ຫົວໜ້າ ຄອສພ ເນັ້ນໃຫ້ ຄອຂ ອັດຕະປື ເກັບກໍາຫາງສຽງຂອງສັງຄົມໃຫ້ເລິກຊຶ່ງ

ໃນການລົງຕິດຕາມຊຸກຍູ້ວຽກງານຢູ່ແຂວງອັດຕະປື, ສະຫາຍ ຫົວໜ້າຄະ​ນະໂຄສະນາອົບຮົມສູນກາງພັກ (ຄອສພ) ໄດ້ເນັ້ນໜັກ​ໃຫ້ຄະນະໂຄສະນາອົບຮົມແຂວງ​ອັດ​ຕະ​ປື (ຄອຂ ອັດ​ຕະ​ປື) ເອົາໃຈໃສ່ບາງບັນຫາສຳຄັນ ເພື່ອເປັນການສ້າງການຫັນປ່ຽນໃໝ່ ຂອງວຽກງານໂຄສະນາ ໃຫ້ໄປສູ່ຄຸນນະພາບໃໝ່, ພ້ອມ​ເນັ້ນ​ໃຫ້ ເກັບກໍາຫາງສຽງຂອງສັງຄົມໃຫ້ເລິກຊຶ່ງ ເພື່ອການເຜີຍແຜ່, ສຶກສາອົບຮົມໃຫ້ທ່ວງທັນກັບສະພາບການ.

ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ (ຄອສພ) ປະທານສະພາທິດສະດີສູນກາງພັກ ໄດ້ລົງຕິດຕາມຊຸກຍູ້ວຽກງານທີ່ແຂວງອັດຕະປື ໃນວັນທີ 12 ມັງກອນ 2023 ໂດຍການຕ້ອນຮັບຂອງສະຫາຍ ບຸນຮຽນ ແກ້ວບົວພາດ ຮອງເລຂາພັກແຂວງ ຜູ້ຊີ້ນໍາຂົງເຂດການເມືອງ-ແນວຄິດ ວຽກພັກ-ພະນັກງານ ແຂວງອັດຕະປື ພ້ອມດ້ວຍການນໍາ, ພະນັກງານ-ລັດຖະກອນຂອງຄະນະໂຄສະນາອົບຮົມແຂວງ ແລະ 5 ເມືອງຂອງແຂວງ​ເຂົ້າ​ຮ່ວມ.

ສະຫາຍ ນາງ ບຸນນານ ບຸນນະແສງ ຄະນະປະຈໍາພັກແຂວງ ເລຂາໜ່ວຍພັກ ຫົວໜ້າຄະນະໂຄສະນາອົບຮົມແຂວງອັດຕະປື ໄດ້ລາຍງານກ່ຽວກັບການເຄື່ອນໄຫວໃນໄລຍະຜ່ານມາໂດຍສັງເຂບ ໂດຍອີງໃສ່ຄຳຖາມເຈາະຈີ້ມຂອງຄະນະຮັບຜິດຊອບສູນກາງກຳນົດໄວ້. ຈາກນັ້ນ, ສະຫາຍ ບຸນຮຽນ ແກ້ວບົວພາດ ແລະ ບັນດາສະຫາຍຫົວໜ້າກົມຈາກ ຄອສພ ພ້ອມດ້ວຍຄະນະນໍາໂຄສະນາອົບຮົມແຂວງ ແລະ ບັນດາເມືອງຂອງແຂວງອັດຕະປື ກໍໄດ້ມີຄໍາເຫັນ, ລາຍງານ ແລະ ແລກປ່ຽນບົດຮຽນ, ປຶກສາຫາລື ເພື່ອແກ້ໄຂບັນຫາຕ່າງໆ.

ໃນໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ມີຄຳເຫັນຍ້ອງຍໍຊົມເຊີຍ ຕໍ່ຜົນສຳເລັດຂອງຄະນະໂຄສະນາອົບຮົມແຂວງອັດຕະປື ທີ່ຍາດມາໄດ້ໃນໄລຍະຜ່ານມາ ເຖິງວ່າສະພາບການຫຼາຍຢ່າງໄດ້ພົບຄວາມຫຍຸ້ງຍາກ. ແຕ່ເຖິງຢ່າງໃດກໍຕາມ, ເພື່ອພ້ອມກັນປັບປຸງວຽກງານໂຄສະນາອົບຮົມ ໃຫ້ໄປສູ່ການຫັນປ່ຽນໃໝ່ ໂດຍສະເພາະການປັບປຸງກົງຈັກ, ປັບປຸງພາລະບົດບາດ, ສິດ, ໜ້າທີ່ ການເຄື່ອນໄຫວຄະນະໂຄສະນາອົບຮົມແຂວງ, ເມືອງ ສາມາດຕອບສະໜອງຕໍ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ພ້ອມທັງປັບປຸງກົນໄກການພົວພັນວຽກງານລະຫວ່າງສູນກາງ ແລະ ທ້ອງຖິ່ນ ໃຫ້ວ່ອງໄວທັນການ ແລະ ກົມກຽວກັນ ຊຶ່ງສະຫາຍ ໄດ້ເນັ້ນບາງບັນຫາເຊັ່ນ:

1). ວຽກງານການເມືອງ-ແນວຄິດ ທີ່ເປັນວຽກງານສໍາຄັນ ຕ້ອງໄດ້ສືບຕໍ່ສ້າງແຜນການເຄື່ອນໄຫວອັນໜັກແໜ້ນວ່າຈະລົງເລິກບັນຫາໃດ, ອັນໃດແມ່ນອັນອ່ອນ ຊຶ່ງກ່ອນອື່ນໝົດແມ່ນການເກັບກໍາຫາງສຽງຂອງສັງຄົມໃຫ້ເລິກເຊິ່ງ ເພື່ອເອົາມາຄົ້ນຄວ້າວິໄຈ, ໄຈ້ແຍກບັນຫາ ເພື່ອສ້າງເປັນແຜນການ, ເປັນມະຕິ ຫຼື ຄໍາສັ່ງຂອງຄະນະປະຈໍາພັກແຂວງ ຫຼື ຄະນະບໍລິຫານງານພັກແຂວງ ເພື່ອໃຫ້ບັນດາຂະແໜງການຕ່າງໆເອົາເຂົ້າໃນແຜນການເຄື່ອນໄຫວ, ດຳລົງຊີວິດໃນໜ່ວຍພັກ ເພື່ອການເຜີຍແຜ່, ສຶກສາອົບຮົມໃຫ້ທ່ວງທັນກັບສະພາບການ ໂດຍສະເພາະຄໍາໃສ່ຮ້າຍປ້າຍສີ ໂຈມຕີການນໍາພາຂອງພັກ-ລັດ ເພື່ອໃຫ້ປະຊາຊົນຊັ້ນຄົນຕ່າງໆ ມີຄວາມໄວ້ເນື້ອເຊື່ອໃຈ, ເຊື່ອໝັ້ນຕໍ່ການນໍາພາຂອງພັກ.

2). ວຽກງານປັບປຸງກົງຈັກການຈັດຕັ້ງ ແມ່ນໃຫ້ແຂວງຄົ້ນຄວ້າ ເພື່ອໃຫ້ ຄອຂ ອັດຕະປື ເປັນເຈົ້າການໃນການຊີ້ນໍາພາຫະນະສື່ມວນຊົນຂອງແຂວງ ເປັນຕົ້ນ ວາລະສານອັດຕະປືວັນໃໝ່. ນອກຈາກນັ້ນ, ເລື່ອງວິທະຍຸ, ໂທລະໂຄ່ງຂອງເມືອງ-ຂອງບ້ານຕ່າງໆ ກໍຕ້ອງໄດ້ເປັນເຈົ້າການໃນການກວດກາ, ຊີ້ນໍາທາງດ້ານເນື້ອໃນ, ທາງດ້ານຮູບການ ແລະ ພ້ອມດຽວກັນນັ້ນ ກໍຄົ້ນຄວ້າວິທະຍາສາດ, ຄົ້ນຄວ້າແນວທາງນະໂຍບາຍຕ່າງໆ ຕ້ອງແມ່ນໂຄສະນາອົບຮົມເປັນເຈົ້າການເພື່ອຊ່ວຍການນໍາຂອງແຂວງໃນການຄົ້ນຄວ້າ, ປຶກສາຫາລືບັນຫາຕ່າງໆ ກໍຄືບັນຫາໃນການປັບປຸງການຈັດຕັ້ງ ຢາກໃຫ້ຄົ້ນຄວ້າວ່າອັນໃດຄວນໃຫ້ມີການສືບຕໍ່ປັບປຸງ ເພື່ອໃຫ້ເໝາະກັບສະພາບການໃໝ່.

3). ສໍາລັບວຽກງານໂຄສະນາປາຖະກະຖາ ແມ່ນເປັນອີກວຽກໜຶ່ງທີ່ສຳຄັນ ໃນໄລຍະຜ່ານມາ ຄອສພ ໄດ້ເຮັດເອກະສານປາຖະກະຖາຕ່າງໆສົ່ງໃຫ້ແຕ່ລະແຂວງ ແມ່ນໃຫ້ຄະນະໂຄສະນາອົບຮົມແຂວງນໍາເອົາໄປປັບປຸງ ເອົາເນື້ອໃນຕົວຈິງຂອງແຂວງໃນບັນຫາຕ່າງໆ ເຂົ້າໃນເອກະສານປາຖະກະຖາ ເພື່ອເຮັດໃຫ້ມີເນື້ອໃນເລິກເຊິ່ງ, ເຫັນໄດ້ຕົວຈິງ ຈຶ່ງຈະໄດ້ຮັບຄວາມສົນໃຈຈາກສັງຄົມຕົວຈິງ ຊຶ່ງກ່ອນອື່ນໝົດຕ້ອງໄດ້ສ້າງພະນັກງານຜູ້ຂີດຂຽນ, ປັບປຸງເອກະສານຕ່າງໆຂອງວຽກງານໂຄສະນາ.

4). ວຽກງານອົບຮົມ ເມືອງ ແລະ ແຂວງຕ້ອງໄດ້ສົມທົບກັນກັບ ຄອສພ ເພື່ອສ້າງແຜນຕ່າງໆ ໂດຍສະເພາະການຈັດຝຶກອົບຮົມພະນັກງານ ແມ່ນຕ້ອງໃຫ້ມີການອົບຮົມໃນຫຼາຍລະດັບ ທັງ​ເປັນການໂຄສະນາທາງສຽງ ກໍຄືມີຄົນໄປເວົ້າ ຫຼື ປາຖະກະຖາ ແລະ ການໂຄສະນາດ້ວຍເນື້ອໃນ, ຮູບພາບ, ການເຄື່ອໄຫວ, ດ້ວຍການດໍາລົງຊີວິດ, ປ້າຍຄໍາຂວັນຕ່າງໆ, ດ້ວຍວັນນະຄະດີ, ການສະແດງສິລະປະ ໃຫ້ແກ່ສັງຄົມ. ພ້ອມກັນນັ້ນ, ກໍຄົ້ນຄວ້າສຶກສາອົບຮົມເຊື່ອມຊຶມຢູ່ໃນຫຼາຍລະດັບ ຄື: ຢູ່ໂຮງຮຽນ, ໃນສັງຄົມ ແລະ ເຂດຊົນນະບົດຫ່າງກັນສອກຫຼີກ ຊຶ່ງຕ້ອງໄດ້ຄົ້ນຄວ້າຫັນເອົາເນື້ອໃນຕົວຈິງຂອງທ້ອງຖິ່ນ, ການເຄື່ອນໄຫວດໍາລົງຊີວິດຕົວຈິງຂອງເຂົາເຈົ້າ ເຊື່ອມຊ້ອນເຂົ້າໄປໃນການໂຄສະນາອົບຮົມ.

5) ວຽກງານເກັບກໍາຫາງສຽງສັງຄົມ ໃຫ້ສືບຕໍ່ເປັນເຈົ້າການໃນການຕິດຕາມສະພາບຕົວຈິງ, ມີຕາຕາລາງເຄື່ອນໄຫວທຸກອາທິດ ເພື່ອມາສ່ອງແສງ, ວິເຄາະວິໄຈແຕ່ລະບັນຫາ ແລະ ມາລາຍງານຄະນະປະຈໍາພັກແຂວງ ໂດຍສະເພາະເລຂາພັກແຂວງ, ຮອງເລຂາພັກແຂວງ ຜູ້ຊີ້ນໍາວຽກງານ​ດັ່ງ​ກ່າວນີ້ ເພື່ອມີວິທີໃນການຕອບໂຕ້, ແກ້ໄຂບັນຫາຕ່າງໆໃຫ້ທັນເວລາ. ພ້ອມດຽວກັນນັ້ນ, ວຽກງານຂໍ້ມູນຂ່າວສານ ກໍຕ້ອງປັບປຸງໃຫ້ໄປສູ່ຄຸນນະພາບໃໝ່ ເທື່ອລະກ້າວ.

ຈາກນັ້ນ, ສະຫາຍ ຫົວໜ້າ ຄອສພ ພ້ອມຄະນະ ກໍໄດ້ລົງໄປຢ້ຽມຢາມ ແລະ ຊຸກຍູ້ວຽກງານໂຄສະນາອົບຮົມຢູ່ເມືອງສະໜາມໄຊ ແຂວງອັດຕະປື ແລະ ກໍໄດ້ພົບປະຊາຊົນຊາວເມືອງສະໜາມໄຊ ໂດຍສະເພາະປະຊາຊົນທີ່ໄດ້ຮັບຜົນກະທົບຈາກເຫດການຄູ​ກັນ​ນ້ຳຂອງ​ເຂື່ອນເຊ​ປຽນ-ເຊ​ນ້ຳ​ນ້ອຍແຕກ. ພ້ອມທັງມອບຄອມພີວເຕີຕັ້ງໂຕະ 1 ຊຸດໃຫ້ແກ່ໂຄສະນາອົບຮົມເມືອງສະໜາມໄຊ.

(ຂ່າວ-ພາບ: ສຸກສະຫວັນ)

 

แชร์