ໂຮງໝໍສູນກາງ 103 ສຳເລັດ ຜ່າຕັດການປູກຖ່າຍໝາກໄຂ່ຫລັງ 2 ກໍລະນີ ທຳອິດຢູ່ ສປປ ລາວ

ໂຮງໝໍສູນກາງ 103 ກອງທັບປະຊາຊົນລາວໄດ້ປະສົບຜົນສຳເລັດຢ່າງຈົບງາມໃນການຜ່າຕັດປູກຖ່າຍໄຂ່ຫລັງ 2 ກໍລະນີທຳອິດ ຢູ່ ສປປ ລາວ ຊຶ່ງທັງ 2 ກໍລະນີຄົນເຈັບປັດຈຸບັນຫລັງປູກຖ່າຍໄດ້ 10 ວັນ ສະພາບທົ່ວຮ່າງກາຍດີຂຶ້ນຕາມລໍາດັບ, ສະມາດເຄື່ອນໄຫວຍ່າງໄປມາໄດ້ເປັນປົກກະຕິ, ກິນດື່ມໄດ້, ຮູ້ສຶກມີລົດຊາດແຊບ, ຮູ້ສຶກມີເຫື່ອມີແຮງຂຶ້ນຫລາຍ, ນໍ້າປັດສະວະ ໄດ້ປະມານລິມານເພິ່ງພໍໃຈ, ຜົນການກວດເລືອດວິເຄາະປັດຈຸບັນແມ່ນຢູ່ໃນຄ່າປົກກະຕິ.

ພັອ ດຣ. ສະແຫວງໄຊ ດາລາສາດ ຫົວໜ້າການທະຫານ ໂຮງໝໍສູນກາງ 103 ກອງທັບປະຊາຊົນລາວ ໄດ້ຖະແຫລ່ງຂ່າວຕໍ່ສື່ມວນຊົຍໃນວັນທີ 9 ມັງກອນ 2023 ນີ້ວ່າ: ໂຄງການຮ່ວມມືຜ່າຕັດປູກຖ່າຍໄຂ່ຫລັງ ແມ່ນການຮ່ວມມືລະຫວ່າງລະຫວ່າງ ໂຮງໝໍສູນກາງ 103 ກອງທັບປະຊາຊົນລາວ ແລະໂຮງໝໍ 103 ວິທະຍາຄານກອງທັບ ປະຊາຊົນຫວຽດນາມ ຊຶ່ງໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ປີ 2018 ໂດຍຄະນະນຳໂຮງໝໍ 103 ວິທະຍາຄານການແພດກອງທັບປະຊາຊົນຫວຽດນາມ ໄດ້ມາກວດກາສຳຫລວດຢ່າງລະອຽດຖີ່ຖ້ວນກ່ຽວກັບ ໂຄງລ່າງພື້ນຖານ, ອຸປະກອນການແພດ, ບຸກຄາລະກອນ ຂອງໂຮງໝໍສູນກາງ 103 ກອງທັບ. ໃນປີ 2019 ພະນັກງານແພດໝໍ ໂຮງໝໍສູນກາງ 103 ກອງທັບປະຊາຊົນລາວ ຈໍານວນ 15 ທ່ານ ໄດ້ເດີນທາງໄປຝຶກອົບຮົມວຽກງານຜ່າຕັດປູກຖ່າຍໄຂ່ຫລັງ ເພື່ອກະກຽມປູກຖ່າຍໃນຕົ້ນປີ 2020, ແຕ່ຍ້ອນການແຜ່ລະບາດຂອງພະຍາດ ໂຄວິດ-19; ສະນັ້ນໂຄງການດັ່ງກ່າວຈຶ່ງໄດ້ໂຈະໄວ້ຊົ່ວຄາວ.

ພາຍຫລັງ ພະຍາດໂຄວິດ-19 ມີທ່ວງທ່າຫລຸດລົງທາງດ້ານປະລິມານ ແລະຄວາມຮ້າຍແຮງໂຄງການຈຶ່ງໄດ້ສືບຕໍ່. ໃນເດືອນພະຈິກ 2022 ຄະນະຊ່ຽວຊານປູກຖ່າຍໄຂ່ຫລັງ ໂຮງໝໍ 103 ກອງທັບປະຊາຊົນຫວຽດນາມ ໄດ້ເດີນທາງມາຫລວດຄັ້ງທີ 2 ແລະ ໄດ້ເຮັດບົດບັນທຶກການປູກຖ່າຍໄຂ່ຫລັງ ໃນປີ 2022 ແລະແຜນການການໃນປີ 2023 ຢ່າງລະອຽດ. ຈໍານວນ 03 ຄູ່ ຄົນເຈັບ ໄດ້ເດີນທາງໄປ ໂຮງໝໍ 103 ກອງທັບປະຊາຊົນຫວຽດນາມ ເພື່ອກະກຽມໃຫ້ການຜ່າຕັດປູກຖ່າຍໃນທ້າຍປີ 2022.

ພັອ ດຣ. ສະແຫວງໄຊ ດາລາສາດ ກ່າວຕື່ມວ່າ: ສໍາລັບ ສປປ ລາວ ແມ່ນໜຶ່ງໃນປະເທດກຸ່ມອາຊຽນ ທີ່ບໍ່ທັນສະມາດປູກຖ່າຍໄຂ່ຫລັງໄດ້, ຄົນເຈັບຊຸດໂຊມໄຂ່ຫລັງໄລຍະທ້າຍນັບມືນັບຫລາຍຂຶ້ນ ຕາມການຄາດຄະເນ ໃນຂອບເຂດທົ່ວປະເທດມີປະມານ 1.000 ກວ່າຄົນເຈັບໄຂ່ຫລັງຊຸດໂຊມ ຕ້ອງໄດ້ຟອກເລືອດປະຈໍາ. ການຜ່າຕັດປູກຖ່າຍໄຂ່ຫລັງ ແມ່ນວິທີການປິ່ນປົວສຸດທ້າຍ ແລະ ແມ່ນວິທີການປິ່ນປົວທີດີເລີດ ສາມາດເຮັດຮ່າງກາຍຄືນເຈັບ ຟື້ນຟູກັບຄືນສູ່ສະພາບປົກກະຕິໄດ້ໄວທີ່ສຸດ ແລະ ສາມາດກັບຄືນການໃຊ້ຊິວິດປະຈຳວັນ, ບາງກໍລະນີສາມາດຖືພາມີລູກໄດ້ ແລະ ຊີວິດນີ້ຈະບໍ່ໄດ້ຕິດພັນນຳເຄື່ອງຈັກຟອກເລືອດ ຫລື ນັ່ງລໍຖ້າຄິວຟອກເລືອດອີກ. ເພື່ອກະກຽມການປູກຖ່າຍໄຂ່ຫລັງ ຄັ້ງນີ້, ທາງ ໂຮງໝໍ 103 ກອງທັບປະຊາຊົນ ຫວຽດນາມ ໄດ້ວາງແຜນການຢ່າງລະອຽດຖີ່ຖ້ວນ, ໄດ້ກະກຽມຢາ, ອຸປະກອນການແພດ, ວັດຖຸສິ້ນເປືອງຄົບຖ້ວນ ພ້ອມດ້ວຍວິຊາການຜູ້ຊຳນານທີ່ສຸດ ແລະ ການກະກຽມປັບປຸງປົວແປງຄືນຫ້ອງຜ່າຕັດ, ຫ້ອງພັກຟື້ນ, ຫ້ອງມໍລະສຸມ, ພະແນກຟອກເລືອດ, ຝຶກອົບຮົມພະນັກງານແພດໝໍ ແລະ ມີຄວາມຮັບຜິດຊອບແຕ່ລະໜ້າວຽກຢ່າງສູງ ໂດຍສະເພາະ ການເພີ່ມທະວີວຽກອະນາໄມຂ້າເຊື້ອ, ປາບເຊື້ອ, ລ້າງຄືນໝົດລະບົບແອ ແລະ ກວດກາເຊື້ອພະຍາດ. ມາຮອດວັນທີ 31 ທັນວາ 2022 ການຜ່າຕັດປູກຖ່າຍໄຂ່ຫລັງ 2 ກໍລະນີ ໄດ້ເລີ່ມຕົ້ນແຕ່ເວລາ 7 ໂມງ ຈົນຮອດ 18 ໂມງຈຶ່ງສຳເລັດ, ທັງ2 ກໍລະນີ ຫລັງປູກຖ່າຍໄຂ່ຫລັງປູກຖ່າຍໄດ້ຕື່ງຂຶ້ນ, ແດງດີ ແລະເຕັ້ນຕາມຈັງຫວະຫົວໃຈເຕັ້ນ, ໄດ້ເຫັນນໍ້າຍ່ຽວຢອດທຳອິດຜ່ານທໍ່ຍ່ຽວ ເຮັດໃຫ້ທີມງານຂອງພວກເຮົາດີໃຈສຸດຊຶ້ງ ເຕັມໄປດ້ວຍຄວາມສຸກ ຢ່າງລົ້ນເຫລືອ.

ພົ.ວ ຫງຽນ ຊວນ ກ່ຽນ ຫົວໜ້າວິທະຍາຄານການແພດ ກອງທັບປະຊາຊົນຫວຽດນາມ ໄດ້ກ່າວວ່າ: ການຜ່າຕັດປູກຖ່າຍໄຂ່ຫລັງ ກໍລະນີທຳອິດໃນໂລກ ໄດ້ດຳເນີນໃນວັນທີ 23/12/1954 ທີ Boston ສະຫະລັດອາເມລິກາ ໂດຍນັກຜ່າຕັດ ທ່ານ Joseph Muray. ຫລັງຈາກນັ້ນ ເຕັກນິກຜ່າຕັດນີ້ ໄດ້ກະຈາຍໄປໃນຂອບເຂດທົ່ວໂລກ, ສໍາລັບຢູ່ ສສ ຫວຽດນາມ ໄດ້ຜ່າຕັດປູກຖ່າຍໄຂ່ຫລັງ ກໍລະນີທຳອິດ ເມື່ອປີ 1992 ຢູ່ ໂຮງໝໍ 103 ກອງທັບປະຊາຊົນຫວຽດນາມ; ມາຮອດປັດຈຸບັນ ບັນດາໂຮງໝໍໃຫຍ່ຂັ້ນສູນກາງ, ຂັ້ນນະຄອນ ຈໍານວນ 21 ໂຮງໝໍ ໃນຂອບເຂດທົ່ວປະເທດ ແມ່ນສະມາດຜ່າຕັດໄດ້ປູກຖ່າຍໄຂ່ຫລັງ ແລະ ຈຳນວນຄົນເຈັບໄດ້ປູກຖ່າຍໄຂ່ຫລັງ ຢູ່ ສສ ຫວຽດນາມ ມີຫລາຍກວ່າ 6.000 ກໍລະນີ ໃນຈໍານວນນັ້ນມີຄົນເຈັບແມ່ນຄົນລາວຈຳນວນບໍ່ຫນ້ອຍ.

ຜົນສຳເລັດການຜ່າຕັດປູກຖ່າຍ 2 ກໍລະນີທຳອິດ ຢູ່ ສປປ ລາວ ຄັ້ງນີ້, ເປັນຂີດໝາຍປະຫວັດສາດ ແລະ ເປີດສາກໃຫ້ວົງການແພດລາວບຸກບືນເທື່ອລະກ້າວໃຫ້ພັດທະນາກ້າວໜ້າທຽບທັນ ກັບບັນດາປະເທດໃກ້ຄຽງ ແລະ ສາກົນ. ທັງແມ່ນຜົນສຳເລັດ ການຮ່ວມມືຮອບດ້ານ, ຄວາມສາມັກຄີພິເສດ ແລະ ການຮ່ວມມືຮອບດ້ານ ສອງປະເທດລາວ-ຫວຽດນາມ, ເປັນຜົນງານຊ່ວຍເຫລືອດ້ວຍຄວາມຈິງໃຈຜູກພັນຮັກແພງອ້າຍນ້ອງຢ່າງສະໜິດສະໜົມປະກອບສ່ວນອຸທິດແດ່ປີສາມັກຄີພິເສດ ລາວ-ຫວຽດນາມ ຄົບຮອບ 60 ປີ.

ໃນໂອກາດດຽວກັນນີ້, ພົ.ວ ຫງຽນ ຊວນ ກ່ຽນ ຕາງໜ້າໃຫ້ໂຮງໝໍ ທະຫານ 103 ວິທະຍາຄານການແພດ ກອງທັບປະຊາຊົນຫວຽດນາມ ໄດ້ມອບຢາ ແລະ ອຸປະກອນການແພດ ໃນການຜ່າຕັດປູກຖ່າຍໄຂ່ຫລັງ ພ້ອມດ້ວຍຊຸດໂສ້ງເສື້ອຄົນເຈັບ ຈຳນວນ 1.000 ຊຸດ ລວມມູນຄ່າທັງໝົດປະມານ 600 ລ້ານດົງ ໃຫ້ແກ່ໂຮງໝໍສູນກາງ 103 ກອງທັບປະຊາຊົນລາວນຳອີກ.
ຂປລ. ຂ່າວ: ມະນີທອນ, ພາບ: ເກດສະໜາ

แชร์