ວິທີປ້ອງກັນພະຍາດໝາກເຜັດ

 ໝາກເຜັດເປັນພືດຊະນິດໜຶ່ງທີ່ປູກບໍ່ຍາກແຕ່ກໍບໍ່ງ່າຍບັນຫາກໍຄືການປ້ອງກັນພະຍາດໂດຍສະເພາະແມ່ນພະຍາດເພ້ຍໄຟ ແລະໄຮຂາວຊຶ່ງເປັນສາເຫດເຮັດໃຫ້ຕົ້ນໝາກເຜັດເປັນໃບງິກງໍ, ຕົ້ນເຕ້ຍໃບຫຼົ່ນ, ເປັນໝາກນ້ອຍ ແລະບັນຫາອື່ນໆອີກ.

  ອີງຕາມຂໍ້ມູນຈາກສູນຄົ້ນຄວ້າກະສິກໍາ ແລະ ປ່າໄມ້ໃຫ້ຮູ້ວ່າ: ການປູກໝາກເຜັດສ່ວນໃຫຍ່ຈະພົບບັນຫາອາການໃບຂອງຕົ້ນໝາກເຜັດຈະງໍ, ຕົ້ນເຕ້ຍໃບຫຼົ່ນ,ໝາກມີຮູບຮ່າງບ້ຽວ ແລະເປັນໝາກນ້ອຍສາເຫດຂອງໂລກນີ້ເກີດມາຈາກເພ້ຍໄຟ ຫຼືໄຮຂາວ. ສໍາລັບອາການທີ່ເກີດຈາກເພ້ຍໄຟເຂົ້າທໍາລາຍຈະສັງເກດເຫັນໄດ້ວ່າ: ຍອດ, ຕາ,ດອກ ແລະໃບງິກກ້ານໃບ ຫຼືໃບດ້ານລຸ່ມມີຮອຍດ້ານສີນໍ້າຕານຂອບໃນມ້ວນງໍຂຶ້ນດ້ານເທິງອາການຮຸນແຮງປາຍໃບແຫ້ງໃບມ້ວນຂຶ້ນ ຕົ້ນໝາກເຜັດກຳລັງຈະອອກດອກຈະເຮັດໃຫ້ດອກຫຼົ່ນກຳລັງເປັນໝາກຈະເຮັດໃຫ້ໝາກບິດງໍ. ສ່ວນອາການທີ່ເກີດຈາກໄຮຂາວເຂົ້າທຳລາຍໃບບໍລິເວນໂຄນຕົ້ນໃບຮີດຮຽວຍາວ, ໃບໂຄ້ງຂອບໃບມ້ວນລົງດ້ານລຸ່ມບໍລິເວນຍອດທີ່ງິກງໍເປັນຝອຍ ແລະ ສີນໍ້າຕານແດງເຮັດໃຫ້ຕົ້ນໝາກເຜັດບໍ່ຈະເລີນເຕີບໂຕຢຸດການອອກດອກ.

   ສຳລັບວິທີແກ້ພະຍາດດັ່ງກ່າວມີ 2 ສູດຄື: ສູດທີ 1 ໃຫ້ເອົາຂີ້ເຖົ່ານຳມາໂຮຍບໍລິເວນຕົ້ນໝາກເຜັດທີ່ມີອາການໃບງິກງໍໂດຍບໍ່ຕ້ອງຫົດນໍ້າການໂຮຍຂີ້ເຖົ່າເຮົາຈຳເປັນເຮັດການໂຮຍຊໍ້າ 2-3 ຄັ້ງ ການໂຮຍແຕ່ລະຄັ້ງນັ້ນຈະໃຊ້ໄລຍະເວລາເວັ້ນ 2 ວັນຕໍ່ຄັ້ງຈົນຄົບ 2-3 ຄັ້ງ ຫຼື ຈະນຳຂີ້ເຖົ່າໄປປະສົມນໍ້າແລ້ວຄົນໃຫ້ເຂົ້າກັນປະໄວ້ຈົນຂີ້ເຖົ່າຕົກຕະກອນ ແລະຈຶ່ງນຳຂີ້ເຖົ່າມາສີດພົ່ນ.

  ສ່ວນວິທີແກ້ສູດທີ 2 ໃຊ້ສະໝຸນໄພທີ່ຫາໄດ້ງ່າຍໃນທ້ອງຖິ່ນຊະນິດໃດກໍ່ໄດ້ທີ່ມີລົດຊາດຝາດເຊັ່ນ: ໝາກ, ເປືອກໝາກມັງຄຸດ, ຂີ້ໝິ້ນອັດຕາສ່ວນຢ່າງລະເທົ່າກັນລວມ 50 ກິໂລກຼາມກາກນໍ້າຕານ 10 ກິໂລກຼາມ, ຫົວເຊື້ອຈຸລິນຊີ 1 ລິດ ຖັງຂະໜາດ 150 ລິດ 1 ຖັງ, ນໍ້າ 10 ລິດ;ຈາກນັ້ນທຸບໝາກພໍແຕກ, ຊອຍເປືອກໝາກມັງຄຸດ ແລະຂີ້ໝິ້ນໃສ່ລົງໃນຖັງທີ່ກຽມໄວ້,ປະສົມກາກນໍ້າຕານ+ຫົວເຊື້ອຈຸລິນຊີ+ນໍ້າ ຄົນໃຫ້ເຂົ້າກັນຖອກໃສ່ລົງໃນຖັງປິດຝາເກັບໄວ້ບ່ອນຮົ່ມນຳໄປສີດພົ່ນອັດຕາສ່ວນນໍ້າຢາ 1 ລິດ ຕໍ່ນໍ້າ 200 ລິດ (ສີດພົ່ນທຸກໆ 7 ວັນໃນ ຕອນແລງ).

ຂ່າວ: ນສພ ເສດຖະກິດ-ສັງຄົມ

แชร์