ຄອສພ ສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ

ກອງປະຊຸມການສ້າງແຜນກຳນົດພະ ນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ຂອງຄະນະໂຄສະນາອົບຮົມສູນກາງພັກ (ຄອສພ) ຈັດຂຶ້ນໃນວັນທີ 29 ທັນວາ ນີ້ ທີ່ຄະນະໂຄສະນາອົບຮົມສູນກາງພັກ ໂດຍການເປັນປະທານ ຂອງ ທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະປະຈຳພັກ, ຄະນະບໍລິຫານງານພັກ, ຄະນະນຳ, ບັນດາຫົວໜ້າກົມ, ຮອງກົມ ແລະ ພະນັກງານເຂົ້າຮ່ວມ.

ໂອກາດນີ້ ທ່ານ ຄຳພັນ ເຜີຍຍະວົງ ກ່າວວ່າ: ກອງປະຊຸມການສ້າງແຜນກຳນົດພະນັກງານນຳ ພາ-ຄຸ້ມຄອງ ໃນຄັ້ງນີ້ແມ່ນມີຄວາມໝາຍສຳຄັນຫຼາຍເພາະພວກເຮົາຈະໄດ້ພ້ອມກັນເຊີດຊູຄວາມຮັບຜິດຊອບ ເພື່ອຄາດຄະເນໃນການກຳນົດເປົ້າໝາຍພະນັກງານທີ່ຈະຈັດເຂົ້າໃນຕໍາແໜ່ງຕ່າງໆ ໂດຍສະເພາະຕຳແໜ່ງນຳພາ-ຄຸ້ມຄອງ ຂັ້ນສູນກາງຄຸ້ມຄອງ ພາຍໃນຄະນະໂຄສະນາອົບຮົມສູນກາງພັກ ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ ທັງເປັນການບຳລຸງ-ກໍ່ສ້າງໃຫ້ມີຄວາມໜັກແໜ້ນທາງດ້ານຄຸນທາດການເມືອງ, ພຽບພ້ອມໄປດ້ວຍຄວາມຮູ້, ຄວາມສາມາດ ແລະ ຄຸນສົມບັດ ສິນທຳປະ ຕິວັດ; ກະກຽມບຸກຄະລາກອນໃນລັກສະນະເປີດກວ້າງປະກອບທາງດ້ານບຸກຄະລາກອນໃຫ້ຄົບຕາມຄວາມຮຽກຕ້ອງການ ຂອງຕຳແໜ່ງນຳພາ-ຄຸ້ມຄອງແຕ່ລະຂັ້ນຢູ່ພາຍໃນຄະນະໂຄສະນາອົບຮົມສູນກາງພັກ ສາມາດຈັດຕັ້ງປະຕິບັດໜ້າທີ່ການເມືອງໃນໄລຍະໃໝ່.

ໃນຂະນະດຽວກັນທ່ານ ຫົວໜ້າ ຄອສພ ກ່າວຕື່ມວ່າ: ການສ້າງແຜນກຳນົດພະນັກງານເປັນການຄາດຄະເນເປົ້າໝາຍພະນັກງານ ທີ່ຈະຈັດເຂົ້າໃນຕຳແໜ່ງງານນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ ແນໃສ່ລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ; ການສ້າງແຜນກຳນົດພະນັກງານເປັນວຽກງານທີ່ສຳຄັນພື້ນຖານຂອງວຽກພະນັກງານ, ເພື່ອຮັບປະກັນຫັນວຽກງານ ດຳເນີນຕາມລະບຽບແບບແຜນຄາດຄະເນ, ນອກນັ້ນຍັງເປັນພື້ນຖານໃຫ້ແກ່ການກຳນົດແຜນການບຳລຸງ-ກໍ່ສ້າງພະນັກງານ, ການຄາດຄະເນການສັບຊ້ອນຈັດວາງພະນັກງານໃຫ້ມີຄວາມເໝາະສົມ.

ກອງປະຊຸມຄັ້ງນີ້ຍັງໄດ້ເຊື່ອມຊຶມເອກະສານທີ່ກ່ຽວຂ້ອງກັບວຽກງານສ້າງແຜນກຳນົດພະນັກງານນໍາພາ-ຄຸ້ມຄອງເຊັ່ນ: ຜ່ານມະຕິຂອງກົມການເມືອງສູນກາງພັກ ວ່າດ້ວຍການສ້າງແຜນກຳນົດພະນັກງານນຳພາ-ຄຸ້ມຄອງ, ມາດຕະຖານຂອງພະນັກງານນຳພາ-ຄຸ້ມຄອງ, ບົດແນະນຳຂອງຄະນະຈັດຕັ້ງສູນກາງ ແລະ ມາດຕະຖານຂອງພະນັກງານນຳພາ-ຄຸ້ມຄອງ ຂອງຄະນະໂຄສະນາອົບຮົມສູນກາງພັກ.

(ຂ່າວ-ພາບ: ສຳນານ)

• 29/12/2022