ພັກ-ລັດ ໄດ້ມອບໝາຍໃຫ້ກອງທັບເຮັດໜ້າທີ່ເປັນຫຼັກແຫຼ່ງ ໃນພາລະກິດປົກປັກຮັກສາ ແລະສ້າງສາພັດ ທະນາປະເທດຊາດ

ນັບແຕ່ປະເທດຊາດໄດ້ຮັບການປົດປ່ອຍຢ່າງສົມບູນເປັນຕົ້ນມາ, ກອງທັບໄດ້ເສີມຂະຫຍາຍທາດແທ້ມູນເຊື້ອປະຕິວັດອັນສະຫງ່າງາມຂອງຕົນຕະຫຼອດມາ, ນັບແຕ່ປະເທດຊາດກ້າວເຂົ້າສູ່ໄລຍະໃໝ່ຂອງການປະຕິວັດ, ກອງທັບກໍໄດ້ກາຍເປັນກອງທັບຂອງຊາດໜຶ່ງທີ່ມີເອກະລາດ,ມີອຳນາດອະທິປະໄຕ, ມີຜືນແຜ່ນດິນອັນຄົບຖ້ວນ ແລະມີການພັດທະນາ ຕາມທິດສັງຄົມນິຍົມ. ສະນັ້ນ,ໜ້າທີ່ຂອງກອງທັບໃນໄລຍະໃໝ່ຍິ່ງໜັກໜ່ວງ ແລະມີກຽດ, ພັກ-ລັດ ໄດ້ມອບໝາຍໃຫ້ກອງທັບເຮັດໜ້າທີ່ເປັນຫຼັກແຫຼ່ງໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ. ໃນຊຸມປີຜ່ານມາກອງທັບໄດ້ຕັ້ງໜ້າປະຕິບັດໜ້າທີ່ດັ່ງກ່າວໄດ້ສ້າງຜົນງານອັນໃຫຍ່ຫຼວງນັ້ນຄືພ້ອມກັບປະຊາຊົນບັນດາເຜົ່າສາມາດປົກປັກຮັກສາໝາກຜົນຂອງການປະຕິວັດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ ແລະປະກອບສ່ວນພັດທະນາຖະກິດເຮັດໃຫ້ຊີວິດການເປັນຢູ່ຂອງພະນັກງານ-ນັກຮົບ ແລະປະຊາຊົນລາວບັນດາເຜົ່າດີຂຶ້ນ,ປະເທດຊາດມີສະຖຽນລະພາບ,ມີຄວາມສະຫງົບໂດຍພື້ນຖານຕະຫຼອດມາ, ມາເຖິງປັດຈຸບັນນີ້, ກອງທັບໄດ້ເຕີບໃຫຍ່ເຂັ້ມແຂງທັງປະລິມານ ແລະ ຄຸນນະພາບ, ພວມປັບປຸງກໍ່ສ້າງກ້າວຂຶ້ນເປັນກອງທັບມີລະບຽບແບບແຜນທັນສະໄໝ. ສ້າງຄວາມໄວ້ວາງໃຈໃຫ້ແກ່ພັກ-ລັດ ແລະປະຊາຊົນລາວບັນດາເຜົ່າ.

ເຖິງຢ່າງໃດກໍຕາມເມື່ອທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ຂອງການປະຕິວັດແລະການປັບປຸງກໍ່ສ້າງກຳລັງຂອງກອງທັບເຮົາແລ້ວ ໃນປັດຈຸບັນນີ້,ກອງທັບກໍຍັງມີບາງບັນຫາຕ້ອງໄດ້ຮີບຮ້ອນສຸມໃສ່ແກ້ໄຂບັນດາຈຸດອ່ອນຂໍ້ຄົງຄ້າງ,ປະກົດການຫຍໍ້ທໍ້ທີ່ເກີດຂຶ້ນໃນໄລຍະຜ່ານມາຍັງມີບາງກົມກອງ-ທ້ອງຖິ່ນ ແລະພະນັກງານ-ນັກຮົບຈໍານວນໜຶ່ງ ຍັງບໍ່ທັນຕັ້ງໜ້າເປັນເຈົ້າການ ເຂົ້າໃນປົກປັກຮັກສາ ແລະເສີມຂະຫຍາຍທາດແທ້ມູນເຊື້ອອັນດີງາມຂອງກອງທັບ, ເປັນຕົ້ນແມ່ນສະຕິຄວາມຮັບຜິດຊອບຕໍ່ໜ້າທີ່ການເມືອງຂອງຕົນບໍ່ສູງ,ເອື່ອຍອີງໃສ່ຄວາມຫຍຸ້ງຍາກ, ສະຕິກຽມພ້ອມສູ້ຮົບບໍ່ທັນສູງ, ນໍ້າໃຈເສຍສະຫຼະເພື່ອພາລະກິດປະຕິວັດ, ເພື່ອຊາດ,ເພື່ອປະຊາຊົນບາງຄັ້ງຫຼຸດລົງເກີດມີແນວຄິດມັກສະຫງົບບໍ່ອຸ່ນອ່ຽນຕໍ່ໜ້າທີ່ວຽກງານ, ອາດຍາສິດ, ບໍ່ຄົ້ນຄວ້າຊອກຮູ້ຮໍ່າຮຽນ, ຂາດການຝຶກຝົນຫຼໍ່ຫຼອມຕົນເອງ ຫ່າງເຫີນຈາກປະຊາຊົນ, ເຮັດໃຫ້ປະຊາຊົນຈໍານວນໜຶ່ງຂາດຄວາມເຊື່ອໝັ້ນຕໍ່ກອງທັບພະນັກງານ-ນັກຮົບ ຈຳນວນໜຶ່ງມີແນວຄິດເອກະຊົນສວຍໃຊ້ຖານະຕຳແໜ່ງ, ໜ້າທີ່ວິຊາສະເພາະສໍ້ລາດບັງຫຼວງກອບໂກຍ ເອົາຊັບສິນເງິນຄຳຂອງພັກ-ລັດ ໄປໃຊ້ສ່ວນຕົວ, ຫຼິ້ນກິນຟຸ່ມເຟືອຍ, ຄ້າຂາຍຜິດກົດໝາຍ, ມົ້ວສຸມ, ບໍ່ນັບຖືການຈັດຕັ້ງ, ຝ່າຝືນຕໍ່ລະບຽບວິໄນຂອງກອງທັບ, ຂາດຄຸນສົມບັດສິນທຳປະຕິວັດອັນຈະເຮັດໃຫ້ທາດແທ້ມູນເຊື້ອຂອງກອງທັບຖືກເສື່ອມເສຍ.

ສະນັ້ນ, ນາຍ ແລະພົນທະຫານກອງທັບປະຊາຊົນລາວຕ້ອງໄດ້ພ້ອມກັນຮີບຮ້ອນແກ້ໄຂບັນດາຈຸດອ່ອນ, ປະກົດການຫຍໍ້ທໍ້ດັ່ງກ່າວນັ້ນໃຫ້ທັນເວລາ.ຄະນະພັກ-ຄະນະບັນຊາແຕ່ລະຂັ້ນຕ້ອງມີມາດຕະການອັນເດັດຂາດເພື່ອສະກັດກັ້ນບັນດາບັນຫາທີ່ຈະພາໃຫ້ເກີດສິ່ງຫຍໍ້ທໍ້ຕ່າງໆ ໃນກົມກອງທັງນີ້ກໍເສີມຂະຫຍາຍທາດແທ້, ມູນເຊື້ອປະຕິວັດອັນສະຫງ່າງາມຂອງກອງທັບໃຫ້ສະຫງົບຕະຫຼອດໄປຍາມໃດກໍໃຫ້ກາຍເປັນຄວາມເອກອ້າງທະນົງໃຈຂອງກອງທັບ, ຂອງຊາດເຮົາ ແລະ ພ້ອມກັນເສີມຂະຫຍາຍໃຫ້ດີຂຶ້ນເລື້ອຍໆ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະພາບການໃໝ່.

ໂດຍ:ຕຸໄລເພັດ ພິມເມືອງ

แชร์