2022 ແຂວງຈໍາປາສັກນໍາເຂົ້າ ແລະສົ່ງອອກສິນຄ້າບັນລຸ 716 ໂລດາສະຫະລັດ

ເຖີງແມ່ນວ່າໃນສົກປີ 2022 ຜ່ານມາ ສປປ ລາວ ເວົ້າລວມເວົ້າສະເພາະແຂວງຈໍາປາສັກ ຈະພົບບັນຫາອຸປະສັກ ແລະສີ່ງທ້າທາຍຫລາຍຢ່າງກໍ່ຕາມແຕ່ຍ້ອນການນໍາພາທີ່ເຂັ້ມແຂງ ແລະ ພາກປະຕິບັດທີ່ຕັ້ງໜ້າຮອບດ້ານເຮັດໃຫ້ວຽກງານຂົງເຂດອຸດສາຫະກໍາ ແລະການຄ້າສາມາດປະຕິບັດບັນດາໜ້າວຽກວິຊາສະເພາະໃນການນໍາເຂົ້າ ແລະ ສົ່ງອອກສິນຄ້າໄດ້ເກີນແຜນທີ່ກໍານົດໄວ້.

ອິງຕາມການລາຍງານຂອງທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກ ຕໍ່ນັກຂ່າວໜັງສືພິມ ເສດຖະກິດ-ສັງຄົມ ປະຈໍາແຂວງ ເມື່ອບໍ່ດົນມານີ້ໃຫ້ຮູ້ວ່າ: ຕະຫລອດໄລຍະໜື່ງປີຜ່ານມາ 2022 ທາງຄະນະພັກ, ຄະນະນໍາພວກເຮົາໄດ້ເອົາໃຈໃສ່ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງ, ປະຕິບັດ 5 ແຜນງານອຸດສາຫະກໍາ ແລະ ການຄ້າ ແລະ 3 ວຽກງານຈຸດສຸມວາລະຂອງແຂວງ (ຕາມເນື້ອໃນວາລະແຫ່ງຊາດ ) ໃນການແກ້ໄຂທາງດ້ານເສດຖະກິດ-ການເງິນ ໃຫ້ດີຂື້ນເທື່ອລະກ້າວ, ສະເພາະແຂວງຈໍາປາສັກກໍ່ເປັນແຂວງໜື່ງທີ່ມີທ່າແຮງບົ່ມຊ້ອນຫລາຍດ້ານໃນການດຶງດູງການລົງທຶນທັງພາຍໃນ ແລະ ຕ່າງປະເທດ, ເສດຖະກິດຂອງແຂວງຍັງສຶບຕໍ່ຂະຫຍາຍຕົວຢ່າງຕໍ່ເນື່ອງ ດ້ວຍຈັງຫວາທີ່ໝັ້ນທ່ຽງ, ໂຄງປະກອບເສດຖະກິດໄດ້ຫັນປ່ຽນ ໄປຕາມທ່າອ່ຽງທີ່ຕັ້ງໜ້າ, ໃນນັ້ນ ດ້ານກະສີກໍາແມ່ນຮັບປະກັນໄດ້ດ້ານສະຍບຽງອາຫານ ຢ່າງພຽງພໍກັບຄວາມຕ້ອງການ, ຈາກນັ້ນກໍ່ຍັງມີການຜະລິດກະສີກໍາເປັນສິນຄ້າເພີ່ມຂື້ນໃນແຕ່ລະປີ ເປັນຕົ້ນ: ເຂົ້າ, ກາເຟ, ພຶດຜັກ, ຢາງພາລາ, ການລ້ຽງສັດ ແລະ ອື່ນໆ... ມີການພັດທະນາອຸດສາຫະກໍາ ແລະຫັນປ່ຽນທັນສະໄໝເກີດມີໜໍ່ແໜງ ແລະ ຂະຫຍາຍຕົວຢ່າງໄວ, ດ້ານການຜະລິດອຸດສາຫະກໍາ ກໍມາດສ້າງໄດ້ອຸດສາຫະກໍາຈໍານວນໜື່ງເຊັ່ນ: ໂຮງງານກະເຟສໍາເລັດຮູບ, ໂຮງງານເບຍ, ໂຮງງານນໍ້າຫວານ, ໂຮງງານຢາງພາລາ, ໂຮງງານຜະລິດຕະພັນໄມ້, ໂຮງງານຜະລິດຊາສໍາເລັດຮູບ, ໂຮງງານແປ້ງມັນຕົ້ນ ແລະ ອື່ນໆ.

ຫົວໜ້າພະແນກໃຫ້ຮູ້ຕື່ມວ່າ: ແຂວງຈໍາປາສັກມີຄູ່ຄ້າທັງໝົດ 24 ປະເທດ, ໃນນັ້ນກຸ່ມອາຊຽນ 7 ປະເທດ ແລະນອກກຸ່ມອາຊຽນ 17 ປະເທດ,ການຈັດຕັ້ງປະຕິບັດໄລຍະ 12 ເດືອນປີ 2022 ສາມາດບັນລຸໄດ້ທັງໝົດ 716 ລ້ານໂດລາສະຫະລັດ, ທຽບໃສ່ໄລຍະດຽວເພີ່ມຂື້ນ 25%, ທຽບໃສ່ແຜນປີ 2022 ປະຕິບັດໄດ້ລື່ນແຜນ 11%, ໃນນັ້ນການນໍາເຂົ້າສິນຄ້າມີມູນຄ່າທັງໝົດ 313 ລ້ານໂດລາສະຫະລັດ ແລະມູນຄ່າການສົ່ງອອກທັງໝົກແມ່ນສາມາດບັນລຸໄດ້ 403 ລ້ານໂດລາສະຫະລັດ, ທຽບໃສ່ແຜນປີ 2022 ປະຕິບັດລື່ນແຜນ 12%, ສິນຄ້າທີ່ສົ່ງອອກຕົ້ນຕໍແມ່ນກາເຟ, ຢາງພາລາ, ມັ້ນຕົ້ນ, ພຶດຜັກທີ່ນອນໃນໂຄງການ Contract Farming ແລະຜະລິດຕະພັນອຸດສະຫາກໍາ ແລະປຸງແຕ່ງ, ຈາກສາເຫດດັ່ງກ່າວເມື່ອສົມທຽບກັນລະຫວ່າງການນໍາເຂົ້າທັງໝົດ ແລະສົ່ງອອກທັງໝົດແລ້ວເຮັດໃຫ້ແຂວງຈໍາປາສັກ ເກີດມີການດູນການຄ້າ 89 ລ້ານໂດລາສະຫະລັດ.

ສໍາລັບທົ່ວແຂວງຈໍາປາສັກມີຫົວໜ່ວຍວິສາຫາກິດທັງໝົດ 16.132 ຫົວໜ່ວຍ, ມີມູນຄ່າຈົດທະບຽນ 14.236,95 ຕື້ກີບ, ລວມຍອດຜະລິດຕະພັນອຸດສາຫະກໍາບັນລຸໄດ້ 5.197 ຕື້ກີບ, ທຽບໃສ່ໄລະດຽວກັນເພີ່ມຂື້ນ 33%, ທຽບໃສ່ແຜນການປີ 2022 ເພີ່ມຂື້ນ 19%, ລວມຍອດການຈໍາໜ່ວຍຜະລິດຕະພັນອຸດສາຫະກໍາ ແລະຫັດຖະກໍາບັນລຸໄດ້ 6.865 ຕື້ກີບ,ທຽບໃສ່ໄລຍະດຽວກັນຂອງປີເພີ່ມຂື້ນ 31%,ທຽບໃສ່ແຜນການປີ 2022 ເພີ່ມຂື້ນ 17%,ມູນຄ່າການເກັບຊື້ຜະລິດຕະພັນພາຍໃນປະຕິບັດບັນລຸໄດ້ 19.403 ຕື້ກີບ, ທຽບໃສ່ໄລຍະດຽວກັນເພີ່ມຂື້ນ 12% ແລະທຽບໃສ່ແຜນປີເພີ່ມຂື້ນ 2% ແລະມະນຄາການຈໍລະຈອນພາຍໃນປະຕິບັດບັນລຸໄດ້ 19.901 ຕື້ກີບ, ທຽບໃສ່ໄລຍະດຽວກັນເພີມຂື້ນ 12%, ທຽບໃສ່ແຜນປີເພີມຂື້ນ 5%.

ໂດຍ: ໂພທິລາດ

แชร์