ເມືອງທ່າແຕງ ຕ້ອງເປັນເຈົ້າການໂຄສະນາໃຫ້ປະຊາຊົນສຸມໃສ່ຜະລິດເປັນສິນຄ້າຫຼາຍຂຶ້ນ

ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ (ຄອສພ) ປະທານສະພາທິດສະດີສູນກາງພັກໄດ້ເນັ້ນໃຫ້ຄະນະໂຄສະນາອົບຮົມເມືອງທ່າແຕງ ແຂວງເຊກອງ ຕ້ອງເປັນເຈົ້າການໂຄສະນາຊຸກຍູ້ປະຊາຊົນຕາມຈຸດພິເສດຂອງເມືອງ ໂດຍເພາະການໂຄສະນາຊຸກຍູ້ສົ່ງເສີມໃຫ້ປະຊາຊົນຫັນມາຜະລິດເປັນສິນຄ້າຫຼາຍຂຶ້ນ.

ໃນໂອກາດເຄື່ອນໄຫວຕິດຕາມຊຸກຍູ້ວຽກງານຢູ່ແຂວງເຊກອງໃຫ້ມີບາດກ້າວຫັນປ່ຽນໄປສູ່ຄຸນນະພາບໃໝ່ ໃນວັນທີ 13 ມັງກອນ ຜ່ານມາ, ສະຫາຍ ຄໍາພັນ ເຜີຍຍະວົງ ພ້ອມຄະນະ ໄດ້ລົງຢ້ຽມຢາມ ແລະ ຕິດຕາມຊຸກຍູ້ວຽກງານຢູ່ເມືອງທ່າແຕງ ແຂວງເຊກອງ ໂດຍໄດ້ຮັບການຕ້ອນຮັບຈາກ ສະຫາຍ ແສງລາຕີ ຫຼອມຍະເດດ ຮອງເລຂາພັກເມືອງ ປະທານກວດກາພັກ-ລັດເມືອງແລະໄດ້ຮັບຟັງການລາຍງານການນຳພາ-ຊີ້ນຳວຽກງານຮອບດ້ານຂອງຄະນະໂຄສະນາອົບຮົມເມືອງໃນໄລຍະ 1 ປີ ຜ່ານມາ ຈາກສະຫາຍ ນາງ ແກ້ວອຸດອນ ດວງມະນີວົງ ຄະນະປະຈໍາພັກເມືອງ ຫົວໜ້າຄະນະໂຄສະນາອົບຮົມເມືອງທ່າແຕງ.

ສະຫາຍ ຄໍາພັນ ເຜີຍຍະວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດວຽກງານຂອງຄະນະໂຄສະນາອົບຮົມເມືອງທ່າແຕງ ໃນໄລຍະຜ່ານມາ ຊຶ່ງໄດ້ປະກອບສ່ວນສໍາຄັນ ເຮັດໃຫ້ເມືອງທ່າແຕງມີການພັດທະນາຢ່າງຕໍ່ເນື່ອງ.

ສະຫາຍ ຍັງກ່າວຕື່ມວ່າ: ເສດຖະກິດເມືອງທ່າແຕງຂະຫຍາຍຕົວຢ່າງຕໍ່ເນື່ອງ, ປະຊາຊົນມີມູນເຊື້ອດຸໝັ່ນຂະຫຍັນພຽນ, ສຸມໃສ່ພັດທະນາເສດຖະກິດໂດຍສະເພາະການປູກ-ການລ້ຽງ ສະໜອງໃຫ້ແກ່ຕະຫຼາດພາຍໃນແຂວງ,ຕະຫຼາດຢູ່ບັນດາແຂວງອ້ອມຂ້າງ ແລະສົ່ງໄປຂາຍຢູ່ປະເທດເພື່ອນບ້ານ. ແຕ່ເຖິງຢ່າງໃດກໍຕາມ, ສະພາບປັດຈຸບັນ ມັນໄດ້ຮຽກຮ້ອງໃຫ້ຍົກສູງປະສິດທິພາບຂອງການຜະລິດດ້ານກະສິກໍາ ເພື່ອເປັນສິນຄ້າ, ຕ້ອງຮັບປະກັນຄຸນນະພາບ ບໍ່ພຽງແຕ່ດ້ານປະລິມານ ແຕ່ຜົນຜະລິດຕ້ອງສະອາດ, ປອດສານພິດ. ສະນັ້ນ, ຄະນະໂຄສະນາອົບຮົມເມືອງ ຕ້ອງໄດ້ເປັນເຈົ້າການໃນການສຶກສາອົບຮົມປະຊາຊົນຊຸກຍູ້ການຜະລິດໂດຍບໍ່ໃຫ້ໃຊ້ຢາປາບສັດຕູພືດ, ຝຸ່ນເຄມີຕ່າງໆ ຊຶ່ງຕ້ອງເນັ້ນໃສ່ຝຸ່ນຊີວະພາບ.

ນອກນັ້ນ, ສະຫາຍ ຫົວໜ້າຄະນະໂຄສະນາອົບຮົມສູນກາງພັກຍັງເນັ້ນບາງດ້ານເພີ່ມຕື່ມໃຫ້ແກ່ຄະນະໂຄສະນາອົບຮົມເມືອງທ່າແຕງເອົາໃຈໃສ່ເປັນຕົ້ນກຸ່ມຄົນບໍ່ດີຍັງສືບຕໍ່ເຄື່ອນໄຫວເພື່ອໂຄສະນາບິດເບືອນແນວທາງນະໂຍບາຍຂອງພັກ-ລັດ, ຫວັງສ້າງຄວາມບໍ່ສະຫງົບໃນສັງຄົມໂດຍສະເພາະການໃຊ້ຂໍ້ມູນຂ່າວສານໃນຍຸກສະໄໝໃໝ່ ຊຶ່ງພວກເຮົາຕ້ອງໄດ້ວ່ອງໄວ ແລະທັນການ ໂດຍເອົາໃຈໃສ່ສຶກສາອົບຮົມປະຊາຊົນບໍ່ໃຫ້ຫຼົງເຊື່ອ. ສະນັ້ນ, ໃນຕໍ່ໜ້າຄະນະໂຄສະນາອົບຮົມເມືອງກໍຍັງຈະສືບຕໍ່ເຮັດວຽກຢ່າງໜັກໜ່ວງຊຶ່ງຕ້ອງໄດ້ເບິ່ງຄືນພາລະບົດບາດໃນກົງຈັກການຈັດຕັ້ງທີ່ໄດ້ປັບປຸງໃຫ້ຈະແຈ້ງຂຶ້ນກວ່າເກົ່າໂດຍສະເພາະໃຫ້ວຽກງານໂຄສະນາສອດຫ້ອຍໄປນໍາທຸກຂົງເຂດວຽກງານໃຫ້ໄດ້ຫຼາຍຂຶ້ນກວ່າເກົ່າ; ພ້ອມກັນນັ້ນ, ກໍປັບປຸງກົນໄກການປະສານງານ, ມີແບບແຜນການເຮັດວຽກໃຫ້ມີການເຄື່ອນໄຫວຢ່າງຕໍ່ເນື່ອງ ແລະບັນຫາອື່ນໆ ເພື່ອສ້າງໃຫ້ມີການປ່ຽນແປງໃໝ່ຂອງວຽກງານໂຄສະນາອົບຮົມຢູ່ເມືອງທ່າແຕງ ຫັນໄປສູ່ຄຸນນະພາບໃໝ່ໄດ້ເທື່ອລະກ້າວ.
(ຂ່າວ-ພາບ: ສຸກສະຫວັນ)

• 16/01/2023