ້ການຫັນໄປສູ່ດີຈິຕອນ ຂອງຂະແໜງພາສີ

ໃນວັນທີ 13 ມັງກອນ ທີ່ຜ່ານມາ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ໄດ້ລົງຕິດຕາມ ແລະຊຸກຍູ້ການຈັດຕັ້ງປະຕິບັດວຽກງານຫັນເປັນທັນສະໄໝກ້າວໄປສູ່ດີຈິຕອນຂອງຂະແໜງພາສີຢູ່ກົມພາສີກະຊວງການເງິນໂດຍການຕ້ອນຮັບຂອງທ່ານ ວົງວັນເພັງ ພູມສະຫວັນ ຮອງຫົວໜ້າກົມພາສີກະຊວງການເງິນ, ມີຄະນະກົມ, ມີຫົວໜ້າ-ຮອງຫົວໜ້າພະແນກ, ພະນັກງານວິຊາການ, ບໍລິສັດຜູ້ພັດທະນາລະບົບ, ພາກສ່ວນທີ່ກ່ຽວຂ້ອງເຂົ້າຮ່ວມໂອກາດນີ້,ທ່ານ ບຸນໂຈມ ອຸບົນປະເສີດ ກໍໄດ້ຢ້ຽມຊົມສູນບັນຊາການຄຸ້ມຄອງວຽກງານພາສີທັນສະໄໝເຊິ່ງແມ່ນໜຶ່ງໃນວຽກງານຫັນເປັນທັນສະໄໝກ້າວໄປສູ່ດີຈິຕອນຂອງຂະແໜງພາສີ, ສາມາດເຂົ້າເຖິງໄດ້ທຸກລະບົບທີ່ຕິດຕັ້ງໃນກົມພາສີ, ສາມາດກວດສອບ, ກວດກາແບບ Real time ແລະສາມາດຊ່ວຍເຈົ້າໜ້າທີ່ພາສີໃນການປະຕິບັດວຽກງານຕົວຈິງ. ນອກຈາກນີ້, ສູນບັນຊາການດັ່ງກ່າວຍັງສາມາດນໍາໃຊ້ເຂົ້າໃນວຽກງານກວດກາ, ກວດການ, ເປັນສູນທີ່ເຝົ້າລະວັງຊ່ວຍເຈົ້າໜ້າທີ່ພາສີ ແລະເປັນເຄື່ອງມືອັນສຳຄັນໃນການກວດກາທີ່ຈະມາປ່ຽນແທນການຫລຸດລົງຈຳນວນເຈົ້າໜ້າທີ່ພາສີປະຈຳການຕື່ມອີກ.

ສູນບັນຊາການຄຸ້ມຄອງວຽກງານພາສີທັນສະໄໝດັ່ງກ່າວຄວບຄຸມຢູ່ສູນກາງ (ກົມພາສີ), ມາຮອດປັດຈຸບັນ ໄດ້ສຳໂດຍພື້ນຖານ ແລະເປີດນໍາໃຊ້ເປັນປົກກະຕິ, ສາມາດຄວບຄຸມໃນການກວດກາກວດການການປະຕິບັດຂອງເຈົ້າໜ້າທີ່, ສາມາດເຊື່ອມໂຍງການຊຳລະສະສາງຄ່າພາສີ-ອາກອນຜ່ານລະບົບທະນາຄານ ເພື່ອສາມາດເບິ່ງການຈັດເກັບລາຍຮັບແບບ Realtime, ຄວບຄຸມກ້ອງວົງຈອນປິດໃນຂອບເຂດທົ່ວປະເທດ, ຄວບຄຸມລະບົບຊິງຊັງທັນສະໄໝທົ່ວປະເທດ, ຄວບຄຸມລະບົບເຄື່ອງສາຍແສງສະແກນເນີ, ຄວບຄຸມລະບົບການແຈ້ງພາສີ, ຄວບຄຸມລະບົບຄຸ້ມຄອງພາຫະນະ ແລະຜູ້ໂດຍສານ, ສູນລວມຖານຂໍ້ມູນສະຖິຕິ-ລາຍຮັບການນຳເຂົ້າ-ສົ່ງອອກ, ຄວບຄຸມທັງສູນກາງ ແລະທ້ອງຖິ່ນ.

ສຳລັບການຈັດຕັ້ງປະຕິບັດວຽກງານຫັນເປັນທັນສະໄໝກ້າວໄປສູ່ດີຈິຕອນຂອງຂະແໜງພາສີເປັນວຽກບຸລິມະສິດໃນການສ້າງຄວາມເຂັ້ມແຂງໃຫ້ວຽກງານກ້າວທັນກັບສາກົນ ແລະຮັບປະກັນການບໍລິການໃຫ້ມີຄວາມສະດວກ, ວ່ອງໄວ, ທັນສະໄໝ, ສາມາດຕິດຕາມກວດກາໄດ້ທັນສະພາບການແບບລວມສູນໃນຂອບເຂດທົ່ວປະເທດ.
ຂປລ. ຂ່າວ-ພາບ: ກະຊວງການເງິນ

แชร์